ഇന്ത്യ-അഫ്ഗാൻ ബന്ധം ശക്തിപ്പെടുന്നു
ഡല്ഹി: അഫ്ഗാനിസ്ഥാനിലെ ഇന്ത്യൻ ടെക്നിക്കൽ മിഷനെ എംബസിയായി ഉയർത്തിയതായി കേന്ദ്ര സർക്കാർ സ്ഥിരീകരിച്ചു.
താലിബാൻ ഭരണകൂടവുമായി ധാരണയായതനുസരിച്ചാണ് ഈ നീക്കം. താലിബാൻ വിദേശകാര്യമന്ത്രി ആമിർ ഖാൻ മുത്തഖി ഒക്ടോബർ 9-ന് ഇന്ത്യ സന്ദർശിച്ചപ്പോൾ നടത്തിയ ചർച്ചയിലാണ് തീരുമാനം എടുത്തത്.
അന്ന് നൽകിയ വാക്കാണ് വിദേശകാര്യ മന്ത്രി എസ്. ജയശങ്കർ ഇപ്പോൾ പാലിച്ചത്.
താലിബാൻ മന്ത്രിയുടെ ഇന്ത്യാ സന്ദർശനം നിർണായകമായി
കാബൂളിൽ പ്രവർത്തിക്കുന്ന ടെക്നിക്കൽ മിഷനെ എംബസിയായി ഉയർത്താനുള്ള ധാരണ താലിബാൻ വിദേശകാര്യമന്ത്രിയുടെ ഇന്ത്യാ സന്ദർശനത്തിൽ നടപ്പാക്കിയിരുന്നു.
ഇന്ത്യ-അഫ്ഗാൻ ബന്ധം പുനരുജ്ജീവിപ്പിക്കുന്നതിനും, താലിബാൻ ഭരണകൂടവുമായി സജീവ ബന്ധം നിലനിർത്തുന്നതിനുമുള്ള പ്രധാന പടിയായി ഇത് കണക്കാക്കുന്നു.
2021-ൽ അടഞ്ഞ എംബസി വീണ്ടും തുറന്നു
2021 ഓഗസ്റ്റിൽ താലിബാൻ അധികാരം പിടിച്ചെടുക്കുമ്പോൾ അടച്ചുപൂട്ടിയ എംബസിയാണ് ഇപ്പോൾ വീണ്ടും തുറന്നത്.
പിന്നീട് 2022-ൽ ഇന്ത്യ കാബൂളിൽ ടെക്നിക്കൽ മിഷൻ സ്ഥാപിച്ചു. ഇപ്പോൾ അതിനാണ് ഔദ്യോഗികമായി എംബസി പദവി നൽകിയിരിക്കുന്നത്.
അഫ്ഗാനിസ്ഥാനിലെ സമഗ്ര വികസനത്തിൽ ഇന്ത്യയുടെ സംഭാവന കൂടുതൽ വർധിക്കുമെന്നാണ് വിദേശകാര്യ മന്ത്രാലയം വ്യക്തമാക്കിയത്.
ഉഭയകക്ഷി സഹകരണത്തിന് പുതിയ വഴികൾ
മുത്തഖിയുടെ ഒക്ടോബർ 9 മുതൽ 16 വരെയുള്ള ഇന്ത്യാ സന്ദർശനത്തിൽ, ഇരു രാജ്യങ്ങൾക്കുമിടയിൽ വിമാന സർവീസുകൾ വർധിപ്പിക്കുന്നതിലും ഖനന മേഖലയിൽ ഇന്ത്യക്ക് കൂടുതൽ അവസരങ്ങൾ നൽകുന്നതിനിലും ധാരണയായി.
ഭൂകമ്പ സഹായ പ്രവർത്തനങ്ങളിൽ ഇന്ത്യയുടെ വേഗതയേറിയ ഇടപെടലും അഫ്ഗാൻ-ഇന്ത്യ ബന്ധം ശക്തിപ്പെടുത്തുന്നതിന് സഹായകമായി.
താലിബാൻ ഭരണകൂടത്തിന് പ്രതീകാത്മക നേട്ടം
ഇന്ത്യൻ എംബസി പുനഃസ്ഥാപിച്ച തീരുമാനം, അന്താരാഷ്ട്ര അംഗീകാരത്തിനായുള്ള താലിബാന്റെ ശ്രമങ്ങൾക്ക് ശക്തിയേകുന്നതായാണ് വിദേശമാധ്യമങ്ങൾ വിലയിരുത്തുന്നത്.
താലിബാന്റെ അധികാരകാലത്ത് ഇത്രയും ഉയർന്നതലത്തിലെ ബന്ധം ആദ്യമായാണ് ഇന്ത്യയുമായുണ്ടാകുന്നത്.
English Summary:
India has officially upgraded its Technical Mission in Kabul to a full-fledged Embassy, honoring a promise made by External Affairs Minister S. Jaishankar to Taliban Foreign Minister Amir Khan Muttaqi during his visit to India on October 9. This marks the reopening of the Indian Embassy that was shut down after the Taliban took control in 2021. The move aims to strengthen bilateral relations, enhance development cooperation, and expand India’s role in Afghanistan’s reconstruction, including aviation and mining collaborations. India’s Ministry of External Affairs stated that the reopened embassy will play a key role in supporting Afghanistan’s overall development.
