രണ്ട് ജില്ലകളിൽ ഓറഞ്ച് അലേര്‍ട്ട്
കാസര്‍കോട്: സംസ്ഥാനത്ത് കനത്ത മഴ തുടരുന്നു. രണ്ട് ജില്ലകളിൽ ഓറഞ്ച് അലേർട്ട് പ്രഖ്യാപിച്ചിട്ടുണ്ട്.
കാസര്‍കോട്, കണ്ണൂര്‍ ജില്ലകളില്‍ ആണ് ഓറഞ്ച് അലേര്‍ട്ട് പ്രഖ്യാപിച്ചിരിക്കുന്നത്. കനത്ത മഴയുടെ സാഹചര്യത്തില്‍ കാസർകോട് ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചു.
സ്‌കൂളുകള്‍, കോളേജുകള്‍, പ്രൊഫഷണല്‍ കോളേജുകള്‍, കേന്ദ്രീയ വിദ്യാലയങ്ങള്‍, ട്യൂഷന്‍ സെന്ററുകള്‍, മദ്രസകള്‍, അങ്കണവാടികള്‍, സ്പെഷ്യല്‍ ക്ലാസുകള്‍ എന്നിവയ ഉൾപ്പെടെയാണ് കളക്ടർ അവധി നൽകിയിരിക്കുന്നത്.
അതേസമയം മുമ്പ് നിശ്ചയിച്ചിരിക്കുന്ന എല്ലാ പരീക്ഷകളും (പ്രൊഫഷണല്‍, സര്‍വകലാശാലാ, മറ്റു വകുപ്പ് പരീക്ഷകള്‍ ഉള്‍പ്പെടെ) നടക്കുന്നതാണെന്നും പരീക്ഷാ സമയങ്ങളില്‍ മാറ്റമില്ലെന്നും കളക്ടര്‍ വ്യക്തമാക്കി.
ക്ളിയറൻസ് സർട്ടിഫിക്കറ്റ് വേണോ? പൊലീസ് മേധാവി സ്ഥാനം വേണ്ടെന്ന് എഴുതിത്തരണം
കനത്ത മഴ തുടരുന്നതിനാല്‍ കാസർകോട് ജില്ലയിലെ താഴ്ന്ന പ്രദേശങ്ങളില്‍ വെള്ളം കയറിയിട്ടുണ്ട്. പ്രധാന നദികള്‍ കരകവിഞ്ഞൊഴുകുകയാണ്.
ദേശീയപാതയിലെ ചില ഭാഗങ്ങളില്‍ മണ്ണിടിച്ചിലും റിപ്പോര്‍ട്ട് ചെയ്തിട്ടുണ്ടെന്നും ഈ സാഹചര്യത്തില്‍ സുരക്ഷാ മുന്‍കരുതലിന്റെ ഭാഗമായാണ് ജില്ലയിൽ അവധി പ്രഖ്യാപിച്ചതെന്നും കളക്ടര്‍ അറിയിച്ചു.
അതേസമയം ആലപ്പുഴ ജില്ലയിലെ കുട്ടനാട് താലൂക്കിലെ വിദ്യാഭ്യാസ സ്ഥാപനങ്ങള്‍ക്കും കളക്ടര്‍ അവധി പ്രഖ്യാപിച്ചിട്ടുണ്ട്. പ്രൊഫഷണല്‍ കോളേജ് ഉള്‍പ്പെടെ എല്ലാ വിദ്യാഭ്യാസ സ്ഥാപനങ്ങള്‍ക്കും അവധി ബാധകമാണ് എന്ന് കളക്ടർ അറിയിച്ചു.
കാലാവർഷ കെടുതിയിൽ സംസ്ഥാനത്ത് ഉടനീളം വ്യാപക നാശ നഷ്ടങ്ങളാണ് റിപ്പോർട്ട് ചെയ്യുന്നത്. തൃശൂർ ജില്ലയിലെ വിവിധയിടങ്ങളിൽ വീടുകൾക്ക് കേടുപാടുകൾ സംഭവിക്കുകയും വൈദ്യുതി ബന്ധം തകരാറിലാകുകയും ചെയ്തു.
കനത്ത മഴയിൽ കുന്നംകുളം കടവല്ലൂരിൽ വീടിന്റെ ഭിത്തി ഇടിഞ്ഞു വീണു. വട്ടമാവ് കുണ്ടിൽ പരേതനായ ചന്ദ്രന്റെ വീടിന്റെ പുറകുവശമാണ് ഇടിഞ്ഞു വീണത്. അപകട സമയത്ത് ചന്ദ്രന്റെ ഭാര്യയും മകനും വീട്ടിൽ ഉണ്ടായിരുന്നു.
കനത്ത കാറ്റിലും മഴയിലും തെങ്ങ് വീണു പശു ചത്തു. വാക മണിക്കത്ത് വിശ്വനാഥന്റെ വീട്ടിലെ പശുവാണ് ചത്തത്. തുടർച്ചയായുള്ള മഴയെ തുടർന്ന് തീരദേശത്തെ നിരവധി വീടുകൾ വെള്ളത്തിലായി.
എടത്തിരുത്തി, കയ്പമംഗലം, പെരിഞ്ഞനം പഞ്ചായത്തുകളിലാണ് വെള്ളക്കെട്ട് രൂക്ഷമായത്. പെരിഞ്ഞനത്ത് ദുരിതാശ്വാസ ക്യാമ്പ് തുറന്നു. സമീപ പ്രദേശങ്ങളിലെ തോടുകളിൽ ജലനിരപ്പ് ഉയർന്നതാണ് മേഖലയിലെ വെള്ളക്കെട്ടിന് കാരണം.
പുന്നയൂർക്കുളത്ത് ട്രാൻസ്‌ഫോർമറിന് മുകളിലേക്ക് മരം വീണ് വൈദ്യുതി മുടങ്ങി. പരൂർ ഡ്രീം പാലസ് ഓഡിറ്റോറിയത്തിന് സമീപത്തുള്ള മരങ്ങളാണ് ട്രാൻസ്‌ഫോർമറിനു മുകളിലേക്ക് വീണത്.
ഞായറാഴ്ച പുലർച്ചെയാണ് അപകടമുണ്ടായത്. ഇതേ തുടർന്ന് ആറോളം പോസ്റ്റുകളും ട്രാൻസ്‌ഫോർമറും തകർന്നു. സമീപ പ്രദേശങ്ങളിൽ നിരവധി വീടുകൾ ഉണ്ടെങ്കിലും മരം എതിർവശത്തേക്ക് വീണതിനാൽ വൻ ദുരന്തമാണ് ഒഴിവായത്.
Summary : Heavy rainfall continues across Kerala, prompting authorities to issue an orange alert in two districts. Residents are advised to stay cautious as weather conditions may worsen.
