കിഴക്കന്‍ ലണ്ടനിൽ രണ്ട് വയസ്സുള്ള കുഞ്ഞിന്റെ കഴുത്തറക്കുകയും മറ്റൊരു എട്ട് വയസ്സുകാരിയെ കത്തികൊണ്ട് കുത്തുകയും ചെയ്ത ഇന്ത്യൻ വംശജനെ അറസ്റ്റ് ചെയ്തു. കിഴക്കന്‍ ലണ്ടനിലെ ഡാഗെന്‍ഹാമിലെ വീട്ടില്‍വച്ച് കഴിഞ്ഞ വെള്ളിയാഴ്ചയാണ് സംഭവം ഉണ്ടായത്. Indian man cuts throat of two-year-old baby in UK
കുല്‍വിന്ദര്‍ റാം എന്ന 48 കാരനാണ് കേസിലെ പ്രതി. കുട്ടികളെ രക്ഷിക്കാനെത്തിയ ഒരു സ്ത്രീയേയും ഇയാൾ ആക്രമിച്ചു. രണ്ട് വയസുള്ള കുട്ടിയുടെ തൊണ്ടയില്‍ ആഴത്തിലുള്ള മുറിവാണ് ഉണ്ടയിരിക്കുന്നതെന്ന് ബാര്‍ക്കിംഗ്‌സൈഡ് മജിസ്‌ട്രേറ്റ് കോടതിയില്‍ നടന്ന വിചാരണക്കിടെ പ്രോസിക്യൂഷന്‍ അറിയിച്ചു. എട്ട് വയസ്സുകാരിയുടെ വായ് മുതല്‍ ചെവി വരെ നീളത്തിൽ മുറിഞ്ഞിട്ടുണ്ട്.
ഈ രണ്ട് കുട്ടികളെയും സംരക്ഷിക്കാന്‍ ശ്രമിക്കുന്നതിനിടയിലാണ് സ്ത്രീക്ക് ആക്രമണത്തില്‍ പരിക്കേറ്റതെന്നും കോടതിയെ അറിയിച്ചു. അക്രമത്തിനിരയായ മൂന്ന് പേരുടെയും നില ഗുരുതരമല്ല. അവര്‍ ആശുപത്രിയില്‍ ചികിത്സയിലാണ്.
കഴിഞ്ഞ വെള്ളിയാഴ്ച ഡാഗെൻഹാമിൽ നടന്നതായി പറയപ്പെടുന്ന സംഭവവുമായി ബന്ധപ്പെട്ട് മൂന്ന് കൊലപാതക ശ്രമങ്ങളാണ് പ്രതിക്കെതിരെ ചുമത്തിയിരിക്കുന്നത്. ജാമ്യാപേക്ഷ നല്‍കാത്തതിനാല്‍ ഇയാളെ റിമാന്‍ഡ് ചെയ്തതായാണ് അറിയാൻ കഴിയുന്നത്.
