മോസ്‌കോ: റഷ്യയിലെ സ്‌കോഫ് വിമാനത്താവളത്തില്‍ കനത്ത ഡ്രോണ്‍ ആക്രമണം നടത്തി യുക്രെയ്ന്‍. നാല് വിമാനങ്ങള്‍ തകര്‍ന്നതായും രണ്ട് വിമാനങ്ങള്‍ കത്തിനശിച്ചതായുമാണ് റിപ്പോര്‍ട്ട്. ഉക്രെയ്‌നിന്റെ അതിര്‍ത്തിയില്‍ നിന്ന് ഏകദേശം 800 കിലോമീറ്റര്‍ അകലെയാണ് സ്‌കാഫ്. യൂറോപ്യന്‍ യൂണിയന്‍ അംഗരാജ്യങ്ങളായ ലാത്വിയയുടെയും എസ്‌തോണിയയുടെയും അതിര്‍ത്തിയോട് ചേര്‍ന്നാണ് സ്‌കോഫ്. ഇതിനിടെ റഷ്യയിലെ ബ്രയാന്‍സ്‌ക്, ടുല മേഖലകളിലും സ്‌ഫോടനങ്ങള്‍ നടന്നതായി അന്വേഷണാത്മക വാര്‍ത്താ ഏജന്‍സിയായ ബെല്ലിംഗ്കാറ്റ് റിപ്പോര്‍ട്ട് ചെയ്യുന്നുണ്ട്.
ഇതിനിടെ ഡ്രോണ്‍ ആക്രമണത്തെ പ്രതിരോധിച്ചതായാണ് റഷ്യയുടെ അവകാശവാദം. ആക്രമണത്തില്‍ ആളപായമില്ലെന്നും റഷ്യ വ്യക്തമാക്കിയിട്ടുണ്ട്. തെക്കന്‍ മേഖലയായ ബ്രയാന്‍സ്‌കില്‍ മൂന്ന് യുക്രെയ്ന്‍ ഡ്രോണുകളും മധ്യമേഖലയായ ഓറിയോളില്‍ ഒരു ഡ്രോണും വീഴ്ത്തിയാതായി റഷ്യന്‍ സൈന്യം അവകാശപ്പെട്ടതായും അന്തര്‍ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.
മോസ്‌കോ സമയം അര്‍ദ്ധരാത്രിയോടെ കരിങ്കടലില്‍ നടത്തിയ ഓപ്പറേഷനില്‍ 50 സൈനികരെ വരെ വഹിക്കാവുന്ന നാല് അതിവേഗ യുക്രെനിയന്‍ കപ്പലുകള്‍ നശിപ്പിച്ചതായി റഷ്യയുടെ സൈന്യം നേരത്തെ അവകാശപ്പെട്ടിരുന്നു. എന്നാല്‍ റഷ്യയുടെ ഈ അവകാശവാദത്തോട് യുക്രെയ്ന്‍ പ്രതികരിച്ചില്ല.
നേരത്തെ മെയ് അവസാനവും ഡ്രോണുകള്‍ സ്‌കോഫിനെ ലക്ഷ്യം വച്ചിരുന്നു. ഈ വേനല്‍ക്കാലത്ത് റഷ്യയിലേക്ക് സംഘര്‍ഷം ‘തിരിച്ചുവിടുമെന്ന്’ യുക്രെയ്ന്‍ നേരത്തെ തീരുമാനിച്ചിരുന്നു. ഇതിന് ശേഷം മോസ്‌കോയിലും മറ്റ് റഷ്യന്‍ പ്രദേശങ്ങളിലും യുക്രെയ്ന്‍ ഡ്രോണ്‍ ആക്രമണം നടത്തിയിരുന്നു.
