യുവതിയെ കെഎസ്ആർടിസി ബസിൽ നിന്നും രാത്രി ഇറക്കിവിട്ട കണ്ടക്ടറെ പിരിച്ചുവിട്ടു
തിരുവനന്തപുരം: ടിക്കറ്റ് തുക നൽകുന്നതിൽ ഉണ്ടായ താമസത്തിന്റെ പേരിൽ രാത്രിയാത്രയ്ക്കിടെ രോഗബാധിതയായ യുവതിയെ കെഎസ്ആർടിസി ബസിൽ നിന്നും ഇറക്കി വിട്ട സംഭവത്തിൽ ശക്തമായ നടപടിയുമായി കെഎസ്ആർടിസി.
സംഭവത്തിൽ ബന്ധപ്പെട്ട കണ്ടക്ടർക്കെതിരെ വകുപ്പുതല അന്വേഷണം പൂർത്തിയാക്കിയ ശേഷം ജോലിയിൽ നിന്ന് പിരിച്ചുവിടുകയായിരുന്നു.
യാത്രക്കാരിയെ പരസ്യമായി അധിക്ഷേപിക്കുകയും രാത്രി ആളൊഴിഞ്ഞ സ്ഥലത്ത് ഇറക്കിവിടുകയും ചെയ്തുവെന്ന പരാതിയിലാണ് നടപടി.
വെള്ളറട സ്വദേശിനിയായ എസ്. ദിവ്യയാണ് ദുരനുഭവത്തെ കുറിച്ച് ഗതാഗത മന്ത്രിക്കും വെള്ളറട സ്റ്റേഷൻ മാസ്റ്റർക്കും ഔദ്യോഗികമായി പരാതി നൽകിയത്.
പരാതി ലഭിച്ചതിനെ തുടർന്ന് കെഎസ്ആർടിസി വിജിലൻസ് വിഭാഗം സ്ഥലത്തെത്തി അന്വേഷണം നടത്തുകയും വിശദമായ റിപ്പോർട്ട് സമർപ്പിക്കുകയും ചെയ്തു.
റിപ്പോർട്ടിന്റെ അടിസ്ഥാനത്തിലാണ് വെള്ളറട ഡിപ്പോയിലെ എംപാനൽ കണ്ടക്ടറായ നെല്ലിമൂട് സ്വദേശി സി. അനിൽകുമാറിനെ ജോലിയിൽ നിന്ന് ഒഴിവാക്കാൻ അധികൃതർ തീരുമാനിച്ചത്.
ഡിസംബർ 26-നാണ് സംഭവം നടന്നത്. രാത്രി ഏകദേശം 9 മണിയോടെ കൂനമ്പനയിൽ നിന്ന് വീട്ടിലേക്ക് മടങ്ങുന്നതിനായി ദിവ്യ കെഎസ്ആർടിസി ബസിൽ കയറി.
കൈവശം പണമില്ലാതിരുന്ന ദിവ്യ 18 രൂപയുടെ ടിക്കറ്റ് തുക ഗൂഗിൾ പേ വഴി അടയ്ക്കാൻ ശ്രമിച്ചെങ്കിലും സാങ്കേതിക തകരാർ മൂലം പണമിടപാട് പരാജയപ്പെട്ടു.
വെള്ളറടയിൽ എത്തുമ്പോൾ പണം നൽകാമെന്ന് ദിവ്യ വ്യക്തമാക്കിയിട്ടും കണ്ടക്ടർ അതിന് തയ്യാറായില്ലെന്നും, രാത്രി 9.10 ഓടെ തോലടിക്ക് സമീപമുള്ള ആളൊഴിഞ്ഞ പ്രദേശത്ത് ഇറക്കിവിട്ടുവെന്നുമാണ് പരാതിയിൽ പറയുന്നത്.
സംഭവത്തിന് പിന്നാലെ ദിവ്യ ഭർത്താവിനെ വിവരം അറിയിക്കുകയും, ഭർത്താവ് ബൈക്കിൽ എത്തി ദിവ്യയെ കൂട്ടിക്കൊണ്ടുപോകുകയും ചെയ്തു
സംഭവം സമൂഹമാധ്യമങ്ങളിലൂടെയും വാർത്തകളിലൂടെയും പുറത്തുവന്നതോടെ കെഎസ്ആർടിസിക്കെതിരെ വ്യാപക വിമർശനങ്ങൾ ഉയർന്നു.
അതേസമയം, സംഭവത്തിൽ കണ്ടക്ടർ സി. അനിൽകുമാർ ആരോപണങ്ങൾ നിഷേധിച്ചിട്ടുണ്ട്. അത്തരമൊരു സംഭവം ബസിൽ ഉണ്ടായിട്ടില്ലെന്നും, യുവതി ബസിൽ കയറിയിട്ടില്ലെന്നുമാണ് അദ്ദേഹത്തിന്റെ വാദം.
കളിയിക്കാവിള–വെള്ളറട റൂട്ടിലോടുന്ന ബസ് സംഭവദിവസം കൂനമ്പനയിലേക്കു പോയിട്ടില്ലെന്നും അദ്ദേഹം അവകാശപ്പെടുന്നു.
എന്നിരുന്നാലും, വിജിലൻസ് അന്വേഷണ റിപ്പോർട്ടും യാത്രക്കാരിയുടെ പരാതിയും പരിഗണിച്ചാണ് കെഎസ്ആർടിസി കടുത്ത നടപടി സ്വീകരിച്ചത്.
