ഇൻസ്റ്റഗ്രാം ഉപയോക്താക്കളുടെ വിവരങ്ങൾ ചോർന്നോ? പ്രതികരിച്ച് മെറ്റ

ഇൻസ്റ്റഗ്രാം ഉപയോക്താക്കളുടെ വിവരങ്ങൾ ചോർന്നോ? പ്രതികരിച്ച് മെറ്റ

കാലിഫോർണിയ: ഇൻസ്റ്റഗ്രാം ഉപയോക്താക്കളുടെ വിവരങ്ങൾ ചോർന്നെന്ന റിപ്പോർട്ടുകൾ മെറ്റ നിഷേധിച്ചു. തങ്ങളുടെ ആന്തരിക സിസ്റ്റങ്ങളിൽ ഹാക്ക് സംഭവിച്ചിട്ടില്ലെന്നും ഡാറ്റാ ലീക്ക് ഉണ്ടായിട്ടില്ലെന്നും ഇൻസ്റ്റഗ്രാം വ്യക്തമാക്കി.

എന്നാൽ, ബാഹ്യ കക്ഷികൾക്ക് പാസ്‌വേഡ് റീസെറ്റ് ഇമെയിലുകൾ ട്രിഗർ ചെയ്യാൻ കഴിഞ്ഞ ഒരു പിഴവ് കണ്ടെത്തി പരിഹരിച്ചതായി കമ്പനി സ്ഥിരീകരിച്ചു.

1.75 കോടി ഇൻസ്റ്റഗ്രാം ഉപയോക്താക്കളുടെ വിവരങ്ങൾ ഡാർക്ക് വെബിൽ എത്തിച്ചെന്ന സൈബർ സുരക്ഷാ കമ്പനിയായ മാൽവെയർബൈറ്റ്സിന്റെ റിപ്പോർട്ടാണ് ആശങ്കകൾക്ക് ഇടയാക്കിയത്.

യൂസർനെയിം, ഫോൺ നമ്പർ, ഇമെയിൽ വിലാസം തുടങ്ങിയ വിവരങ്ങൾ ഹാക്കർമാർ ചോർത്തിയെന്നാണ് റിപ്പോർട്ടിൽ പറഞ്ഞത്. എന്നാൽ ഈ ആരോപണങ്ങൾ പൂർണമായും തെറ്റാണെന്ന് മെറ്റ ആവർത്തിച്ചു.

മാൽവെയർബൈറ്റ്സിന്റെ റിപ്പോർട്ടിനെ തുടർന്ന് ഇൻസ്റ്റഗ്രാം അക്കൗണ്ടുകൾ ഫിഷിംഗ് ആക്രമണങ്ങൾക്കും സോഷ്യൽ എഞ്ചിനീയറിംഗിനും ഇരയാകുമോയെന്ന ആശങ്ക വ്യാപകമായി ഉയർന്നു.

2024ൽ ഉണ്ടായ ഇൻസ്റ്റഗ്രാം എപിഐ എക്‌സ്‌പോഷറുമായി ബന്ധപ്പെട്ട സ്ക്രാപ്പ് ചെയ്ത ഡാറ്റയാണ് ഇപ്പോൾ പ്രചരിക്കുന്നതെന്ന സംശയവും ഉയർന്നിരുന്നു.

ഇതിനിടെ, ഉപയോക്താക്കൾ ആവശ്യപ്പെടാതെയാണ് നിരവധി പേർക്ക് പാസ്‌വേഡ് റീസെറ്റ് ഇമെയിലുകൾ ലഭിച്ചതും ആശങ്ക ശക്തമാക്കി. ഇതാണ് വലിയ തോതിലുള്ള ഹാക്കിങ് ശ്രമമെന്ന തെറ്റിദ്ധാരണയ്ക്ക് ഇടയാക്കിയതെന്ന് ഇൻസ്റ്റഗ്രാം വിശദീകരിച്ചു.

‘ഇൻസ്റ്റഗ്രാം അക്കൗണ്ടുകളിലേക്കോ ആന്തരിക സിസ്റ്റങ്ങളിലേക്കോ അനധികൃത പ്രവേശനം ഉണ്ടായിട്ടില്ല. കണ്ടെത്തിയ പിഴവ് പരിഹരിച്ചിട്ടുണ്ട്. ഉപയോക്താക്കളുടെ അക്കൗണ്ടുകൾ സുരക്ഷിതമാണ്.

ആവശ്യപ്പെടാതെ ലഭിക്കുന്ന പാസ്‌വേഡ് റീസെറ്റ് ഇമെയിലുകൾ അവഗണിക്കുക’ — എന്നായിരുന്നു ഇൻസ്റ്റഗ്രാം അധികൃതരുടെ വിശദീകരണം.

അതേസമയം, ഇത്തരത്തിലുള്ള സംഭവങ്ങൾ സുരക്ഷിതമെന്ന് കരുതുന്ന പ്ലാറ്റ്‌ഫോമുകളിലും ഫിഷിംഗ്, സോഷ്യൽ എഞ്ചിനീയറിംഗ് ആക്രമണങ്ങൾക്ക് വഴിയൊരുക്കാമെന്ന മുന്നറിയിപ്പും സൈബർ സുരക്ഷാ വിദഗ്ധർ നൽകുന്നു.

English Summary:

Meta has denied reports of a major Instagram data leak, stating that its systems were not hacked. The company confirmed a bug that allowed third parties to trigger password reset emails, which has now been fixed. Meta reassured users that Instagram accounts remain secure.

instagram-data-leak-rumours-denied-meta

Instagram, Meta, Data Leak, Cyber Security, Social Media, Technology News