പെട്രോൾ വാഹന ഉടമകൾ ചോദിക്കുന്നു ഞങ്ങൾ ഇനി എന്തു ചെയ്യും; ഇന്‍ഷുറന്‍സ് കിട്ടില്ലെന്ന് വിദഗ്ദർ; സർക്കാർ തീരുമാനത്തിൽ ആശങ്ക
അടുത്ത വര്‍ഷമാകുമ്പോഴേക്ക് ഇ-20 പെട്രോള്‍ ദേശവ്യാപകമായി നല്‍കാനുള്ള കേന്ദ്രസർക്കാരിന്റെ തീരുമാനത്തിൽ വാഹന ഉപഭോക്താക്കൾ ആശങ്കയിൽ. ഇ-20 പെട്രോൾ എല്ലാ വാഹനങ്ങളിലും ഉപയോഗിച്ചാല്‍ എഞ്ചിന്‍ കേടാകുകയും മൈലേജ് കുറയുകയും ചെയ്യുമെന്നാണ് വിദഗ്ദരുടെ അഭിപ്രായം. അങ്ങനെ സംഭവിച്ചാൽ വാഹനത്തിന് ഇന്‍ഷുറന്‍സ് കമ്പനികള്‍ ക്ലെയിം നിഷേധിച്ചേക്കാമെന്നും ഈ രംഗത്തുള്ളവര്‍ അഭിപ്രായപ്പെടുന്നു.
വിദഗ്ധരുടെ അഭിപ്രായത്തില്‍, നിലവില്‍ ഇന്ത്യയില്‍ ഓടുന്ന മിക്ക വാഹനങ്ങളുടെയും എഞ്ചിനുകള്‍ ഇ-10 പെട്രോളിനായി രൂപകല്‍പന ചെയ്തതാണ്. അതിനാല്‍ ഇരട്ടിയോളം എഥനോള്‍ അടങ്ങിയ ഇ-20 ഉപയോഗിച്ചാല്‍ എഞ്ചിന്‍ കേടുപാടുകള്‍, മൈലേജ് കുറവ് തുടങ്ങിയ പ്രശ്‌നങ്ങള്‍ ഉണ്ടാകാം. ഇത്തരത്തില്‍ ഉണ്ടാകുന്ന കേടുപാടുകള്‍ക്കായി ഇന്‍ഷുറന്‍സ് കമ്പനികള്‍ ക്ലെയിം അനുവദിക്കില്ലെന്നും ചിലര്‍ വ്യക്തമാക്കിയിട്ടുണ്ട്.
എഥനോള്‍ അംശം വര്‍ദ്ധിപ്പിക്കല്‍ – ഗുണവും ദോഷവും
ഇന്ധനത്തില്‍ എഥനോള്‍ കലര്‍ത്തുന്നത് പരിസ്ഥിതിക്ക് ഗുണകരമാണ്. കാര്‍ഷിക മേഖലക്കും എണ്ണ ഇറക്കുമതി കുറയ്ക്കുന്നതിനും ഇത് സഹായിക്കുന്നു. പുക പുറന്തള്ളല്‍ കുറയുകയും സര്‍ക്കാരിന്റെ ചെലവ് കുറയുകയും ചെയ്യും. എന്നാല്‍, ഉപഭോക്താക്കള്‍ക്ക് വിലയില്‍ മാറ്റമുണ്ടാകില്ല. മറിച്ച്, തെറ്റായ ഇന്ധനം നിറച്ചതിന്റെ പേരില്‍ എഞ്ചിന്‍ കേടായാല്‍ ഇന്‍ഷുറന്‍സ് പരിരക്ഷ നഷ്ടമാകാം.
സാങ്കേതിക വെല്ലുവിളികള്‍
ശുദ്ധ എഥനോളിന് പെട്രോളിനേക്കാള്‍ ഏകദേശം 30% കുറവാണ് ഊര്‍ജോല്‍പാദന ശേഷി. ഇതുമൂലം വാഹനത്തിന്റെ പവര്‍ കുറയാനും മൈലേജ് കുറഞ്ഞേക്കാനും സാധ്യതയുണ്ട്. കൂടാതെ, എഥനോള്‍ വായുവില്‍ നിന്ന് ജലാംശം ആകര്‍ഷിക്കുന്നതിനാല്‍ പെട്രോള്‍ ടാങ്കില്‍ അടിഞ്ഞുകൂടി ലോഹ ഭാഗങ്ങള്‍ തുരുമ്പാക്കാന്‍ കാരണമാകും. റബര്‍ ഗാസ്‌കറ്റുകള്‍, സീല്‍, ഇന്ധന പൈപ്പുകള്‍ എന്നിവയും വീര്‍ത്തുപൊങ്ങല്‍, വിള്ളല്‍ തുടങ്ങിയ പ്രശ്‌നങ്ങള്‍ നേരിടും.
പുതിയ മോഡലുകള്‍ മാത്രം സുരക്ഷിതം
ഇ-20 പെട്രോള്‍ നിറയ്ക്കാന്‍ അനുയോജ്യമായ വാഹനങ്ങള്‍ക്ക് പ്രത്യേക കോട്ടിംഗ്, മെച്ചപ്പെട്ട ഇന്ധന-വായു സമ്മിശ്രണ സംവിധാനം, കൂടാതെ ഇടക്കിടെ റബര്‍ ഭാഗങ്ങള്‍ മാറ്റിവയ്ക്കേണ്ട മുന്‍കരുതലുകള്‍ നല്‍കിയിരിക്കുന്നു. എന്നാല്‍, 2023ന് മുമ്പ് പുറത്തിറങ്ങിയ മിക്ക കാറുകളും (ഉദാ: മാരുതി സുസൂകി സ്വിഫ്റ്റ്, ഹ്യുണ്ടായ് ഐ-20) ഇ-10യ്ക്ക് മാത്രമാണ് രൂപകല്‍പന ചെയ്തിരിക്കുന്നത്. 2024 ഹോണ്ട സിറ്റി, 2023 ടയോട്ട ഹൈറൈഡര്‍ പോലുള്ള പുതിയ മോഡലുകളിലാണ് ഇ-20 സുരക്ഷിതമായി ഉപയോഗിക്കാനാവുക.
പശ്ചാത്തലം
2006-ല്‍ 5% എഥനോള്‍ കലര്‍ത്തിയ പെട്രോള്‍ ഇന്ത്യയില്‍ അവതരിപ്പിച്ചു. എണ്ണ ഇറക്കുമതി കുറയ്ക്കുക എന്ന ലക്ഷ്യത്തോടെ പിന്നീട് 10% വരെ ഉയര്‍ത്തി. ഇപ്പോഴിതാ, പരിസ്ഥിതി സൗഹൃദ ലക്ഷ്യങ്ങള്‍ക്കും സാമ്പത്തിക കാരണങ്ങള്‍ക്കും അനുസൃതമായി ഇ-20 വ്യാപകമാക്കാന്‍ സര്‍ക്കാര്‍ മുന്നൊരുക്കം നടത്തുന്നുണ്ട്.
English Summary :
From next year, E20 petrol will be available across India. Experts warn that using it in vehicles designed for E10 could cause engine damage, reduce mileage, and lead to insurance claim rejections.
e20-petrol-india-engine-mileage-insurance
E20 petrol, ethanol blend, engine damage, mileage drop, insurance claim, vehicle safety, E10 petrol
