ദുരന്തബാധിതർക്ക് നറുക്കെടുപ്പിലൂടെ തിരഞ്ഞെടുക്കാം, വയനാട് ആദ്യഘട്ടത്തിൽ നൽകുന്നത് 178 വീടുകൾ
തിരുവനന്തപുരം ∙ വയനാട് ദുരന്തബാധിതർക്കായി കൽപ്പറ്റ ടൗൺഷിപ്പിൽ നിർമ്മിച്ച വീടുകൾ നറുക്കെടുപ്പിലൂടെ കൈമാറുമെന്ന് മന്ത്രി ഒ.ആർ. കേളു അറിയിച്ചു.
ആദ്യഘട്ടമായി 178 വീടുകളാണ് വിതരണം ചെയ്യുക. നറുക്കെടുപ്പിലൂടെ ഗുണഭോക്താക്കൾക്ക് സ്വന്തം വീടുകൾ സ്വയം തിരഞ്ഞെടുക്കാനുള്ള അവസരവും ഉണ്ടാകും.
കൽപ്പറ്റയിൽ ചേർന്ന സർവകക്ഷി യോഗത്തിലാണ് നറുക്കെടുപ്പുമായി ബന്ധപ്പെട്ട നടപടിക്രമങ്ങൾ വിശദമായി ചർച്ച ചെയ്തത്.
നാളെ മുഖ്യമന്ത്രിയുടെ അദ്ധ്യക്ഷതയിൽ ചേരുന്ന യോഗത്തിൽ ഉദ്ഘാടന തീയതി ഉൾപ്പെടെയുള്ള അന്തിമ തീരുമാനങ്ങൾ കൈക്കൊള്ളുമെന്ന് മന്ത്രി അറിയിച്ചു.
മന്ത്രി ഒ.ആർ. കേളുവും ടി. സിദ്ധിഖ് എം.എൽ.എയും അടങ്ങുന്ന സംഘം ടൗൺഷിപ്പ് സന്ദർശിച്ച് ഒരുക്കങ്ങൾ വിലയിരുത്തുകയും ചെയ്തു.
അതേസമയം, വയനാട് മുണ്ടക്കൈ–ചൂരൽമല ദുരന്തബാധിതർക്കുള്ള ധനസഹായം തുടരുമെന്നും മന്ത്രി വ്യക്തമാക്കി.
സ്വന്തം വീടുകളിലേക്ക് തിരിച്ചെത്തുന്നതുവരെ ദുരന്തബാധിതർക്ക് ജീവനോപാധി സഹായം നൽകുന്ന പദ്ധതി നീട്ടിയതായി സർക്കാർ ഉത്തരവായി.
ഒരു കുടുംബത്തിലെ രണ്ട് അംഗങ്ങൾക്ക് ദിവസേന 300 രൂപ വീതം, മാസത്തിൽ 9000 രൂപയാണ് അനുവദിക്കുന്നത്. ഈ സഹായം ജൂൺ വരെയോ വീടുകളുടെ നിർമ്മാണം പൂർത്തിയാക്കി താക്കോൽ കൈമാറുന്നതുവരെയോ തുടരും.
ഡിസംബർ വരെ 656 കുടുംബങ്ങളിലെ 1185 പേർക്ക് മാസം 9000 രൂപ വീതം സഹായം നൽകിയിരുന്നു. കിടപ്പുരോഗികളുള്ള കുടുംബങ്ങളിൽ മൂന്നുപേർക്ക് വരെ ഈ ധനസഹായം ലഭിക്കും.
ദുരന്തനിവാരണ നിയമപ്രകാരം ആദ്യം മൂന്ന് മാസത്തേക്കാണ് ജീവനോപാധി പ്രഖ്യാപിച്ചിരുന്നത്. ദുരന്തബാധിതരുടെ ആവശ്യത്തെ തുടർന്ന് ഇത് പിന്നീട് ഡിസംബർ വരെ നീട്ടിയിരുന്നു.
English Summary
The Kerala government will hand over houses built for Wayanad disaster victims at the Kalpetta township through a lottery system, with 178 houses being allotted in the first phase, said Minister O.R. Kelu. Beneficiaries will be able to choose their homes through the draw. Meanwhile, financial livelihood assistance for Mundakkai–Chooralmala disaster victims will continue until June or until house construction is completed and keys are handed over.
kalpetta-township-houses-lottery-wayanad-disaster-victims
Wayanad disaster, Kalpetta township, Kerala government, Disaster rehabilitation, Lottery house allotment, Mundakkai Chooralmala, Livelihood assistance, O R Kelu, Kerala relief measures
