ഗംഭീറിനെ റാഞ്ചാൻ രാജസ്ഥാൻ റോയൽസ്; ഓഫർ വെറും മെന്റർ പദവിയല്ല
ഐപിഎൽ ഫ്രാഞ്ചൈസി രാജസ്ഥാൻ റോയൽസ് മുൻ ഇന്ത്യൻ താരം ഗൗതം ഗംഭീറിന് വമ്പൻ ഓഫർ നൽകാൻ ഒരുങ്ങുന്നതായി റിപ്പോർട്ട്.
ടീമിന്റെ സിഇഒ, മെന്റർ, പാർട്ണർ എന്നീ നിലകളിലേക്കാണ് ഗംഭീറിനെ പരിഗണിക്കുന്നത്. നിലവിൽ 2024 ജൂലൈ മുതൽ ഇന്ത്യൻ ക്രിക്കറ്റ് ടീമിന്റെ പരിശീലകനായ ഗംഭീറിന് 2027 ഏകദിന ലോകകപ്പ് വരെ ബിസിസിഐയുമായി കരാറുണ്ട്.
പുതിയ മാനേജ്മെന്റിന്റെ നേതൃത്വത്തിൽ രാജസ്ഥാൻ റോയൽസ് പുനഃസംഘടന നടപടികളിലാണ്.
ഗംഭീറിനെ ടീമിലേക്ക് ആകർഷിക്കാൻ ഫ്രാഞ്ചൈസിയുടെ 2 മുതൽ 3 ശതമാനം വരെ ഓഹരി പങ്കാളിത്തം നൽകാൻ ഉടമകളിൽ ഒരാൾ തയ്യാറാണെന്നാണ് റിപ്പോർട്ടുകൾ.
ഐപിഎല്ലിൽ മികച്ച റെക്കോർഡുള്ള പരിശീലകനാണ് ഗംഭീർ. കൊൽക്കത്ത നൈറ്റ് റൈഡേഴ്സിന്റെ മെന്ററായിരിക്കെ രണ്ട് തവണ കിരീടം നേടിയ ടീമിനൊപ്പം പ്രവർത്തിച്ചിട്ടുണ്ട്.
ലഖ്നൗ സൂപ്പർ ജയന്റ്സിന്റെ മെന്ററായിരുന്ന രണ്ട് സീസണിലും ടീം പ്ലേഓഫിൽ എത്തുകയും ചെയ്തു.
എന്നാൽ ഗംഭീർ ഐപിഎല്ലിലേക്ക് മടങ്ങണമെങ്കിൽ ഇന്ത്യൻ ടീമിന്റെ പരിശീലക സ്ഥാനം രാജിവെക്കേണ്ടിവരും.
ലോഡ കമ്മിറ്റി നിർദേശത്തെ അടിസ്ഥാനമാക്കിയുള്ള സുപ്രീംകോടതി വിധി പ്രകാരം ദേശീയ ടീമിനൊപ്പം പ്രവർത്തിക്കുന്നവർക്ക് ഐപിഎൽ ടീമുകളിൽ സ്ഥാനമാനങ്ങൾ വഹിക്കാൻ അനുമതിയില്ല.
അതിനാൽ ഗംഭീർ നിലവിൽ ഇന്ത്യൻ ടീമിനൊപ്പമാവാൻ സാധ്യതയുണ്ടെന്നാണ് സൂചന.
ഇന്ത്യൻ–ബ്രിട്ടീഷ് വ്യവസായി മനോജ് ബാഡ്ലെയുടെ എമേർജിംഗ് മീഡിയയ്ക്ക് രാജസ്ഥാൻ റോയൽസിൽ 65 ശതമാനം ഓഹരി പങ്കാളിത്തമുണ്ട്.
റെഡ്ബേർഡ് ക്യാപിറ്റലും ലാച്ലൻ മർഡോക്കും ടീമിൽ പങ്കാളികളാണ്. പ്രധാന ഓഹരി ഉടമകളിൽ മാറ്റമുണ്ടാകാനിടയുള്ളതിനാൽ ഫ്രാഞ്ചൈസിയുടെ നേതൃത്വത്തിൽ പുതിയ മുഖങ്ങൾ എത്താനിടയുണ്ടെന്നാണ് വിവരം.
English Summary:
IPL franchise Rajasthan Royals is reportedly planning a major offer for Gautam Gambhir for roles such as CEO, mentor, and partner, possibly with a 2–3% stake. However, Gambhir, currently India’s head coach until the 2027 World Cup, would have to resign from his national role to join an IPL franchise due to Supreme Court rules. He is therefore likely to remain with Team India.
gautam-gambhir-rajasthan-royals-offer
Gautam Gambhir, Rajasthan Royals, IPL, BCCI, Indian Cricket Team, Cricket News, IPL Franchise, Sports News
