ഡോ. വന്ദന ദാസ് കൊലക്കേസ്: പ്രതി സന്ദീപ് കുറ്റക്കാരൻ
കൊല്ലം: കൊട്ടാരക്കര താലൂക്ക് ആശുപത്രിയിൽ ഡ്യൂട്ടിക്കിടെ യുവഡോക്ടർ ഡോ. വന്ദന ദാസ് കുത്തേറ്റ് മരിച്ച കേസിൽ പ്രതി സന്ദീപ് കുറ്റക്കാരനാണെന്ന് കൊല്ലം സെഷൻസ് കോടതി വിധിച്ചു. സംസ്ഥാനത്തെ നടുക്കിയ കേസിലാണ് നിർണായക വിധി പുറത്ത് വന്നത്.
കോട്ടയം മുട്ടുചിറ സ്വദേശിയായ ഡോ. വന്ദന ദാസ് (23) 2023 മേയ് 10ന് പുലർച്ചെയാണ് കൊല്ലപ്പെട്ടത്. കൊട്ടാരക്കര താലൂക്ക് ആശുപത്രിയിൽ ഹൗസ് സർജനായി സേവനം അനുഷ്ഠിക്കുമ്പോഴായിരുന്നു സംഭവം.
ചികിത്സയ്ക്കായി പൊലീസ് ആശുപത്രിയിലെത്തിച്ചിരുന്ന അധ്യാപകനായ സന്ദീപ് (44) അക്രമാസക്തനായി സർജിക്കൽ കത്തി ഉപയോഗിച്ച് ആക്രമിക്കുകയായിരുന്നു.
ആക്രമണത്തിൽ ഡോ. വന്ദന ദാസ് കൊല്ലപ്പെടുകയും മൂന്ന് പൊലീസുകാരുൾപ്പെടെ അഞ്ച് പേർക്ക് പരുക്കേൽക്കുകയും ചെയ്തു.
കേസിൽ 70ലധികം സാക്ഷികളെ വിസ്തരിച്ചു, 207 രേഖകൾ കോടതിയിൽ ഹാജരാക്കി. ഡ്യൂട്ടിക്കിടെ വന്ദനയോടൊപ്പം ഉണ്ടായിരുന്ന ഡോ. മുഹമ്മദ് ഷിബിൻ മുഖ്യസാക്ഷിയായി.
തുടക്കത്തിൽ ലോക്കൽ പൊലീസ് അന്വേഷിച്ച കേസ് പിന്നീട് ക്രൈംബ്രാഞ്ച് ഏറ്റെടുത്തു. 90 ദിവസത്തിനുള്ളിൽ കുറ്റപത്രം സമർപ്പിച്ച് അന്വേഷണം പൂർത്തിയാക്കി. പ്രതിയുടെ മാനസികാവസ്ഥ ചൂണ്ടിക്കാട്ടി പ്രതിഭാഗം സുപ്രീംകോടതിയെ സമീപിച്ചെങ്കിലും ഫലം കണ്ടില്ല.
ഈ കേസിനെ തുടർന്നാണ് ആരോഗ്യ പ്രവർത്തകരുടെ സുരക്ഷ ഉറപ്പാക്കുന്നതിനായി നിയമ ഭേദഗതികൾ നടപ്പിലാക്കിയത്. കർശന ശിക്ഷകൾ ഉൾപ്പെടുത്തിയ പുതിയ നിയമ വ്യവസ്ഥകളും നിലവിൽ വന്നിട്ടുണ്ട്.
English Summary
A sessions court in Kollam has found Sandeep guilty in the 2023 murder case of Dr. Vandana Das, who was stabbed to death while on duty at Kottarakkara Taluk Hospital.
The incident occurred on May 10, 2023, when Sandeep, a school teacher brought to the hospital by police for treatment, turned violent and attacked using a surgical knife. Dr. Vandana was killed, and five others, including three police officers, were injured.
The case included over 70 witnesses and 207 documents. Despite defense arguments regarding the accused’s mental health, the court rejected them.
The case led to significant legal reforms in Kerala to ensure the safety of healthcare workers, including stricter punishments for attacks on medical staff.
