കൊച്ചി: അതീവ സുരക്ഷാ മേഖലയായ വല്ലാർപാടം രാജ്യാന്തര കണ്ടെയ്‌നർ ട്രാൻസ്ഷിപ്പ്‌മെന്റ് ടെർമിനലിൽ അതിക്രമിച്ച് കയറിയ 26കാരനായ റഷ്യൻ പൗരൻ അറസ്റ്റിൽ. ഗോശ്രീ പാലം കാണാൻ ഗൂഗിൾ മാപ്പിന്റെ സഹായം തേടി വഴിതെറ്റുകയായിരുന്നുവെന്നാണ് റഷ്യൻ പൗരൻ മൊഴി നൽകിയത്. ഗൂഗിൾ മാപ്പിൽ നോക്കിയപ്പോൾ രാജ്യാന്തര കണ്ടെയ്‌നർ ട്രാൻസ്ഷിപ്പ്‌മെന്റ് ടെർമിനൽ മതിലിന്റെ മറുവശത്തായാണ് ഗോശ്രീ പാലം കാണിച്ചിരുന്നത്. ഈ പാലം കാണാൻ വേണ്ടിയാണ് മതിൽ ചാടിക്കടന്നതെന്നും റഷ്യൻ പൗരൻ ഇലിയ എകിമോവ് പറഞ്ഞതായും പൊലീസ് പറയുന്നു.

ഇന്നലെ പുലർച്ചെ 6.30നാണ് സംഭവം. ഡിപി വേൾഡിന് നടത്തിപ്പ് ചുമതലയുള്ള രാജ്യാന്തര കണ്ടെയ്‌നർ ട്രാൻസ്ഷിപ്പ്‌മെന്റ് ടെർമിനലിന്റെ അതീവ സുരക്ഷാമേഖലയിൽ കിഴക്കുവശത്തുള്ള മതിൽ ചാടിക്കടന്നാണ് 26കാരനായ റഷ്യൻ പൗരൻ ടെർമിനലിൽ പ്രവേശിച്ചത്. ഉടൻ തന്നെ സുരക്ഷാ ഉദ്യോഗസ്ഥർ റഷ്യൻ പൗരനെ തടയുകയായിരുന്നു. പാസ്‌പോർട്ട് പരിശോധിച്ചപ്പോൾ കഴിഞ്ഞവർഷം വിസയുടെ കാലാവധി അവസാനിച്ചതായി കണ്ടെത്തി. തുടർന്ന് ഇലിയ എകിമോവിനെ പൊലീസിന് കൈമാറി.

2022ലാണ് റഷ്യൻ പൗരനായ ഇലിയ എകിമോവ് ഇന്ത്യയിൽ എത്തിയത്. ഒരു വർഷ വിസയാണ് ഇയാൾക്ക് അനുവദിച്ചിരുന്നത്. ഗോവയിൽ ജോലി ചെയ്തിരുന്ന റഷ്യൻ പൗരൻ വിസ പുതുക്കിയിരുന്നില്ല. തുടർന്ന് നിയമവിരുദ്ധമായി ഇന്ത്യയിൽ താമസിച്ച് വരികയായിരുന്നു. ഇലിയ എകിമോവ് രണ്ടുദിവസം മുൻപാണ് കൊച്ചിയിൽ എത്തിയതെന്നും പൊലീസ് പറയുന്നു.

വിവിധ വകുപ്പുകൾ ചേർത്ത് റഷ്യൻ പൗരനെതിരെ മുളവുകാട് പൊലീസ് കേസ് രജിസ്റ്റർ ചെയ്തു. ഗോശ്രീ പാലം കാണാനായി പ്രഭാത സവാരിക്ക് ഇറങ്ങിയതാണെന്നാണ് റഷ്യൻ പൗരൻ നൽകിയ മൊഴി. ഗൂഗിൾ മാപ്പിന്റെ സഹായത്തോടെ ഗോശ്രീ പാലം എവിടെയെന്ന് കണ്ടെത്താനുള്ള ശ്രമത്തിനിടെ വഴി തെറ്റുകയായിരുന്നുവെന്ന് ഇലിയ എകിമോവ് പറഞ്ഞതായും പൊലീസ് പറയുന്നു.

അന്വേഷണത്തിൽ ഇയാൾക്കെതിരെ സംസ്ഥാനത്ത് ക്രിമിനൽ കേസുകൾ ഒന്നുമില്ലെന്ന് കണ്ടെത്തി. കേന്ദ്ര, സംസ്ഥാന അന്വേഷണ ഏജൻസികളെല്ലാം റഷ്യൻ പൗരനെ ചോദ്യം ചെയ്തു. ഏതെങ്കിലും സംശയാസ്പദമായ പ്രവർത്തികളിൽ റഷ്യൻ പൗരൻ ഏർപ്പെട്ടിട്ടില്ലെന്നും കണ്ടെത്തി. കോടതിയിൽ ഹാജരാക്കിയ ശേഷം ഇലിയ എകിമോവിനെ റഷ്യയിലേക്ക് നാടുകടത്താനുള്ള നടപടികൾ കേന്ദ്രസർക്കാർ ആരംഭിക്കുമെന്നാണ് റിപ്പോർട്ടുകൾ.

Read Also: 50 വർഷത്തെ കാത്തിരിപ്പിനൊടുവിൽ താംബരം-കൊച്ചുവേളി സ്പെഷ്യൽ ട്രെയിൻ നാളെ മുതൽ; കൊല്ലം- ചെങ്കോട്ട പാതയിലൂടെയുള്ള യാത്രയുടെ സവിശേഷതകളറിയാം