കൊച്ചി: പെരുമ്പാവൂരിൽ അതിഥിത്തൊഴിലാളി കുടുംബത്തിലെ പിഞ്ചു സഹോദരിമാരെ ലൈംഗികമായി പീഡിപ്പിക്കുകയും
ക്രൂരത ദൃശ്യങ്ങൾ മൊബൈലിൽ പകർത്തുകയും ചെയ്ത പ്രതി പോലീസ് പിടിയിൽ.
കാസർകോട് മോഗറൽ മലയൻ വീട്ടിൽ അബ്ദുൽ റസാഖ് (38) ആണ് എറണാകുളം റൂറൽ പോലീസിന്റെ പിടിയിലായത്.
ഒൻപതും പന്ത്രണ്ടും വയസ്സുള്ള പെൺകുട്ടികളെയാണ് ഇയാൾ മാസങ്ങളോളം പീഡനത്തിനിരയാക്കിയത്.
നിർമ്മാണത്തൊഴിലാളിയുടെ മറവിൽ ക്രൂരത; അയൽവാസികളായ കുട്ടികളെ വേട്ടയാടിയത് മാസങ്ങളോളം
പെരുമ്പാവൂരിലെ ഒരു വാടകവീട്ടിൽ സുഹൃത്തുക്കൾക്കൊപ്പം താമസിച്ചു വരികയായിരുന്നു അബ്ദുൽ റസാഖ്.
കെട്ടിടനിർമ്മാണ തൊഴിലാളിയായി എത്തിയ ഇയാൾ ഡ്രൈവിംഗ്, തടിപ്പണി, കയറ്റിറക്ക് തുടങ്ങിയ ജോലികളും ചെയ്തിരുന്നു.
പ്രതി താമസിച്ചിരുന്ന വീടിനോട് തൊട്ടടുത്ത കെട്ടിടത്തിലാണ് അതിഥിത്തൊഴിലാളികളായ ദമ്പതികളും മക്കളും താമസിച്ചിരുന്നത്.
ഇവരുമായി സൗഹൃദം സ്ഥാപിച്ച പ്രതി, കുട്ടികൾ വീട്ടിൽ തനിച്ചാകുന്ന സമയം നോക്കി ക്രൂരമായ ലൈംഗിക അതിക്രമം നടത്തുകയായിരുന്നു.
പീഡന ദൃശ്യങ്ങൾ മൊബൈലിൽ പകർത്തി ഭീഷണി; പുറംലോകമറിഞ്ഞത് പ്രതിയുടെ സുഹൃത്തിന്റെ ഇടപെടലിൽ
കഴിഞ്ഞ മാസമാണ് പീഡനവിവരം പുറത്തറിയുന്നത്. കുട്ടികളെ പീഡിപ്പിക്കുന്നത് പോരാതെ ആ ദൃശ്യങ്ങൾ ഇയാൾ സ്വന്തം മൊബൈൽ ഫോണിൽ ചിത്രീകരിക്കുകയും ചെയ്തിരുന്നു.
പ്രതിയുടെ പെരുമാറ്റത്തിൽ അസ്വാഭാവികത തോന്നിയ സുഹൃത്ത് ഇയാളുടെ ഫോൺ പരിശോധിച്ചപ്പോഴാണ് നടുക്കുന്ന വിവരങ്ങൾ പുറത്തുവരുന്നത്.
തുടർന്ന് സുഹൃത്ത് ഉടൻ തന്നെ ചൈൽഡ് വെൽഫെയർ കമ്മിറ്റിയെ (CWC) വിവരം അറിയിച്ചു.
സി.ഡബ്ല്യു.സി നൽകിയ റിപ്പോർട്ടിന്റെ അടിസ്ഥാനത്തിൽ പോലീസ് കുട്ടികളുടെ മൊഴി രേഖപ്പെടുത്തിയതോടെയാണ് അതിക്രൂരമായ പീഡനകഥ പുറംലോകമറിഞ്ഞത്.
പോക്സോ നിയമപ്രകാരം കേസെടുത്തു; ശക്തമായ അന്വേഷണ സംഘം പ്രതിയെ കുടുക്കി
കുട്ടികളുടെ മൊഴിയുടെ അടിസ്ഥാനത്തിൽ കുറുപ്പുംപടി പോലീസ് കേസെടുക്കുകയും പ്രതിയെ പിടികൂടുകയുമായിരുന്നു.
ഇൻസ്പെക്ടർ എൽ. അനിൽകുമാർ, എസ്.ഐ പ്രവീൺ പ്രകാശ്, എ.എസ്.ഐമാരായ രതീശൻ, എം.ബി സുബൈർ, സി.പി.ഒമാരായ ജിജുമോൻ, മുഹമ്മദ് ഷാൻ, ബിന്ദു, സന്ധ്യ എന്നിവരടങ്ങുന്ന സംഘമാണ് അന്വേഷണത്തിന് നേതൃത്വം നൽകിയത്.
കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഇയാളുടെ ഫോൺ ശാസ്ത്രീയ പരിശോധനയ്ക്ക് അയക്കുമെന്ന് പോലീസ് അറിയിച്ചു.
English Summary
In a shocking incident at Perumbavoor, Kochi, a 38-year-old man named Abdul Razak was arrested for sexually abusing two minor sisters, aged 12 and 9. The accused, who worked as a construction laborer, stayed in a rented house adjacent to the victims’ residence. He targeted the girls while their parents were away at work and recorded the heinous acts on his mobile phone.
