തിരുവനന്തപുരം: സംസ്ഥാനത്ത് ഇന്നും ഒറ്റപ്പെട്ട ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ഒറ്റപ്പെട്ടയിടങ്ങളില് ഇടിമിന്നലോട് കൂടിയ മഴയ്ക്കും മണിക്കൂറില് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി.
നഗരം പൂരാവേശത്തിൽ മുഴുകവേ തൃശൂരിൽ ശക്തമായ മഴയാണ് അനുഭവപ്പെടുന്നത്. പുലര്ച്ചെ തുടങ്ങിയ മഴ ശക്തമായി തുടരുകയാണ്. പൂരം ദിനത്തില് മുന്കാലങ്ങളില് മഴ പെയ്യാറുണ്ടെങ്കിലും മഴ മാറാതെ നില്ക്കുന്നത് ആശങ്ക വർധിപ്പിക്കുന്നുണ്ട്.
അതേസമയം കേരള തീരത്ത് കള്ളക്കടൽ പ്രതിഭാസത്തിനും കടലാക്രമണത്തിനും സാധ്യതയുണ്ടെന്നും ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. ചൊവ്വാഴ്ച തിരുവനന്തപുരം (കാപ്പില് മുതല് പൂവാര് വരെ) തീരങ്ങളില് രാവിലെ 5.30 മുതല് രാത്രി 11.30 വരെയും ആലപ്പുഴ (ചെല്ലാനം മുതല് അഴീക്കല് ജെട്ടി വരെ),
തൃശൂര് (ആറ്റുപുറം മുതല് കൊടുങ്ങല്ലൂര് വരെ), എറണാകുളം (മുനമ്പം FH മുതല് മറുവക്കാട് വരെ) തീരങ്ങളില് രാവിലെ 8.30 മുതല് രാത്രി 11.30 വരെയും, കള്ളക്കടല് പ്രതിഭാസത്തിന്റെ ഭാഗമായി, 0.3 മുതല് 0.9 മീറ്റര് വരെ ഉയര്ന്ന തിരമാലകള് കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രത്തിന്റെ അറിയിപ്പിൽ പറയുന്നു.
കന്യാകുമാരി തീരത്ത് ചൊവ്വാഴ്ച പുലര്ച്ചെ 2.30 മുതല് രാത്രി 11.30 വരെ കള്ളക്കടല് പ്രതിഭാസത്തിന്റെ ഭാഗമായി 0.7 മുതല് 1.1 മീറ്റര് വരെ ഉയര്ന്ന തിരമാലകള് കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. കടലാക്രമണത്തിന് സാധ്യതയുള്ളതിനാല് മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണം.
