മനസാന്നിധ്യം കൈവിടാതെ ഷിനോജ്; രക്ഷിച്ചത് ഒരു കുരുന്നു ജീവൻ; ആദരിച്ച് എംവിഡി

മനസാന്നിധ്യം കൈവിടാതെ ഷിനോജ്; രക്ഷിച്ചത് ഒരു കുരുന്നു ജീവൻ; ആദരിച്ച് എംവിഡി

കോഴിക്കോട്: കോഴിക്കോട് കൊടിയത്തൂരിൽ നിന്ന് കഴിഞ്ഞ ദിവസം പുറത്തുവന്ന നടുക്കുന്ന ദൃശ്യങ്ങൾ ശ്വാസമടക്കിപ്പിടിച്ചാണ് പലരും കണ്ടത്.

സ്വകാര്യ ബസിന്റെ മുന്നിൽ പെട്ട മൂന്ന് വയസ്സുകാരി തലനാരിഴയ്ക്ക് രക്ഷപ്പെടുന്ന ദൃശ്യങ്ങളാണ് സമൂഹമാധ്യമങ്ങളിൽ വ്യാപകമായി പ്രചരിച്ചത്.

റോഡിന് കുറുകെ ഓടിയെത്തിയ കുട്ടിയെ മനസാന്നിധ്യം കൊണ്ട് രക്ഷപ്പെടുത്തിയ ബസ് ഡ്രൈവർ ഷിനോജിനെ മോട്ടോർ വാഹന വകുപ്പ് (എംവിഡി) ആദരിച്ചു.

സംഭവത്തിന്റെ വീഡിയോ ദൃശ്യങ്ങൾ എംവിഡി ഉദ്യോഗസ്ഥരും കണ്ടതോടെയാണ് ഡ്രൈവറുടെ സമയോചിത ഇടപെടലിനെ അംഗീകരിച്ച് ആദരിക്കാൻ തീരുമാനിച്ചത്.

തുടർന്ന് കോഴിക്കോട് പുതിയ ബസ് സ്റ്റാൻഡിൽ വെച്ച് അരീക്കോട് സ്വദേശി ഷിനോജിനെ മോട്ടോർ വാഹന വകുപ്പ് അധികൃതർ അഭിനന്ദിച്ച് ആദരിച്ചു.

ഓട്ടോറിക്ഷയിൽ നിന്നിറങ്ങിയ കുട്ടി പെട്ടെന്ന് റോഡിലേക്ക് ഓടുകയായിരുന്നു. ബസ് വരുന്നത് ശ്രദ്ധിക്കാതെയായിരുന്നു കുട്ടി റോഡിന് നടുവിലേക്ക് പാഞ്ഞത്.

എന്നാൽ കുട്ടിയെ കണ്ട ഉടൻ തന്നെ ഷിനോജ് ബസ് വലത് വശത്തേക്ക് വെട്ടിച്ച് ശക്തമായി ബ്രേക്ക് ഇടുകയായിരുന്നു. ഇതോടെ വൻ ദുരന്തം തലനാരിഴയ്ക്ക് ഒഴിവായി. പിന്നാലെ കുട്ടി തിരിഞ്ഞോടി ഓട്ടോയുടെ അടുത്തേക്ക് മടങ്ങുന്നതും ദൃശ്യങ്ങളിൽ വ്യക്തമാണ്.

ജനുവരി 30ന് നടന്ന സംഭവത്തിന്റെ വീഡിയോ ഡ്രൈവർ ഷിനോജ് തന്നെയാണ് പിന്നീട് പുറത്തുവിട്ടത്. വിവരങ്ങൾ പ്രകാരം, കുട്ടിയുടെ മാതാവ് ആദ്യം റോഡ് മുറിച്ചുകടന്നിരുന്നു.

ഓട്ടോയിലെ സീറ്റിൽ ഇരുന്ന് പിതാവ് പണം നൽകുന്നതിനിടെയാണ് കുട്ടി പുറത്തിറങ്ങി അമ്മയുടെ അടുത്തേക്ക് എത്താൻ റോഡ് കടക്കാൻ ശ്രമിച്ചത്. ഈ സമയത്താണ് കുട്ടി ബസിന്റെ മുന്നിൽ പെട്ടത്.

കോഴിക്കോട്–കൊടിയത്തൂർ റൂട്ടിൽ സർവീസ് നടത്തുന്ന തയ്യിൽ ബസിലെ ഡ്രൈവർ ഷിനോജിന്റെ അസാധാരണമായ ജാഗ്രതയും സമയോചിത ഇടപെടലുമാണ് കുഞ്ഞിന്റെ ജീവൻ രക്ഷിച്ചത്.

സംഭവത്തിന്റെ ആഘാതം കാരണം രണ്ട് ദിവസം ജോലിക്ക് പോകാൻ പോലും കഴിയില്ലെന്ന് ഷിനോജ് മാധ്യമങ്ങളോട് പ്രതികരിച്ചിരുന്നു. കുട്ടിയുടെ ജീവൻ രക്ഷിച്ച ഈ പ്രവർത്തിക്ക് സമൂഹത്തിന്റെ വിവിധ ഭാഗങ്ങളിൽ നിന്ന് വ്യാപക അഭിനന്ദനമാണ് ലഭിക്കുന്നത്.

ENGLISH SUMMARY

A shocking video from Kodiyathur, Kozhikode showed a young girl narrowly escaping being hit by a private bus. The bus driver, Shinoj, saved the child through a timely maneuver and emergency braking. After the footage went viral, the Motor Vehicles Department (MVD) honoured Shinoj at the Kozhikode New Bus Stand for his presence of mind and responsible driving.

kodiyathur-child-escape-bus-driver-shinoj-honoured-mvd

Kozhikode, Kodiyathur, bus driver, Shinoj, MVD, Motor Vehicles Department, child rescued, viral video, road safety, timely intervention, Kerala news