വിജിലൻസ് കുടുക്കി; കൈക്കൂലി കേസിൽ പൊലീസ് ഉദ്യോഗസ്ഥന് 7 വർഷം തടവ്
അടൂർ: കൈക്കൂലി കേസിൽ സീനിയർ സിവിൽ പൊലീസ് ഓഫീസറെ 7 വർഷം കഠിന തടവിന് ശിക്ഷിച്ച് വിജിലൻസ് കോടതി.
പത്തനംതിട്ട പൊലീസ് സ്റ്റേഷനിലെ മുൻ ഉദ്യോഗസ്ഥനും നിലവിൽ തൃശ്ശൂർ മലക്കപ്പാറ സ്റ്റേഷനിൽ സേവനമനുഷ്ഠിച്ചുവരികയുമായ എ. താജുദ്ദീൻ ആണ് ശിക്ഷിക്കപ്പെട്ടത്.
കേസിന്റെ പശ്ചാത്തലം
2014-ൽ രജിസ്റ്റർ ചെയ്ത കേസിൽ, പരാതിക്കാരന് അനുകൂലമായി കോടതിയിൽ അന്തിമ റിപ്പോർട്ട് സമർപ്പിക്കാൻ ₹20,000 കൈക്കൂലി ആവശ്യപ്പെട്ടതാണ് കുറ്റം.
പത്തനംതിട്ട ചെന്നീർക്കര സ്വദേശിയായ പരാതിക്കാരനോട് ആവശ്യപ്പെട്ട തുകയിലെ ആദ്യ ഗഡുവായ ₹10,000 വാങ്ങുന്നതിനിടെയാണ് പ്രതി കുടുങ്ങിയത്.
കൈക്കൂലി വാങ്ങുന്നതിനിടെ പിടിയിലായി
കേരള വിജിലൻസ് ആൻഡ് ആൻ്റി കറപ്ഷൻ ബ്യൂറോയുടെ പത്തനംതിട്ട യൂണിറ്റാണ് പണം കൈപ്പറ്റുന്നതിനിടെ താജുദ്ദീനിനെ കൈയ്യോടെ പിടികൂടിയത്.
കോടതി വിധി
കൊല്ലം വിജിലൻസ് കോടതി ജഡ്ജി ഡോ. മോഹിത് സി.എസ് ആണ് വിധി പ്രസ്താവിച്ചത്. വിവിധ വകുപ്പുകളിലായി 7 വർഷം കഠിന തടവും ₹20,000 പിഴയും ശിക്ഷയായി വിധിച്ചു. പിഴ അടച്ചില്ലെങ്കിൽ അധിക തടവ് അനുഭവിക്കേണ്ടി വരും.
അന്വേഷണവും പ്രോസിക്യൂഷനും
കേസിൽ അന്വേഷണം നടത്തിയത് മുൻ ഡെപ്യൂട്ടി പൊലീസ് സൂപ്രണ്ട് പി.ഡി. രാധാകൃഷ്ണ പിള്ളയാണ്. വിജിലൻസിന് വേണ്ടി പബ്ലിക് പ്രോസിക്യൂട്ടർ സിജു രാജൻ കോടതിയിൽ ഹാജരായി.
English Summary
A senior civil police officer in Kerala has been sentenced to 7 years in prison for accepting a bribe to submit a favorable report in a case. He was caught red-handed by vigilance officials while accepting ₹10,000.
