തിരുവനന്തപുരം: നിരവധി ക്രിമിനൽ കേസുകളിൽ പ്രതിയായ യുവാവിനെ ഗുണ്ടാ നിയമപ്രകാരം ജയിലിലടച്ചു. വെങ്ങാനൂർ മുട്ടയ്ക്കാട് വെളളാർ അരിവാൾ കോളനിയിൽ പണയിൽ വീട്ടിൽ വിമൽ മിത്ര(23)യെ ആണ് കോവളം പോലീസ് അറസ്റ്റുചെയ്തത്.
കാട്ടിലെ കണ്ണൻ എന്നറിയപ്പെടുന്ന വിമൽ മിത്ര(23)ക്കെതിരെ കോവളം എസ്.എച്ച്.ഒ. സജീവ് ചെറിയാൻ ഫോർട്ട് അസി. കമ്മീഷണർ ബിനുകുമാറിനും തുടർന്ന് കളക്ടർക്കും കൈമാറിയ റിപ്പോർട്ടിനെ തുടർന്നാണ് നടപടി.
അടിപിടി, സ്ത്രീകൾക്കെതിരെയുള്ള അക്രമം, കൊലപാതക ശ്രമം അടക്കമുളള നിരവധി കേസുകളിൽ പ്രതിയാണ് കാട്ടിലെ കണ്ണൻ. ഇയാൾക്കെതിരെ കോവളം പോലീസ് സ്റ്റേഷനിൽ പത്ത് കേസുകളും ആറ്റിങ്ങൽ പോലീസ് സ്റ്റേഷനിൽ രണ്ട് കേസുകളുമുണ്ടെന്ന് പോലീസ് അറിയിച്ചു. കളക്ടർ നൽകിയ ശുപാർശ പ്രകാരമാണ് ഇയാളെ ഗുണ്ടാ നിയമപ്രകാരം ജയിലിലടച്ചത്.
