കൊച്ചി: പ്രധാനമന്ത്രി നരേന്ദ്രമോദിയുടെ വിരുന്നില് പങ്കെടുത്ത ബിഷപ്പുമാർക്കെതിരായ വീഞ്ഞും കേക്കും പരാമർശം പിൻവലിക്കുന്നതായി മന്ത്രി സജി ചെറിയാൻ. എന്നാൽ മണിപ്പൂര് സംബന്ധിച്ച കാര്യത്തിലെ രാഷ്ട്രീയ നിലപാടില് മാറ്റമില്ലെന്നും മന്ത്രി വ്യക്തമാക്കി. ബിഷപ്പുമാർക്കെതിരായ പ്രസ്താവനയിൽ പ്രതിഷേധം ഉയരുന്ന സാഹചര്യത്തിലാണ് വിശദീകരണവുമായി സജി ചെറിയാന് രംഗത്ത് വന്നത്. മണിപ്പൂരിലെ സംഘർഷം തടയുന്നതിൽ കേന്ദ്ര സർക്കാർ പരാജയമാണെന്നും അദ്ദേഹം വിമർശിച്ചു.
എന്റെ പരാമർശങ്ങളിൽ വന്ന ചില കാര്യങ്ങൾ പുരോഹിതർ സൂചിപ്പിച്ചു. വിരുന്നിന്റെ ഭാഗമായി വീഞ്ഞും കേക്കും എന്നു പറഞ്ഞ ഭാഗം പ്രയാസമായി തോന്നിയിരിക്കാം. അങ്ങനെ തോന്നിയെങ്കിൽ വീഞ്ഞിന്റെയും കേക്കിന്റെയും പരാമർശം പിൻവലിക്കുന്നു. എന്നാൽ കേക്കിന്റെയും വീഞ്ഞിന്റെയും പ്രശ്നമല്ല ഞാൻ ഉന്നയിച്ചത്. മണിപ്പുർ പ്രശ്നത്തിൽ എന്റെ രാഷ്ട്രീയ നിലപാടിൽ മാറ്റമില്ല. എന്റെ വ്യക്തിപരമായ അഭിപ്രായമാണ് പറഞ്ഞത്. അത് എന്റെ നിലപാട് മാത്രമായി കണ്ടാൽ മതി. ഖേദം പ്രകടിപ്പിക്കുന്നു. എല്ലാ ബിഷപ്പുമാരുമായും വ്യക്തിബന്ധമുണ്ട്. അവരെ അപകീർത്തിപ്പെടുത്താൻ ശ്രമിച്ചിട്ടില്ല. ശ്രമിക്കില്ല. ആരെയെങ്കിലും ഭയപ്പെട്ട്, കീഴ്പ്പെട്ട് പോകാൻ സാധിക്കില്ല.
ക്രൈസ്തവര്ക്ക് നേരെ കഴിഞ്ഞ വര്ഷം 700 ഓളം ആക്രമണങ്ങള് നടന്നു. ബിജെപി ഭരിക്കുന്ന സംസ്ഥാനങ്ങളിലാണ് അക്രമം കൂടുതൽ നടന്നത്. ബിജെപി ഭരിച്ച 9 വർഷം കൊണ്ട് ആക്രമണത്തിന്റെ നിരക്ക് കുത്തനെ വർധിച്ചു. ക്രൈസ്തവ വിഭാഗങ്ങൾക്കെതിരായ കുറ്റകൃത്യങ്ങളുടെ കണക്കിൽ ഇന്ത്യ ഒൻപതാമതാണ്. മോദി മണിപ്പൂര് സന്ദര്ശിക്കുകയോ പാര്ലമെന്റില് പ്രസ്താവന നടത്തുകയോ ചെയ്തില്ല. സംഘര്ഷം ഒഴിവാക്കാന് നടപടി ഉണ്ടായില്ലെന്നും മന്ത്രി പറഞ്ഞു. മുസ്ലിം സമുദായങ്ങള്ക്കെതിരെയും ആക്രമണം തുടര്ക്കഥയാണെന്നും സജി ചെറിയാന് പറഞ്ഞു. ഇതിനെതിരെ ഒന്നിച്ച് പ്രതികരിക്കണമെന്നാണ് പറഞ്ഞതെന്ന് അദ്ദേഹം വിശദീകരിച്ചു. ന്യൂനപക്ഷങ്ങൾക്കും ആരാധാനാലയങ്ങൾക്കും എതിരെ തുടർച്ചയായി നടക്കുന്ന ആക്രമണങ്ങളിൽ നിലപാട് പറയാത്തത് എന്തെന്നും മന്ത്രി ചോദിച്ചു.
Read Also: തൊടുപുഴയിൽ പശുക്കൾ കൂട്ടത്തോടെ ചത്ത സംഭവം; കുട്ടിക്കർഷകർക്ക് സഹായഹസ്തവുമായി സിനിമാലോകം
