പുതുക്കിയ കീം റാങ്ക് പട്ടിക റദ്ദാക്കണം
ന്യൂഡൽഹി: കീം റാങ്ക് പട്ടിക വിവാദത്തിൽ കേരള സിലബസ് വിദ്യാർത്ഥികൾ സുപ്രീം കോടതിയെ സമീപിച്ചു. പുതുക്കിയ കീം റാങ്ക് പട്ടിക റദ്ദാക്കണമെന്നാവശ്യപ്പെട്ടാണ് വിദ്യാർത്ഥികൾ സുപ്രീം കോടതിയെ സമീപിച്ചത്.
റാങ്ക് പട്ടിക പുതുക്കിയത് സ്വാഭാവിക നീതിയുടെ നിഷേധമാണെന്ന് ഇവർ സുപ്രീം കോടതിയിൽ സമർപ്പിച്ച ഹർജിയിൽ പറയുന്നു. റാങ്ക് പട്ടിക അടിയന്തരമായി സ്റ്റേ ചെയ്യണമെന്നുമാണ് ഹർജിയിലെ ആവശ്യം.
പ്രോസ്പെക്ടസ് തിരുത്താൻ സർക്കാരിന് അധികാരമുണ്ട്. ഹൈക്കോടതി ഇടപെട്ടത് നയപരമായ വിഷയത്തിലാണ്. കേരള സിലബസിലെ വിദ്യാർത്ഥികൾക്ക് നീതി നിഷേധിക്കപ്പെട്ടുവെന്നും ഹർജിയിൽ ചൂണ്ടിക്കാട്ടുന്നു.
കീമിന്റെ പുതുക്കിയ ഫലം പ്രസിദ്ധീകരിച്ചു
തിരുവനന്തപുരം: കീമിന്റെ പുതുക്കിയ റാങ്ക് പട്ടിക പ്രസിദ്ധീകരിച്ചു. പഴയ ഫോര്മുല അനുസരിച്ച് റാങ്ക് ലിസ്റ്റ് പുതുക്കി പ്രഖ്യാപിച്ചപ്പോള് സ്റ്റേറ്റ് സിലബസിലുള്ള വിദ്യാര്ഥികള് പിന്നിലായി.
പുതുക്കിയ പട്ടിക പ്രകാരം 76,230 വിദ്യാർഥികൾ ആണ് യോഗ്യത നേടിയത്. തിരുവനന്തപുരം കവടിയാർ സ്വദേശിയായ ജോഷ്വ ജേക്കബിനാണ് ഒന്നാം റാങ്ക്. പഴയ പട്ടികയിൽ ജോഷ്വയ്ക്ക് അഞ്ചാം റാങ്കായിരുന്നു.
പഴയ ലിസ്റ്റിൽ ജോൺ ഷിനോജിനായിരുന്നു ഒന്നാം റാങ്ക്. രണ്ടാം റാങ്ക് ചെറായി സ്വദേശി ഹരികൃഷ്ണൻ ബൈജുവിനാണ്. തിരുവനന്തപുരം സ്വദേശി എമില് ഐപ് സക്കറിയ മൂന്നാം റാങ്കും സ്വന്തമാക്കി.
തീരൂരങ്ങാടി സ്വദേശി അദല് സയാന് (4), ബെംഗളൂരു സ്വദേശി അദ്വൈത് അയിനിപ്പള്ളി (5), ബെംഗളുരു സ്വദേശി അനന്യ രാജീവ് (6), എറണാകുളം സ്വദേശി ജോണ് ഷിനോജ് (7),
കോഴിക്കോട് കാക്കൂര് സ്വദേശി അക്ഷയ് ബിജു (8), കോഴിക്കോട് സ്വദേശി അച്യുത് വിനോദ് (9), കോഴിക്കോട് സ്വദേശി അന്മോല് ബൈജു (10) എന്നിവർ ആദ്യ പത്തില് ഇടംപിടിച്ചു.
ആദ്യ 100 റാങ്കിൽ 21 പേർ കേരള സിലസിൽ നിന്നുള്ളവരാണ്. മുൻ ലിസ്റ്റിൽ 43 പേരായിരുന്നു ഉണ്ടായിരുന്നത്.
കീം ഫലവുമായി ബന്ധപ്പെട്ട ഹൈക്കോടതി ഡിവിഷൻ ബെഞ്ചിന്റെ വിധി അംഗീകരിക്കുന്നുവെന്ന് ഉന്നതവിദ്യാഭ്യാസ വകുപ്പ് മന്ത്രി ആർ ബിന്ദു നേരത്തെ പ്രതികരിച്ചിരുന്നു.
ഡിവിഷൻ ബെഞ്ച് ഉത്തരവിനെതിരെ സർക്കാർ അപ്പീൽ നൽകില്ല എന്നും കോടതി ഉത്തരവ് പാലിക്കുമെന്നും മന്ത്രി വ്യക്തമാക്കിയിരുന്നു.
പഴയ ഫോർമുല തുടരും. പഴയ ഫോർമുല അനുസരിച്ചുള്ള റാങ്ക് ലിസ്റ്റ് അന്ന് തന്നെ പ്രസിദ്ധീകരിക്കുമെന്നും മന്ത്രി അറിയിച്ചിരുന്നു.
കീം റാങ്ക് ലിസ്റ്റുമായി ബന്ധപ്പെട്ട് സിംഗിള് ബെഞ്ചിന് പുറമേ ഡിവിഷന് ബെഞ്ചിലും സര്ക്കാരിന് തിരിച്ചടിയാണ് നേരിടേണ്ടി വന്നത്.
റാങ്ക് ലിസ്റ്റ് റദ്ദാക്കിയ സിംഗിള് ബെഞ്ച് നടപടിക്കെതിരെ സര്ക്കാര് നല്കിയ അപ്പീല് ഡിവിഷന് ബെഞ്ച് തള്ളുകയായിരുന്നു.
റാങ്ക് ലിസ്റ്റ് റദ്ദാക്കിയ നടപടിയില് ഇടപെടാനില്ലെന്ന് ഡിവിഷന് ബെഞ്ച് വ്യക്തമാക്കിയിരുന്നു. സര്ക്കാര് മുന്നോട്ടുവെച്ച വാദങ്ങള് ജസ്റ്റിസുമാരായ അനില് കെ നരേന്ദ്രന്, എസ് മുരളീകൃഷ്ണ എന്നിവര് ഉള്പ്പെട്ട ഡിവിഷന് ബെഞ്ച് അംഗീകരിക്കുകയും ചെയ്തില്ല.
അതേസമയം വിദ്യാർത്ഥികൾക്ക് ജൂലായ് 16 വരെ അപേക്ഷിക്കാം. ആദ്യ അലോട്ട്മെന്റ് പട്ടിക 18നാണ് പ്രസിദ്ധീകരിക്കുക.
Summary: Amid the KEAM rank list controversy, Kerala syllabus students have approached the Supreme Court seeking to cancel the revised KEAM rank list. The petition highlights concerns over fairness and syllabus disparity.
