ജോലിവാഗ്ദാനം ചെയ്ത് തട്ടിപ്പ്; അധ്യാപികയ്ക്ക് പിന്നിൽ കർണാടക കേന്ദ്രീകരിച്ച് പ്രവർത്തിക്കുന്ന സംഘമെന്ന് സൂചന

ജോലി വാഗ്ദാനംചെയ്ത് പണം തട്ടിയ കേസിൽ അധ്യാപിക അറസ്റ്റിലായി. പുത്തിഗെ ബാഡൂർ എ.എൽ.പി. സ്‌കൂൾ അധ്യാപിക ഷേണി സ്വദേശിനി സചിതാ റൈയെ (27) ആണ് അറസ്റ്റ് ചെയ്തത്. വ്യാഴാഴ്ച വൈകിട്ടോടെ കാസർകോട് കോടതി പരിസരത്തുനിന്ന് ആണ് ഇവർ പിടിയിലായത്. സചിതാ റൈയെ സസ്പെൻഡ് ചെയ്യാൻ സ്കൂൾ മാനേജർ നിർദേശിച്ചു. കുമ്പള സിപിഎം ഏരിയാ കമ്മറ്റി പ്രാഥമികാംഗത്വത്തിൽ നിന്നും നേരത്തെ ഇവരെ പുറത്താക്കിയിരുന്നു.

കൈക്കുഞ്ഞിനെയുമെടുത്ത് കോടതിവളപ്പിൽ കാറിലിരിക്കുകയായിരുന്നു സചിത. മുൻകൂർ ജാമ്യാപേക്ഷ തള്ളിയ സാഹചര്യത്തിൽ കോടതിയിൽ കീഴടങ്ങുകയെന്ന ഉദ്ദേശ്യത്തോടെയെത്തിയതാണെന്ന് കരുതുന്നു. ഇതിനിടെയാണ് ഡിവൈ.എസ്.പി. സി.കെ.സുനിൽകുമാറിന്റെ നിർദേശപ്രകാരം പ്രത്യേക അന്വേഷണ സംഘത്തിലെ വിദ്യാനഗർ ഇൻസ്‌പെക്ടർ യു.പി.വിപിന്റെ നേതൃത്വത്തിൽ സചിതയെ കസ്റ്റഡിയിലെടുത്തത്. വിദ്യാനഗർ പോലീസ് സ്റ്റേഷനിലെത്തിച്ച് നടപടി പൂർത്തിയാക്കുന്നതിനിടെ കുമ്പള ഇൻസ്‌പെക്ടർ കെ.പി.വിനോദ് കുമാറും സംഘവും സ്ഥലത്തെത്തി. സചിതാ റൈയെ കുമ്പളയിലെത്തിച്ചാണ് അറസ്റ്റ് രേഖപ്പെടുത്തിയത്.

ബദിയടുക്ക, കുമ്പള, മഞ്ചേശ്വരം, ആദൂർ, മേൽപ്പറമ്പ് പോലീസ് സ്റ്റേഷൻ പരിധികളിലും ദക്ഷിണ കന്നഡ ജില്ലയിലെ ഉപ്പിനങ്ങടി പോലീസ് സ്റ്റേഷനിലുമായി 11-ഓളം വഞ്ചനക്കേസുകളാണ് സചിതയ്‌ക്കെതിരെ രജിസ്റ്റർ ചെയ്തിട്ടുള്ളത്. അതേസമയം പണം കൈമാറിയ കർണാടകയിലെ സംഘം 78 ലക്ഷത്തിന്റെ ചെക്ക് തനിക്ക് നൽകിയതായി സചിത പോലീസിന് മൊഴി നൽകിയിട്ടുണ്ട്.

സി.പി.സി.ആർ.ഐ., കേന്ദ്രീയ വിദ്യാലയം, കർണാടക എക്‌സൈസ് വകുപ്പ്, കേന്ദ്ര തോട്ടവിള ഗവേഷണകേന്ദ്രം, തുടങ്ങിയ സ്ഥാപനങ്ങളിൽ ജോലി വാഗ്ദാനം ചെയ്തായിരുന്നു ലക്ഷങ്ങളുടെ തട്ടിപ്പ് നടത്തിയത്. സുഹൃത്തുക്കളിൽനിന്നും അടുത്ത പരിചയക്കാരിൽനിന്നുമായിരുന്നു പണം വാങ്ങിയത്.

അധ്യാപികയ്ക്ക് പിന്നിൽ കർണാടക കേന്ദ്രീകരിച്ച് പ്രവർത്തിക്കുന്ന സംഘമെന്ന് സൂചന. അധ്യാപക സംഘടനാനേതാവായ സചിത റൈ ഇടനിലക്കാരിയായാണ് പ്രവർത്തിച്ചത്.

പുത്തിഗെ, കിദുർ, ബാഡൂർ എന്നിവിടങ്ങളിൽനിന്നായി 16 പേരിൽനിന്ന് സജിതാ റൈ ലക്ഷങ്ങൾ വാങ്ങിയിട്ടുണ്ടെന്നാണ് സൂചന. അധ്യാപികയായതിനാലും സംഘടനാ, രാഷ്ട്രീയാ രംഗത്തെ നേതാവെന്ന വിശ്വാസവും കൊണ്ടാണ് പലരും പണം കൈമാറിയത്. പലരിൽനിന്നായി വാങ്ങിയ തുക അധ്യാപിക കർണാടകയിലെ സംഘത്തിന് കൈമാറുകയായിരുന്നുവെന്ന് പോലീസ് പറഞ്ഞു.

മിക്ക ഇടപാടുകളും നടത്തിയിട്ടുള്ളത് അധ്യാപികയുടെ ബാങ്ക് അക്കൗണ്ട് മുഖേനയാണ്. സംഭവം വിവാദമായതോടെ പുത്തിഗെയിലെ ചില രാഷ്ട്രീയനേതാക്കൾ കർണാടകസംഘവുമായി മംഗളൂരുവിലെത്തി സംസാരിച്ചിരുന്നു. കൂടുതൽ പേർ പരാതിയുമായി രംഗത്തുവരുന്നത് തടയാനും ശ്രമം നടന്നിരുന്നു.

ജോലി വാഗ്ദാനംചെയ്ത് പണം തട്ടിയെടുത്ത കേസിൽ പ്രതിചേർക്കപ്പെട്ട സചിത റൈയെ പാർട്ടിവിരുദ്ധ പ്രവർത്തനം നടത്തിയതിന്റെ പേരിൽ പ്രാഥമിക അംഗത്വത്തിൽനിന്ന് പുറത്താക്കിയതായി സി.പി.എം. കുമ്പള ഏരിയാ കമ്മിറ്റി നേരത്തേ അറിയിച്ചിരുന്നു.
വിഷയത്തിൽ സി.പി.എമ്മുമായി ബന്ധപ്പെടുത്തുന്നത് വസ്തുതാവിരുദ്ധമാണെന്നും കേസിൽ സമഗ്രാന്വേഷണം നടത്തി കുറ്റക്കാർക്കെതിരേ നടപടികൾ സ്വീകരിക്കണമെന്നും ഈ വിഷയത്തിൽ ഏരിയ കമ്മിറ്റി ആവശ്യപ്പെട്ടിരുന്നു. ജോലിയും പണവും കിട്ടാതെ വന്നപ്പോൾ കിദൂരിലെ നിഷ്മിത ഷെട്ടിയാണ് പരാതിയുമായി ആദ്യം രംഗത്തുവന്നത്. പിന്നീട് സമാന പരാതികളുമായി പത്തോളം പേരും വിവിധ പോലീസ് സ്റ്റേഷനുകളിലെത്തി. പിന്നാലെ സചിതയെ അറസ്റ്റു ചെയ്യുകയായിരുന്നു.

English summary: Fraud by offering employment; It is hinted that there is a gang working in Karnataka behind the teacher