കാസർകോട്; കാർ മറിഞ്ഞ് ശരീരത്തിലേക്ക് വീണ് ഒന്നര വയസുകാരിക്ക് ദാരുണാന്ത്യം. കാറഡുക്ക ബെള്ളിഗെയിലാണ് സംഭവം നടന്നത്.
ബള്ളിഗെ സ്വദേശി ഹരിദാസ്–ശ്രീവിദ്യ ദമ്പതികളുടെ മകൾ ഹൃദ്യനന്ദയാണ് മരിച്ചത്.
റോഡിലെ ഓവുചാലിൽ വീണ കാർ കുഞ്ഞിന്റെ പിതാവ് ഹരിദാസ് തള്ളിമാറ്റുന്നതിനിടെയാണ് മറിഞ്ഞത്. വീടിന് തൊട്ടടുത്തുവെച്ചായിരുന്നു അപകടമുണ്ടായത്.
ബന്ധുവിന്റെ ഗൃഹപ്രവേശന ചടങ്ങിനുശേഷം വീട്ടിലേക്ക് തിരിച്ചു വരികയായിരുന്നു കുടുംബം. പ്രധാന റോഡിൽനിന്ന് 100 മീറ്റർ താഴെയാണ് ഹരിദാസിന്റെ വീട്.
വീട്ടിലേക്കെത്താൻ 50 മീറ്റർ ശേഷിക്കേ കാർ ഓഫ് ആയി. പിന്നീടുള്ള വഴി ഇറക്കമാണ്. വെള്ളം ഒഴുക്കിവിടാൻ നിർമിച്ച ഓവുചാലിൽ കാറിന്റെ ചക്രം പുതഞ്ഞു.
കാർ തള്ളി നീക്കാനായി ഹരിദാസ് കുടുംബത്തെ പുറത്തിറക്കി. കാർ തള്ളി നീക്കവേ മുന്നോട്ട് ഇറക്കത്തിലേക്ക് നീങ്ങി വശത്തെ ഭിത്തിയിൽ ഇടിച്ചു കുട്ടിയുടെ ദേഹത്തേക്ക് മറിയുകയായിരുന്നു. സഹോദരി–ദേവനന്ദ.
