കൊച്ചി: സംസ്ഥാനത്ത് തുടർച്ചയായ രണ്ടാം ദിവസവും സ്വർണ വില കുറഞ്ഞു. ഒരു പവൻ സ്വർണത്തിന് 320 രൂപയാണ് ഇന്ന് കുറഞ്ഞത്. ഇതോടെ ഒരു പവൻ സ്വർണത്തിന്റെ വില 65,840 രൂപയിലെത്തി. ഗ്രാമിന് 40 രൂപയും കുറഞ്ഞ് 8,230 രൂപയാണ് ഇന്നത്തെ വില. തുടർച്ചയായ കുതിപ്പിനിടെയാണ് സ്വർണത്തിന് നേരിയ വിലകുറവുണ്ടായത്.
ഇന്നലെയും സംസ്ഥാനത്ത് സ്വർണ്ണ വില കുറഞ്ഞിരുന്നു. പവന് 320 രൂപയും, ഗ്രാമിന് 40 രൂപയുമാണ് ഇന്നലെ വില കുറഞ്ഞത്. മാർച്ച് 20ാം തിയ്യതിയാണ് സംസ്ഥാനത്തെ സ്വർണ്ണ വില ചരിത്രത്തിലെ സർവ്വകാല ഉയരം കുറിച്ചത്. ഒരു പവൻ സ്വർണ്ണത്തിന് 66,480 രൂപയും, ഗ്രാമിന് 8,310 രൂപയുമായിരുന്നു അന്നത്തെ റെക്കോർഡ് വില.
അതേസമയം സംസ്ഥാനത്തെ വെള്ളി വിലയും ഇന്ന് കുറഞ്ഞു. ഒരു കിലോ വെള്ളിക്ക് 100 രൂപ താഴ്ന്ന് 1,11,900 രൂപയാണ് ഇന്നത്തെ വില. ഒരു ഗ്രാം വെള്ളിക്ക് 111.90 രൂപ, 8 ഗ്രാമിന് 895.20 രൂപ, 10 ഗ്രാമിന് 1,119 രൂപ, 100 ഗ്രാമിന് 11,190 രൂപ എന്നിങ്ങനെയാണ് വില.
ആഗോള വിപണിയിൽ സംഭവിക്കുന്ന ചെറിയ ചലനങ്ങൾ പോലും അടിസ്ഥാനപരമായി ഇന്ത്യയിലെ സ്വർണവിലയിൽ പ്രതിഫലിക്കും. അതേസമയം, രാജ്യാന്തര വിപണിയിൽ സ്വർണത്തിന് വില കുറഞ്ഞാൽ ഇന്ത്യയിൽ വില കുറയണമെന്ന് നിർബന്ധമില്ല. രൂപയുടെ മൂല്യം, പ്രാദേശികമായ ആവശ്യകത, ഇറക്കുമതി തീരുവ എന്നീ ഘടകങ്ങൾ ഇന്ത്യയിലെ സ്വർണവില നിശ്ചയിക്കുന്ന ഘടകങ്ങളാണ്.
