ബെംഗളൂരു: ദുബായിൽ നിന്നും ബെംഗളൂരുവിലേക്ക് സ്വർണം കടത്താൻ ശ്രമം. കന്നഡ നടി രന്യ റാവു പിടിയിൽ. ബെംഗളൂരു അന്താരാഷ്ട്ര വിമാനത്താവളത്തിൽ വെച്ചാണ് ഡിആർഐ സംഘം നടിയെ പിടികൂടിയത്. ആഭരണങ്ങളായി അണിഞ്ഞും ബാക്കി സ്വർണം ശരീരത്തിൽ ഒളിപ്പിച്ചും കടത്താനായിരുന്നു നടിയുടെ ശ്രമം. ഇവരിൽ നിന്നും 14.8 കിലോ ഗ്രാം സ്വർണം റവന്യൂ ഇന്റലിജൻസ് സംഘം കണ്ടെടുത്തു.
കഴിഞ്ഞ രണ്ടാഴ്ചക്കിടെ നാല് തവണ ദുബായ് സന്ദർശനം നടത്തിയതോടെ ഡി ആർ ഐയുടെ നിരീക്ഷണവലയത്തിലാവുകയായിരുന്നു. തിങ്കളാഴ്ച രാത്രി ദുബായിൽ നിന്നും ബെംഗളൂരുവിൽ വന്നിറങ്ങിയപ്പോഴായിരുന്നു അറസ്റ്റ് . കർണാടകയിലെ ഉന്നത പൊലീസ് ഉദ്യോഗസ്ഥന്റെ മകളാണ് താനെന്ന് പറഞ്ഞ് പരിശോധനയിൽ നിന്ന് രക്ഷപ്പെടാൻ രന്യ റാവു ശ്രമിച്ചെങ്കിലും റവന്യു ഇന്റലിജൻസ് സംഘം പിടി മുറുക്കുകയായിരുന്നു.
