ഇറാൻ–യുഎസ് സംഘർഷം: തടസപ്പെട്ട വിമാന സർവീസുകൾ പുനരാരംഭിച്ചു; കൊച്ചി–മസ്കത്ത് ഫ്ലൈറ്റുകൾ തുടങ്ങി

ന്യൂഡൽഹി: പശ്ചിമേഷ്യയിലെ ഇറാൻ–യുഎസ് സംഘർഷം മൂലം തടസപ്പെട്ട വിമാന സർവീസുകൾ ഭാഗികമായി പുനരാരംഭിച്ചു. കേരളത്തിൽ നിന്ന് ഗൾഫ് രാജ്യങ്ങളിലേക്കുള്ള യാത്രക്കാർക്ക് ആശ്വാസമായി കൊച്ചി–മസ്കത്ത് സർവീസുകൾ വീണ്ടും ആരംഭിച്ചു.

ഒമാൻ എയർ, എയർ ഇന്ത്യ എക്സ്പ്രസ് വിമാനങ്ങളാണ് ഇന്ന് രാവിലെ മുതൽ കൊച്ചിയിൽ നിന്ന് മസ്കത്തിലേക്കുള്ള സർവീസുകൾ പുനരാരംഭിച്ചത്. സംഘർഷത്തെ തുടർന്ന് വിവിധ രാജ്യങ്ങളിൽ കുടുങ്ങിക്കിടന്ന യാത്രക്കാരെ തിരിച്ചെത്തിക്കാനായി പ്രത്യേക സർവീസുകളും ആരംഭിച്ചിട്ടുണ്ട്.

ചില ഗൾഫ് സർവീസുകൾ ഇപ്പോഴും നിർത്തിവച്ചു

എയർ ഇന്ത്യയുടെ അറിയിപ്പുപ്രകാരം യുഎഇ, സൗദി അറേബ്യ, ഇസ്രയേൽ, ഖത്തർ എന്നിവിടങ്ങളിലേക്കുള്ള ഭൂരിഭാഗം സർവീസുകളും മാർച്ച് 4 അർധരാത്രിവരെ നിർത്തിവച്ചിരിക്കും. എന്നാൽ കുടുങ്ങിയ യാത്രക്കാരെ തിരിച്ചെത്തിക്കാൻ സ്പെഷ്യൽ ഫ്ലൈറ്റുകൾ തുടരും.

മസ്കത്തിലേക്കുള്ള അധിക സർവീസുകൾ

എയർ ഇന്ത്യ എക്സ്പ്രസ് അറിയിച്ചതനുസരിച്ച് ഡൽഹി, കൊച്ചി, കോഴിക്കോട്, മംഗളൂരു, മുംബൈ, തിരുച്ചിറപ്പള്ളി എന്നിവിടങ്ങളിൽ നിന്നുള്ള പതിവു സർവീസുകൾക്കൊപ്പം ഡൽഹി, കൊച്ചി, മുംബൈ എന്നിവിടങ്ങളിലേക്ക് അധിക സർവീസുകളും നടത്തും.

വലിയ വിമാനങ്ങൾ വിന്യസിച്ച് എയർ ഇന്ത്യ

യാത്രക്കാരുടെ തിരക്ക് പരിഗണിച്ച് ജിദ്ദയിലേക്കും ദുബായിലേക്കുമുള്ള സർവീസുകൾക്കായി വലിയ വിമാനങ്ങൾ വിന്യസിക്കാൻ എയർ ഇന്ത്യ തീരുമാനിച്ചു.

മുംബൈ – ജിദ്ദ റൂട്ടിൽ 350 സീറ്റുകളുള്ള ബോയിങ് 777
ഡൽഹി – ദുബായ് റൂട്ടിൽ ഏകദേശം 300 സീറ്റുകളുള്ള ബോയിങ് 787-9
മുംബൈ – ദുബായ് റൂട്ടിൽ 250 സീറ്റുകളുള്ള ബോയിങ് 787-8

മറ്റ് വിമാനക്കമ്പനികളും സർവീസ് തുടങ്ങി

സ്പൈസ്‌ജെറ്റ് – ഫുജൈറയിൽ നിന്ന് കൊച്ചി, ഡൽഹി, മുംബൈ
എയർ അറേബ്യ – ഷാർജയിൽ നിന്ന് ഇന്ത്യയിലേക്ക്
ഇൻഡിഗോ – 10 പ്രത്യേക സർവീസുകൾ
എമിറേറ്റ്സ്, എത്തിഹാദ് – ഡൽഹി, ചെന്നൈ, ബെംഗളൂരു, മുംബൈ, ഹൈദരാബാദ് എന്നിവിടങ്ങളിലേക്ക് പരിമിത സർവീസുകൾ

ചില സർവീസുകൾ ഇപ്പോഴും നിർത്തിവെച്ചിട്ടുണ്ട്

ഇത്തിഹാദ് – അബുദാബിയിൽ നിന്നുള്ള സർവീസുകൾ മാർച്ച് 5 വരെ നിർത്തിവച്ചു
എമിറേറ്റ്സ് – ദുബായിലേക്കും തിരിച്ചുമുള്ള സർവീസുകൾ യുഎഇ സമയം മാർച്ച് 4 രാത്രി 11:59 വരെ താൽക്കാലികമായി നിർത്തിവച്ചു

പ്രവാസികൾക്ക് ആശ്വാസം

ഗൾഫ് രാജ്യങ്ങളിൽ കുടുങ്ങിക്കിടക്കുന്ന ഇന്ത്യക്കാരെ നാട്ടിലെത്തിക്കാൻ ഇന്ത്യൻ വിമാനക്കമ്പനികൾ പ്രത്യേക നടപടികൾ ആരംഭിച്ചിട്ടുണ്ട്. മസ്കറ്റിൽ സ്ഥിതി ശാന്തമാണെന്നും കഴിഞ്ഞ 24 മണിക്കൂറിനിടെ വിമാന സർവീസുകൾ വീണ്ടും സാധാരണ നിലയിലേക്ക് എത്തിയതായും യാത്രക്കാർ അറിയിച്ചു.

English Summary

Air services disrupted due to the Iran–US conflict have partially resumed. Flights from Kochi to Muscat operated by Oman Air and Air India Express restarted on Monday morning.