തിരുവനന്തപുരം: കേരളത്തിൽ ഇന്ന് 11 ജില്ലകളിൽ ഉയർന്ന താപനില രേഖപ്പെടുത്തും. കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, കണ്ണൂർ, കാസർകോട് ജില്ലകളിൽ യെല്ലോ അലേർട്ടാണ്.
തൃശൂർ, പാലക്കാട് ജില്ലകളിൽ ഉയർന്ന താപനില 38 ഡിഗ്രി വരെയായേക്കും. കൊല്ലം, പത്തനംതിട്ട, കോട്ടയം, എറണാകുളം, കോഴിക്കോട്, കണ്ണൂർ, കാസർകോട് ജില്ലകളിൽ ഉയർന്ന താപനില 37 ഡിഗ്രി വരെയും, ആലപ്പുഴ, മലപ്പുറം ജില്ലകളിൽ ഉയർന്ന താപനില 36 ഡിഗ്രി വരെയും ഉയരുമെന്നാണ് മുന്നറിയിപ്പ്. രണ്ടു മുതൽ മൂന്ന് ഡിഗ്രി വരെയാണ് സാധാരണയേക്കാൾ താപനില കൂടുന്നതെന്ന് റിപ്പോർട്ടിൽ പറയുന്നു. ഇവിടങ്ങളിൽ സൂര്യാഘാത സാദ്ധ്യതയുമുണ്ട്.
അതേസമയം സംസ്ഥാനത്ത് കഴിഞ്ഞ 24 മണിക്കൂറിൽ രേഖപ്പെടുത്തിയത് ഉയർന്ന അൾട്രാവയലറ്റ് സൂചികയാണ്. കൊല്ലം കൊട്ടാരക്കരയിലാണ് സംസ്ഥാനത്തെ ഏറ്റവും കൂടുതൽ സൂചിക രേഖപ്പെടുത്തിയത്.
