കൽപറ്റയിൽ കണ്ട കടുവക്കായി തിരച്ചിൽ ഊർജിതം: നിരോധനാജ്ഞ
കൽപറ്റ ∙ പനമരം, കണിയാമ്പറ്റ പഞ്ചായത്തുകളിൽ കഴിഞ്ഞ ദിവസങ്ങളായി ജനങ്ങളിൽ ആശങ്ക സൃഷ്ടിച്ച കടുവയെ വനം വകുപ്പ് ഔദ്യോഗികമായി തിരിച്ചറിഞ്ഞു.
ജനവാസ മേഖലയിലേക്ക് ഇറങ്ങിയ കടുവ വയനാട് വന്യജീവി സങ്കേതത്തിലെ അഞ്ച് വയസ്സുള്ള 11-ാം നമ്പർ കടുവയാണെന്ന് അധികൃതർ സ്ഥിരീകരിച്ചു.
തിങ്കളാഴ്ച നടത്തിയ തെർമൽ ഡ്രോൺ നിരീക്ഷണത്തിനിടെ ലഭിച്ച ദൃശ്യങ്ങളുടെ അടിസ്ഥാനത്തിലാണ് ഡബ്ല്യു.എ.എൽ 112 എന്ന നമ്പർ നൽകിയിരിക്കുന്ന ഈ കടുവയാണെന്ന് വ്യക്തമായത്.
ജനവാസ മേഖലയിലുണ്ടായ കടുവയുടെ സാന്നിധ്യം സ്ഥിരീകരിച്ചതോടെ വനം വകുപ്പ് സുരക്ഷാ നടപടികൾ ശക്തമാക്കിയിട്ടുണ്ട്.
പ്രദേശത്ത് കടുവയുടെ സഞ്ചാരം നിയന്ത്രിക്കുന്നതിനും ജനങ്ങളുടെ സുരക്ഷ ഉറപ്പാക്കുന്നതിനുമായി പ്രത്യേക നിരീക്ഷണ സംഘങ്ങളെ വിന്യസിച്ചു.
കൽപറ്റയിൽ കണ്ട കടുവക്കായി തിരച്ചിൽ ഊർജിതം: നിരോധനാജ്ഞ
വയനാട് പച്ചിലക്കാട് പടിക്കം വയൽ ഭാഗങ്ങളിൽ നിന്നാണ് കടുവ മറ്റ് പ്രദേശങ്ങളിലേക്ക് നീങ്ങിയതെന്ന സംശയത്തെ തുടർന്നാണ് അവിടങ്ങളിൽ പരിശോധന കൂടുതൽ ഊർജിതമാക്കിയത്.
കടുവയുടെ സഞ്ചാരപഥം കൃത്യമായി കണ്ടെത്തുന്നതിനായി പടിക്കം വയലിനെ കേന്ദ്രീകരിച്ച് അഞ്ച് കിലോമീറ്റർ ചുറ്റളവിൽ തെർമൽ ഡ്രോൺ, ക്യാമറ ട്രാപ്പുകൾ, നിലത്ത് പാദമുദ്ര പരിശോധന തുടങ്ങിയ സംവിധാനങ്ങൾ ഉപയോഗിച്ചാണ് നിരീക്ഷണം നടക്കുന്നത്.
രാത്രി സമയങ്ങളിൽ പ്രത്യേക ജാഗ്രത പുലർത്താൻ വനം വകുപ്പ് ഉദ്യോഗസ്ഥർ പ്രദേശത്ത് ക്യാമ്പ് ചെയ്യുന്നുണ്ട്.
ജനവാസ മേഖലകളിൽ അനാവശ്യമായി ഇറങ്ങുന്ന കടുവയെ സുരക്ഷിതമായി കാട്ടിലേക്ക് തിരികെ നയിക്കുകയാണ് പ്രധാന ലക്ഷ്യമെന്ന് വനം വകുപ്പ് അറിയിച്ചു.
നാട്ടുകാരോട് രാത്രി സമയങ്ങളിൽ പുറത്തേക്ക് ഇറങ്ങാതിരിക്കാൻ നിർദേശം നൽകിയിട്ടുണ്ട്. വളർത്തുമൃഗങ്ങളെ സുരക്ഷിതമായി കെട്ടിയിടാനും കാട്ടുവഴികളിലൂടെ സഞ്ചാരം ഒഴിവാക്കാനും അധികൃതർ ആവശ്യപ്പെട്ടു.
കടുവയുടെ നീക്കങ്ങളെക്കുറിച്ച് കൃത്യമായ വിവരങ്ങൾ ലഭിക്കുന്നതോടെ തുടർനടപടികൾ സ്വീകരിക്കുമെന്നും, ജനങ്ങളുടെ സുരക്ഷയ്ക്കാണ് മുൻഗണനയെന്നും വനം വകുപ്പ് വ്യക്തമാക്കി.
പ്രദേശത്ത് ആശങ്ക തുടരുന്ന സാഹചര്യത്തിൽ ജാഗ്രതാ നിർദേശങ്ങൾ കർശനമായി പാലിക്കണമെന്ന് അധികൃതർ അഭ്യർത്ഥിച്ചു.
