ശബരിമല സന്ദർശനത്തിനിടെ ഹെലികോപ്റ്റർ ഇറങ്ങിയ സ്ഥലത്ത് അര ഇഞ്ച് താഴ്‌വ്; ജില്ലാ കളക്ടറുടെ വിശദീകരണം

ശബരിമല ഹെലികോപ്റ്റർ താഴ്ച സംഭവം

പത്തനംതിട്ട: രാഷ്ട്രപതി ദ്രൗപതി മുർമു സഞ്ചരിച്ച ഹെലികോപ്റ്റർ ഇറങ്ങിയ സ്ഥലത്ത് കോൺക്രീറ്റ് തറ താഴ്ന്നുപോയ സംഭവത്തിൽ ജില്ലാ കളക്ടർ എസ്. പ്രേം കൃഷ്ണൻ പ്രതികരിച്ചു.

രാഷ്ട്രപതി ഇറങ്ങിയ സ്ഥലത്ത് ഉണ്ടായിരുന്നത്‌ അര ഇഞ്ച് താഴ്ച മാത്രമാണെന്നും, ഹെലിപ്പാഡിന്റെ ഉറപ്പിൽ യാതൊരു പ്രശ്നവും ഉണ്ടായിരുന്നില്ലെന്നും, ഹെലികോപ്റ്റർ ‘H’ മാർക്കിനേക്കാൾ പിന്നിലാണ് ഇറങ്ങിയതെന്നും കളക്ടർ പറഞ്ഞു.

പെൺകുഞ്ഞ് ജനിച്ചതിനാണ് പീഡനം: ഭർത്താവിന്റെ അന്ധവിശ്വാസം യുവതിയുടെ ജീവിതം ഇരുണ്ടതാക്കി; അങ്കമാലിയിൽ ക്രൂരതയുടെ ഞെട്ടിക്കുന്ന കേസ്

പുതിയ കോൺക്രീറ്റ് കാരണം താഴ്ച

ഇൻഡോർ സ്റ്റേഡിയത്തിലെ ഹെലിപാഡ് പുതിയ കോൺക്രീറ്റ് ഉപയോഗിച്ച് രാവിലെയാണ് ഒരുക്കിയത്. കോൺക്രീറ്റ് പൂർണമായി ഉറയ്ക്കുന്നതിന് മുൻപേ ഹെലികോപ്റ്റർ ഇറങ്ങിയത് മൂലമാണ് അര ഇഞ്ച് താഴ്ച ഉണ്ടായത്.

സുരക്ഷാ പ്രശ്നമുണ്ടായിരുന്നുവെങ്കിൽ ഹെലികോപ്റ്റർ അതേ സ്ഥലത്ത് നിന്ന് ടേക്ക് ഓഫ് ചെയ്യില്ലായിരുന്നുവെന്നും കളക്ടർ കൂട്ടിച്ചേർത്തു.

എങ്ങനെ സംഭവിച്ചു

രാഷ്ട്രപതി ദ്രൗപതി മുർമുവിന്റെ ശബരിമല യാത്രയ്ക്കായി ആദ്യം നിശ്ചയിച്ചിരുന്നത് നിലയ്ക്കലിൽ ഹെലികോപ്റ്റർ ഇറക്കാനായിരുന്നു.

എന്നാൽ മഴയും പ്രതികൂല കാലാവസ്ഥയും പരിഗണിച്ച് അവസാന നിമിഷം ലാൻഡിംഗ് സ്ഥലം പ്രമാടം ഇൻഡോർ സ്റ്റേഡിയത്തിലേക്ക് മാറ്റുകയായിരുന്നു.

ഹെലികോപ്റ്ററിന്റെ ടയറുകൾ കോൺക്രീറ്റിൽ താഴ്ന്നതിനെ തുടർന്ന് പോലീസും ഫയർഫോഴ്സും ചേർന്ന് ഹെലികോപ്റ്റർ തള്ളി നീക്കി.

വിമർശനങ്ങളും യാത്രയയപ്പും

സംഭവം സുരക്ഷാ വീഴ്ചയാണെന്ന ആരോപണം ഉയർന്നിട്ടുണ്ടെങ്കിലും, ജില്ലാ ഭരണകൂടം അത് നിഷേധിക്കുന്നുണ്ട്.

വൈകുന്നേരം 4.15-ക്ക്‌ പ്രമാടം രാജീവ് ഗാന്ധി ഇൻഡോർ സ്റ്റേഡിയം ഗ്രൗണ്ടിൽ രാഷ്ട്രപതിയെ ദേവസ്വം വകുപ്പ് മന്ത്രി വി. എന്‍ വാസവൻ യാത്രയാക്കി.

ആന്‍റോ ആന്റണി എംപി, കെ. യു. ജനീഷ് കുമാർ എംഎൽഎ, പ്രമോദ് നാരായൺ എംഎൽഎ, ജില്ലാ കളക്ടര്‍ എസ്. പ്രേം കൃഷ്ണന്‍, ജില്ലാ പൊലീസ് മേധാവി ആര്‍. ആനന്ദ് എന്നിവർ പങ്കെടുത്തു.

അവിടെ നിന്ന്‌ രാഷ്ട്രപതി തിരുവനന്തപുരത്തേക്ക് യാത്ര തിരിച്ചു.

English Summary:

District Collector S. Prem Krishnan clarified that the concrete helipad at Pramadom Indoor Stadium, where President Draupadi Murmu’s helicopter landed, had only a half-inch dip due to freshly laid concrete. He confirmed that the helicopter landed slightly behind the marked “H” spot and that there were no safety concerns. The helipad was prepared hastily after the landing site was shifted from Nilakkal due to bad weather. Officials later assisted in repositioning the helicopter.