ചുമ മരുന്ന് കഴിച്ച രണ്ടു കുട്ടികള് കൂടി മരിച്ചു; ഡോക്ടര് അറസ്റ്റില്
ഭോപ്പാല്: ചുമയ്ക്കുള്ള മരുന്ന് കഴിച്ച് രണ്ടു കുട്ടികള് കൂടി മരിച്ചു. ഇതോടെ മധ്യപ്രദേശിലെ ചിന്ദ്വാരയില് കഫ് സിറപ്പ് കഴിച്ച് മരിച്ച കുട്ടികളുടെ എണ്ണം 11 ആയി ഉയര്ന്നു.
അഞ്ചു വയസ്സില് താഴെയുള്ള കുട്ടികളാണ് മരിച്ചത്. കോള്ഡ്രിഫ് എന്ന മരുന്ന് കഴിച്ച കുട്ടികളാണ് മരിച്ചത്.
മരിച്ച കുട്ടികള് എല്ലാവരും കോള്ഡ്രിഫ് എന്ന പേരിലുള്ള ചുമമരുന്ന് ഉപയോഗിച്ചവരാണെന്ന് ആരോഗ്യവകുപ്പ് സ്ഥിരീകരിച്ചു.
ലബോറട്ടറി പരിശോധനയില് മരുന്നില് അപകടകരമായ വ്യാവസായിക രാസവസ്തു അടങ്ങിയിട്ടുണ്ടെന്ന് കണ്ടെത്തിയതോടെയാണ് സംസ്ഥാനത്ത് ഈ മരുന്നിന്റെ വില്പനയും ഉപയോഗവും പൂര്ണമായി നിരോധിച്ചത്.
പരിശോധനയില് കഫ് സിറപ്പില് 48.6% ഡൈഎത്തിലീന് ഗ്ലൈക്കോള് എന്ന അതീവ വിഷാംശമുള്ള രാസവസ്തു അടങ്ങിയിരിക്കുന്നതായി തെളിഞ്ഞു.
ഈ രാസവസ്തു ശരീരത്തിലെ വൃക്കകള് തകരാറിലാക്കുകയും ഗുരുതരമായ വിഷബാധയിലൂടെ മരണത്തിനും കാരണമാകുമെന്നാണ് വിദഗ്ധര് വ്യക്തമാക്കുന്നത്.
തമിഴ്നാട് ഡ്രഗ്സ് കണ്ട്രോള് വകുപ്പാണ് മധ്യപ്രദേശ് സര്ക്കാരിനെ ഈ വിഷവസ്തു സംബന്ധിച്ച് മുന്നറിയിപ്പ് നല്കിയത്.
തുടര്ന്ന് സംസ്ഥാന ആരോഗ്യവകുപ്പ് അടിയന്തര നടപടി സ്വീകരിച്ച് കോള്ഡ്രിഫ് സിറപ്പ് നിരോധിക്കുകയും സ്റ്റോക്കുകള് പിന്വലിക്കാനുള്ള നിര്ദേശം നല്കുകയും ചെയ്തു.
ഈ മരുന്ന് കുട്ടികള്ക്ക് കുറിച്ചു കൊടുത്ത ഡോക്ടര് പ്രവീണ് സോണിയെ മധ്യപ്രദേശ് പൊലീസ് അറസ്റ്റ് ചെയ്തിട്ടുണ്ട്.
ചിന്ദ്വാരയിലെ പരാസിയ പ്രദേശത്ത് സ്വകാര്യ ക്ലിനിക്ക് നടത്തുന്ന പ്രവീണ് സോണി സര്ക്കാര് ഡോക്ടറുമാണ്.
സ്വകാര്യമായി ക്ലിനിക്കില് എത്തിയ രോഗികളായ കുട്ടികള്ക്കാണ് അദ്ദേഹം ഈ മരുന്ന് കുറിച്ചു കൊടുത്തതെന്നാണ് പൊലീസ് കണ്ടെത്തല്.
കുട്ടികള്ക്ക് മരുന്ന് കഴിച്ചശേഷം ഛര്ദ്ദി, വയറുവേദന, മൂത്രമില്ലായ്മ തുടങ്ങിയ ലക്ഷണങ്ങളാണ് ഉണ്ടായത്.
പിന്നാലെ ആശുപത്രിയില് എത്തിച്ചപ്പോഴേക്കും ചിലരുടെ നില അതീവ ഗുരുതരമായിരുന്നു. ചികിത്സയ്ക്കിടെ കുട്ടികള് ഒരൊന്നായി മരണപ്പെട്ടു.
ഈ സംഭവത്തെ തുടര്ന്ന് മധ്യപ്രദേശ് സര്ക്കാര് തമിഴ്നാട് കാഞ്ചീപുരത്തെ സ്രീസന് ഫാര്മസ്യൂട്ടിക്കല്സ് എന്ന കമ്പനിക്കെതിരെയും കേസ് രജിസ്റ്റര് ചെയ്തിട്ടുണ്ട്.
ഈ കമ്പനി തന്നെയാണ് കോള്ഡ്രിഫ് കഫ് സിറപ്പിന്റെ നിര്മ്മാതാക്കള്.
കമ്പനി ഉല്പന്നത്തിന്റെ ഘടകങ്ങളെക്കുറിച്ച് തെറ്റായ വിവരങ്ങള് നല്കിയതായും,
ഉല്പന്നം ഫാര്മസ്യൂട്ടിക്കല് നിലവാരപരിശോധന പാസായിട്ടില്ലായിരുന്നുവെന്നും പ്രാഥമിക അന്വേഷണം വ്യക്തമാക്കുന്നു.
സംഭവവുമായി ബന്ധപ്പെട്ട് സംസ്ഥാന ആരോഗ്യവകുപ്പ്, കേന്ദ്ര ഡ്രഗ്സ് കണ്ട്രോള് ബോര്ഡ്, മെഡിക്കല് ഗവേഷണ സ്ഥാപനങ്ങള് എന്നിവയുടെ സംയുക്ത അന്വേഷണം പുരോഗമിക്കുകയാണ്.
സംസ്ഥാനത്ത് വില്പനയ്ക്കുള്ള മറ്റു കഫ് സിറപ്പുകളിലും ഗുണനിലവാരപരിശോധന ആരംഭിച്ചതായി ആരോഗ്യവകുപ്പ് അറിയിച്ചു.
English Summary:
Cough syrup tragedy in Madhya Pradesh: 11 children die after consuming toxic Coldrif syrup containing diethylene glycol. State bans the product and arrests doctor involved.
