തിരുവനന്തപുരം: നന്ദന്കോട് കൂട്ടക്കൊലപാതകക്കേസില് പ്രതി കേഡല് ജിന്സണ് രാജയുടെ ശിക്ഷ ഇന്ന് വിധിക്കും. തിരുവനന്തപുരം ആറാം അഡീഷണല് സെഷന്സ് കോടതി ജഡ്ജി കെ വിഷ്ണുവാണ് ശിക്ഷാ വിധി പ്രസ്താവിക്കുക.
വധശിക്ഷ നല്കണമെന്ന പ്രോസിക്യൂഷന് ആവശ്യത്തില് ഇന്ന് വാദം കേള്ക്കും. നാല് പേരെ കൂട്ടക്കൊല ചെയ്ത കേസ് അപൂര്വങ്ങളില് അപൂര്വമെന്നാണ് പ്രോസിക്യൂഷന് വാദിച്ചത്.
2017 ൽ സാത്താന് പൂജയ്ക്കായി അമ്മയെയും അച്ഛനെയും സഹോദരിയെയും ബന്ധുവായ സ്ത്രീയെയും കൊലപ്പെടുത്തിയ കേസില് കേഡല് ജിന്സണ് രാജയാണ് മാത്രമാണ് പ്രതി. നന്ദന്കോട് ക്ലിഫ് ഹൗസിന് സമീപം ബെയില്സ് കോമ്പൗണ്ടില് താമസിച്ചിരുന്ന റിട്ട. പ്രഫ രാജ തങ്കം, ഭാര്യ ഡോ. ജീന് പദ്മ, മകള് കരോലിന്, ബന്ധു ലളിത എന്നിവരാണ് കൊല്ലപ്പെട്ടത്.
ഇവരെ കൊല്ലപ്പെടുത്തിയ ശേഷം മൃതദേഹങ്ങള് കത്തിക്കുകയും ചെയ്തു. സംഭവ ശേഷം ചെന്നൈയിലേക്ക് രക്ഷപ്പെട്ട പ്രതി തിരിച്ചെത്തിയപ്പോഴാണ് തമ്പാനൂരിൽ വച്ച് അറസ്റ്റ് ചെയ്യുന്നത്. കേദലിന് മാനസിക പ്രശ്നങ്ങളുണ്ടെന്നായിരുന്നു വാദം.
എന്നാൽ മാനസിക പ്രശ്നങ്ങളില്ലെന്ന് ഡോക്ടർമാർ റിപ്പോർട്ട് നൽകിയതിനെ തുടർന്നാണ് കേസിൽ വിചാരണ തുടങ്ങിയത്. ആത്മാവിനെ സ്വതന്ത്രമാക്കാനുള്ള ആസ്ട്രല് പ്രൊജക്ഷന് അടിമയാണ് താനെന്നും അതിന്റെ ഭാഗമായാണ് കൂട്ടക്കൊല നടത്തിയതെന്നും പ്രതി കേദൽ പൊലീസില് മൊഴി നല്കിയിരുന്നു.
പ്രതിക്ക് മാതാപിതാക്കളോടു വിരോധം ഉണ്ടായിരുന്നെന്നും കുറ്റപത്രത്തില് പറയുന്നുണ്ട്. കൊലപാതകം, തെളിവു നശിപ്പിക്കല്, വീട് അഗ്നിക്കിരയാക്കല് തുടങ്ങിയ കുറ്റങ്ങളാണ് പ്രതിക്കുമേല് ചുമത്തിയിട്ടുള്ളത്. കേസില് 92 സാക്ഷികളെയാണ് വിസ്തരിച്ചിരുന്നത്.
