മെമു ട്രെയിനിൽ കൊല്ലത്തു നിന്നും കയറി എറണാകുളം എത്തും മുമ്പ് യാത്രക്കാർ കുഴഞ്ഞു വീഴുന്നു; കാരണം ഇതാണ്

മെമു ട്രെയിനിൽ കൊല്ലത്തു നിന്നും കയറി എറണാകുളം എത്തും മുമ്പ് യാത്രക്കാർ കുഴഞ്ഞു വീഴുന്നു; കാരണം ഇതാണ്

കൊല്ലം:

കൊല്ലത്ത് നിന്ന് എറണാകുളത്തേക്കുള്ള മെമു ട്രെയിനുകളിൽ അതിരൂക്ഷമായ തിരക്ക് മൂലം യാത്രക്കാർ കുഴഞ്ഞുവീഴുന്ന സാഹചര്യം പതിവാകുന്നു. 

അവധി കഴിഞ്ഞ് കൂടുതൽ പേർ മടങ്ങുന്ന ഞായർ, തിങ്കൾ ദിവസങ്ങളിലാണ് അവസ്ഥ ഏറ്റവും ഗുരുതരമാകുന്നത്. വിദ്യാർത്ഥികളും ഓഫീസുകളിലേക്കുള്ള ജീവനക്കാരും ആശ്രയിക്കുന്ന മെമു സർവീസുകൾ മുഴുവൻ സമയത്തും തിരക്കിലാണ്.

കൊല്ലം–കോട്ടയം വഴിയും കൊല്ലം–ആലപ്പുഴ വഴിയും എറണാകുളത്തേക്കുള്ള എല്ലാ മെമു സർവീസുകളിലും ഒരേ തോതിലുള്ള തിരക്കാണ് അനുഭവപ്പെടുന്നത്. 

മറ്റ് ട്രെയിനുകളെ അപേക്ഷിച്ച് കുറഞ്ഞ ടിക്കറ്റ് നിരക്കുള്ളതാണ് മെമുകൾക്ക് കൂടുതൽ യാത്രക്കാരെ ആകർഷിക്കുന്നത്. ദേശീയപാത നിർമ്മാണം നടക്കുന്നതിനാൽ ബസ് യാത്രയ്ക്ക് കൂടുതൽ സമയം വേണ്ടിവരുന്നതും വലിയൊരു വിഭാഗത്തെ ട്രെയിനുകളിലേക്ക് തിരിയാൻ നിർബന്ധിതരാക്കുന്നു. 

എക്‌സ്പ്രസ് ട്രെയിനുകളിൽ ജനറൽ കോച്ചുകളുടെ കുറവുമൂലം യാത്രക്കാർ കൂടുതലായി മെമുവിനെ ആശ്രയിക്കുകയാണ്.

പല മെമു ട്രെയിനുകളും എട്ട് റേക്കുകളോടെയാണ് സർവീസ് നടത്തുന്നത്. 

റേക്കുകളുടെ എണ്ണം വർധിപ്പിച്ചാൽ തിരക്കിന് വലിയ ആശ്വാസമാകുമെങ്കിലും അധികൃതർ ഇതുവരെ തയ്യാറായിട്ടില്ല. കോച്ചുകൾക്കുള്ളിൽ ഇടം ലഭിക്കാത്തതിനാൽ ചവിട്ടുപടികളിലും ടോയ്ലറ്റ് വരാന്തകളിലും ശ്വാസം മുട്ടിച്ച് പിടിച്ചാണ് പലരും യാത്ര ചെയ്യുന്നത്.

 കൊല്ലത്ത് നിന്ന് പുറപ്പെടുന്ന മെമു ട്രെയിനുകൾ കായംകുളം എത്തുന്നതിന് മുൻപേ വാതിൽപ്പടികൾ വരെ യാത്രക്കാരാൽ നിറയുന്നു. ഓരോ സ്റ്റേഷനിലും ഇറങ്ങുന്നവരെക്കാൾ കൂടുതൽ പേർ കയറുന്നതാണ് സ്ഥിതി.

കൊല്ലം – എറണാകുളം മെമു സർവീസുകൾ (സമയം):

പുലർച്ചെ 3.45 – കൊല്ലം → ആലപ്പുഴ → എറണാകുളം

പുലർച്ചെ 4.20 – കൊല്ലം → കോട്ടയം → എറണാകുളം

പുലർച്ചെ 5.55 – കൊല്ലം → കോട്ടയം → എറണാകുളം

രാവിലെ 8.00 – കൊല്ലം → കോട്ടയം → എറണാകുളം

രാവിലെ 9.05 – കൊല്ലം → ആലപ്പുഴ → എറണാകുളം

രാവിലെ 11.00 – കൊല്ലം → കോട്ടയം → എറണാകുളം

ഉച്ചയ്ക്ക് 2.40 – കൊല്ലം → കോട്ടയം → എറണാകുളം

രാത്രി 9.05 – കൊല്ലം → കോട്ടയം → എറണാകുളം

“മെമു ട്രെയിനുകളിൽ യാത്രക്കാർ വലിയ ദുരിതമാണ് അനുഭവിക്കുന്നത്. ചിലപ്പോൾ ഒറ്റക്കാലിൽ പോലും നിൽക്കാൻ കഴിയാത്ത അവസ്ഥയുണ്ട്,”

എന്ന് ഫ്രണ്ട്‌സ് ഓൺ റെയിൽസ് ജനറൽ സെക്രട്ടറി ജെ. ലിയോൺസ് പറഞ്ഞു.

ദേശീയപാത നിർമാണം തുടരുന്നതിനാൽ കൂടുതൽ യാത്രക്കാർ ട്രെയിനുകളെ ആശ്രയിക്കുന്നുണ്ടെന്നും, അതിനാൽ മെമു സർവീസുകളുടെ ഇടവേള കുറച്ച് കൂടുതൽ സർവീസുകൾ ആരംഭിക്കണമെന്നും, കൊല്ലം–കോട്ടയം–എറണാകുളം റൂട്ടിൽ കുറഞ്ഞത് 12 റേക്കുകൾ വേണമെന്നും യാത്രക്കാരനായ പി.ആർ. രമേശ്കുമാർ ആവശ്യപ്പെട്ടു.

English Summary

Heavy overcrowding in MEMU trains operating from Kollam to Ernakulam has caused severe hardship for passengers, with reports of people fainting during travel.

kollam-ernakulam-memu-train-overcrowding-passenger-complaint

MEMU Trains, Kollam, Ernakulam, Railway News, Passenger Issues, Train Overcrowding, Kerala Railways, Public Transport