ഒന്നും രണ്ടും അല്ല, ക്രൂഡ് ഓയിൽ വില കുറഞ്ഞത് 12 ശതമാനം; പെട്രോൾ ഡീസൽ വില കുറക്കാതെ കൊള്ളലാഭം കൊയ്ത് എണ്ണ കമ്പനികൾ
രാജ്യത്ത് ഇറക്കുമതി ചെയ്യുന്ന ക്രൂഡ് ഓയിലിന്റെ ആകെ ചെലവിൽ കഴിഞ്ഞ ആറു മാസത്തിനിടെ 12 ശതമാനത്തിന്റെ കുറവുണ്ടായതായി റിപ്പോർട്ട്.
ഇതേ കാലയളവിൽ അസംസ്കൃത എണ്ണയുടെ ഇറക്കുമതി അളവ് 2.4 ശതമാനം വർധിച്ചിട്ടുണ്ടെങ്കിലും, അന്താരാഷ്ട്ര വിപണിയിലെ വില ഇടിവാണ് ചെലവ് കുത്തനെ കുറയാൻ കാരണമായത്.
ഇന്ത്യയ്ക്ക് ആവശ്യമായ ക്രൂഡ് ഓയിലിന്റെ 86 ശതമാനവും വിദേശരാജ്യങ്ങളിൽ നിന്നാണ് ഇറക്കുമതി ചെയ്യുന്നത്. നിലവിൽ ഇതിൽ ഏകദേശം 40 ശതമാനവും റഷ്യയിൽ നിന്നാണ് എത്തുന്നത്.
എന്നാൽ, അമേരിക്കൻ ഉപരോധങ്ങൾ ശക്തമായ പശ്ചാത്തലത്തിൽ ഗൾഫ് രാജ്യങ്ങളിലേക്കും യൂറോപ്യൻ വിപണികളിലേക്കും ഇറക്കുമതി വൈവിധ്യമാക്കാനുള്ള നീക്കത്തിലാണ് ഇന്ത്യ.
അസംസ്കൃത എണ്ണയ്ക്ക് പുറമെ പെട്രോളിയം ഉൽപ്പന്നങ്ങളുടെ ഇറക്കുമതി ചെലവിൽ 7.5 ശതമാനവും പ്രകൃതി വാതകത്തിന് 11.5 ശതമാനവും കുറവുണ്ടായിട്ടുണ്ട്.
ഇതോടെ എണ്ണ കമ്പനികൾക്ക് വലിയ സാമ്പത്തിക നേട്ടമാണ് ലഭിച്ചത്.
എന്നാൽ, ഈ ചെലവുകുറവ് പെട്രോൾ–ഡീസൽ വിലയിൽ പ്രതിഫലിപ്പിക്കാൻ എണ്ണ കമ്പനികളും കേന്ദ്ര സർക്കാരും തയ്യാറാകുന്നില്ലെന്നതാണ് പ്രധാന വിമർശനം.
കഴിഞ്ഞ വർഷം പൊതുതെരഞ്ഞെടുപ്പിന് മുന്നോടിയായി മാർച്ച് 2024-ലാണ് അവസാനമായി വില കുറച്ചത്.
അന്ന് ഡൽഹിയിൽ ഒരു ലിറ്റർ പെട്രോളിന് 94 രൂപയും ഡീസലിന് 87 രൂപയുമായിരുന്നു വില. ഇന്നും ഇതേ നിരക്കുകളാണ് തുടരുന്നത്.
കേന്ദ്ര സർക്കാർ കഴിഞ്ഞ വർഷം എക്സൈസ് തീരുവയിൽ കുറവ് വരുത്തിയെങ്കിലും, ദൈനംദിന വില നിശ്ചയിക്കുന്നതിൽ എണ്ണ കമ്പനികൾക്കാണ് സ്വാതന്ത്ര്യം.
അന്താരാഷ്ട്ര വിപണിയിൽ വില കുറഞ്ഞിട്ടും, ഇറക്കുമതി ചെലവ് കുറഞ്ഞിട്ടും ഉപഭോക്താക്കൾക്ക് ആനുകൂല്യം കൈമാറാൻ തയ്യാറാകാത്ത എണ്ണ കമ്പനികൾക്കെതിരെ നടപടിയെടുക്കാൻ കേന്ദ്ര സർക്കാർ തയ്യാറാകുന്നില്ലെന്ന വിമർശനവും ശക്തമാകുന്നു.
English Summary
India’s crude oil import bill has fallen by 12% over the past six months, even as import volumes rose by 2.4%, mainly due to a drop in global crude prices. While oil companies have benefited significantly from reduced import costs—along with lower prices for petroleum products and natural gas—these gains have not been passed on to consumers. Petrol and diesel prices remain unchanged since March 2024, drawing criticism that oil companies and the central government are reluctant to reduce fuel prices despite favorable market conditions.
india-crude-oil-import-cost-drop-fuel-price-unchanged
crude oil, fuel price, petrol diesel, oil import, Indian economy, international market, petroleum companies, inflation
