മുല്ലപ്പെരിയാർ ഡാമിന്റെ സുരക്ഷയിൽ ആശങ്ക വേണ്ടെന്ന് അനിൽ ജെയിൻ
തേനി: മുല്ലപ്പെരിയാർ ഡാമിന്റെ സുരക്ഷയിൽ ആശങ്ക വേണ്ടെന്നും, ഡാമിന് നിലവിൽ യാതൊരു കേടുപാടുകളുമില്ലെന്നും നാഷണൽ ഡാം സേഫ്റ്റി അതോറിറ്റി (NDSA) ചെയർമാൻ അനിൽ ജെയിൻ വ്യക്തമാക്കി.
ഡാം സന്ദർശിച്ച് പരിശോധന നടത്തിയ ശേഷം ചേർന്ന നാലാമത് മേൽനോട്ട സമിതി യോഗത്തിനുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഡാമിന്റെ ഘടന, ഹൈഡ്രോ-മെക്കാനിക്കൽ സംവിധാനങ്ങൾ, ഉപകരണങ്ങൾ, ഗാലറി, മറ്റ് പ്രധാന ഭാഗങ്ങൾ എന്നിവ വിദഗ്ധ സംഘം പരിശോധിച്ചു. 2025 മൺസൂണിനു ശേഷമുള്ള ഡാമിന്റെ സ്ഥിതിയും വിലയിരുത്തി.
ഭീതിപ്പെടുത്തുന്ന സാഹചര്യമോ പരിസ്ഥിതി പ്രശ്‌നങ്ങളോ കണ്ടെത്തിയിട്ടില്ല എന്നാണ് അനിൽ ജെയിൻ അറിയിച്ചത്.
കേരളവും തമിഴ്നാടും തമ്മിലുള്ള ഡാം സംബന്ധിച്ച വിഷയങ്ങൾ ചർച്ചകളിലൂടെ സൗഹൃദപരമായി പരിഹരിച്ചെന്നുമ അദ്ദേഹം പറഞ്ഞു. തമിഴ്നാട് കേരളത്തിന് ചില ഉപകരണങ്ങൾ കൈമാറാനും യോഗത്തിൽ ധാരണയായി.
വനമേഖലയിലൂടെ ഡാം പ്രദേശത്തേക്ക് തമിഴ്നാടിന് ആവശ്യമായ ഗതാഗത സൗകര്യം അനുവദിക്കാനും കേരളം സന്നദ്ധത അറിയിച്ചു.
ഡാമിനടിയിലെ സാഹചര്യം വിലയിരുത്താൻ നടത്തിയ റിമോട്ട് ഓപ്പറേറ്റഡ് വെഹിക്കിൾ (ROV) സർവേ റിപ്പോർട്ട് ലഭിച്ച ശേഷം തുടർനടപടികൾ ധാരണയാകും. റിപ്പോർട്ട് കൈവന്നാൽ ഗ്രൗട്ടിംഗ് ജോലികൾ തുടരാൻ കേരളം അനുമതി നൽകുമെന്ന് സമിതി അറിയിച്ചു.
ഡാമിന്റെ സുരക്ഷയെക്കുറിച്ചുള്ള സമഗ്രമായ വിദഗ്ധ പഠനത്തിനും മേൽനോട്ട സമിതി നിർദേശമുയർത്തി.
ഇതിന് രൂപീകരിക്കുന്ന സ്വതന്ത്ര വിദഗ്ധ സമിതിയിലേക്ക് ഇരു സംസ്ഥാനങ്ങളും അംഗങ്ങളുടെ പട്ടിക സമർപ്പിക്കും. നിയമപ്രകാരം, സമിതി രൂപീകരിക്കാനുള്ള അന്തിമ തീരുമാനം എൻഡിഎസ്എ കൈക്കൊള്ളും.
ബേബി ഡാമിലെ അറ്റകുറ്റപ്പണിക്കായി മരങ്ങൾ മുറിക്കേണ്ടതുണ്ടെങ്കിൽ കേന്ദ്ര പരിസ്ഥിതി-വനം-കാലാവസ്ഥാ മന്ത്രാലയത്തിന്റെ അനുമതി നിർബന്ധമാണെന്നും അനിൽ ജെയിൻ പറഞ്ഞു.
NDSA ചെയർമാൻ അനിൽ ജെയിൻ, രാകേഷ് ടോട്ടേജ, ആനന്ദ് രാമസാമി, ജെ. ജയകാന്തൻ, ബിശ്വനാഥ് സിൻഹ, ആർ. സുബ്രഹ്മണ്യൻ, ആർ. പ്രിയേഷ് എന്നിവർ അടങ്ങിയ മേൽനോട്ട സമിതിയാണ് മുല്ലപ്പെരിയാർ–ബേബി ഡാം പ്രദേശങ്ങൾ സന്ദർശിച്ചത്.
English Summary
The National Dam Safety Authority (NDSA) confirmed that Mullaperiyar Dam is safe and has no structural damage. After an inspection and supervisory committee meeting, NDSA Chairman Anil Jain stated that post-monsoon evaluation shows no safety or environmental concerns. Kerala and Tamil Nadu resolved key issues amicably, agreeing on equipment sharing and access routes. The Remote Operated Vehicle (ROV) survey report will guide further steps, including grout work. A decision on forming an expert committee for detailed assessment will be taken by NDSA. Any tree cutting for repairs will need approval from the Union Environment Ministry.
mullaperiyar-dam-safe-ndsa-inspection-no-damage-anil-jain
Mullaperiyar Dam, NDSA, Anil Jain, Kerala, Tamil Nadu, Dam Safety, Mullaperiyar Inspection, Water Dispute, ROV Survey, Baby Dam
