മുംബൈ: ബോളിവുഡ് നടൻ സൽമാൻ ഖാനെതിരായ വധഭീഷണിയ്ക്ക് പിന്നിൽ നടന്റെ പുതിയ ചിത്രത്തിലെ ഗാനരചയിതാവ്‌. റിലീസിനൊരുങ്ങുന്ന സല്‍മാന്‍ ചിത്രമായ സിക്കന്ദറിലെ ‘മേന്‍ ഹൂന്‍ സിക്കന്ദര്‍…’ എന്ന പാട്ടെഴുതിയ യൂട്യൂബറെയാണ് മുംബൈ പോലീസ് പിടികൂടിയത്. നവംബര്‍ ഏഴിനാണു മുംബൈ പോലീസിന്റെ ഔദ്യോഗിക വാട്‌സ്ആപ്പിലേക്ക് സല്‍മാനെയും അദ്ദേഹത്തെ പ്രകീര്‍ത്തിച്ച് പാട്ടെഴുതിയ ആളെയും കൊല്ലുമെന്ന് ഭീഷണി സന്ദേശമെത്തിയത്.(Death threats against Salman Khan; lyricist arrested)

യൂട്യൂബറും പാട്ടെഴുത്തുകാരനുമായ റസീല്‍ പാഷ എന്ന് വിളിക്കപ്പെടുന്ന 23-കാരനായ സൊഹൈല്‍ പാഷയാണ് പിടിയിലായത്. എന്നാൽ സല്‍മാനെ പ്രകീര്‍ത്തിച്ച് താന്‍ എഴുതിയ പാട്ട് ഹിറ്റാകാനും പണം ലഭിക്കാനും വേണ്ടിയാണ് ഭീഷണി മുഴക്കിയതെന്നാണ് പ്രതി നൽകിയ മൊഴി.

അഞ്ചുലക്ഷം രൂപ തന്നാല്‍ സല്‍മാനെ വെറുതെ വിടാം, അല്ലാത്തപക്ഷം സല്‍മാനെയും അദ്ദേഹത്തെ പ്രകീര്‍ത്തിച്ച് പാട്ടെഴുതിയ ആളെയും കൊന്നുകളയും എന്നായിരുന്നു സന്ദേശം. ഇതിനു പിന്നിൽ ബിഷ്‌ണോയ് സംഘമാണെന്ന് കരുതും എന്നായിരുന്നു പ്രതി വിശ്വസിച്ചിരുന്നത്. സെവ്‌രി കോടതിയില്‍ ഹാജരാക്കിയ പാഷയെ മജിസ്‌ട്രേറ്റ് സുഹാസ് ഭോസ്ലെ രണ്ടുദിവസത്തേക്ക് പോലീസ് കസ്റ്റഡിയില്‍ വിട്ടു.