മാതാപിതാക്കളെ കാണാൻ ദുബായിലെത്തി; മടക്കം 45 കോടിയുമായി! നറുക്കെടുപ്പ് ലൈവ് കണ്ടപ്പോൾ ഷമോൺ പോലും ഞെട്ടിപ്പോയി!
അബുദാബി ബിഗ് ടിക്കറ്റിന്റെ 285-ാം സീരീസ് നറുക്കെടുപ്പിൽ മലയാളി യുവസംരംഭകനായ ഷമോൺ ഷാജിക്ക് കോടികളുടെ ഭാഗ്യം. 20 ദശലക്ഷം ദിർഹം (ഏകദേശം 45 കോടിയിലേറെ ഇന്ത്യൻ രൂപ) ഒന്നാം സമ്മാനമാണ് ഷമോണിനെ തേടിയെത്തിയത്.
ദുബായിൽ മാതാപിതാക്കളെ സന്ദർശിക്കാനെത്തിയിരിക്കെ, കുടുംബാംഗങ്ങളോടൊപ്പം യാത്ര ചെയ്യുന്നതിനിടെ മൊബൈൽ ഫോണിൽ തത്സമയ നറുക്കെടുപ്പ് കണ്ടപ്പോഴാണ് വിജയം അറിയുന്നത്. സ്ക്രീനിൽ തെളിഞ്ഞ നമ്പറുകൾ ഒത്തുനോക്കിയ നിമിഷം സന്തോഷത്തിൽ കുടുംബം ആർത്തുവിളിച്ചതായി ഭാര്യ പറഞ്ഞു.
ഭാര്യയോടൊപ്പം ബിസിനസ് നടത്തുന്ന 32കാരനായ ഷമോൺ കുറച്ച് മാസങ്ങൾ മുൻപാണ് ബിഗ് ടിക്കറ്റിൽ ഭാഗ്യം പരീക്ഷിക്കാൻ തുടങ്ങിയത്. ഈ വലിയ വിജയം ഉൾക്കൊള്ളാൻ കുറച്ച് സമയം വേണമെന്നും, ഭാവി പദ്ധതികളിൽ ഉടൻ തീരുമാനങ്ങളില്ലെന്നും കുടുംബം അറിയിച്ചു.
അതേസമയം, സൊമാലിയൻ സ്വദേശി അഹമ്മദ് മുഹമ്മദ് മസെരാട്ടി ഗ്രെക്കേൽ ആഡംബര കാർ സ്വന്തമാക്കി. 30 സഹപ്രവർത്തകരോടൊപ്പം ചേർന്നാണ് ടിക്കറ്റെടുത്തത്.
‘മില്യനയർമാരുടെ മാസം’ എന്ന പേരിൽ ഏപ്രിലിൽ ബിഗ് ടിക്കറ്റ് പ്രത്യേക പദ്ധതികൾ അവതരിപ്പിച്ചിട്ടുണ്ട്. മേയ് 3-ന് നടക്കുന്ന അടുത്ത നറുക്കെടുപ്പിൽ 25 ദശലക്ഷം ദിർഹമാണ് ഒന്നാം സമ്മാനം. കൂടാതെ മറ്റു ക്യാഷ് പ്രൈസുകളും ആഡംബര കാറുകളും നേടാനുള്ള അവസരവും ഒരുക്കിയിട്ടുണ്ട്.
English Summary
Malayali entrepreneur Shamon Shaji won AED 20 million (over ₹45 crore) in the Abu Dhabi Big Ticket draw (Series 285). He discovered the win while watching the live draw on his phone during a visit to Dubai with his family.
Shamon, who runs a business with his wife, had only recently started participating in the lottery. Meanwhile, Somali national Ahmed Mohammed won a Maserati Grecale car through a group ticket with colleagues. The Big Ticket also announced upcoming mega prizes as part of its “Month of Millionaires” campaign.
