ഡൽഹി: കേന്ദ്ര സര്ക്കാര് സ്ഥാപനമായ കയര്ബോര്ഡിന്റെ കൊച്ചി ആസ്ഥാനത്താനത്ത് തൊഴിൽ പീഡനമെന്ന് പരാതി. നിരന്തര തൊഴില് സമ്മര്ദവും ഉന്നത ഉദ്യോഗസ്ഥരുടെ പീഡനവും ഇവിടുത്തെ ജീവനക്കാരിയെ ഗുരുതര രോഗിയാക്കിയെന്നാണ് ആരോപണം.
സ്ഥാപനത്തിലെ സെക്ഷന് ഓഫിസറായിരുന്ന ജോളി മധു സെറിബ്രല് ഹെമിറേജ് ബാധിതയായെന്നാണ് പരാതി. മധുവിന്റെ കുടുംബം തന്നെയാണ് പരാതി ഉന്നയിച്ചിരിക്കുന്നത്. അതീവഗുരുതരാവസ്ഥയില് തുടരുന്ന ജോളി വെന്റിലേറ്റര് സഹായത്തോടെയാണ് ഇപ്പോൾ ജീവന് നിലനിര്ത്തുന്നത്.
കയര് ബോര്ഡ് ചെയര്മാന് ഉള്പ്പെടെയുളളവര്ക്കെതിരെയാണ് ജോളി മധുവിന്റെ കുടുംബത്തിൻ്റെ പരാതി. വിധവയും കാന്സര് അതിജീവിതയുമെന്ന പരിഗണന പോലും നല്കാതെ ജോളിയെ ആറു മാസം മുമ്പ് ആന്ധ്രാപ്രദേശിലേക്ക് സ്ഥലം മാറ്റി.
രോഗാവസ്ഥ വ്യക്തമാക്കുന്ന മെഡിക്കല് രേഖകള് പോലും പരിഗണിച്ചില്ല. പിന്നീട്ശമ്പളം പോലും തടഞ്ഞുവച്ചു. മനസിക സമ്മര്ദം താങ്ങാനാവാതെ ഇക്കഴിഞ്ഞ ജനുവരി മുപ്പതിന് ജോളിക്ക് സെറിബ്രല് ഹെമിറേജ് ബാധിക്കുകയായിരുന്നെന്ന് കുടുംബം ആരോപിക്കുന്നു.
വെന്റിലേറ്റര് സഹായത്തോടെയാണ് കൊച്ചിയിലെ സ്വകാര്യ ആശുപത്രിയില് ജോളിയുടെ ചികില്സ നടക്കുന്നത്. ഓഫിസിലെ തൊഴില് പീഡനത്തെ പറ്റി പ്രധാനമന്ത്രിയുടെ ഓഫിസിനും രാഷ്ട്രപതിക്കും ജോളി കത്തയച്ചിരുന്നു.
ഈ കത്തുകള് അയച്ചതിന്റെ പേരില് പോലും പ്രതികാര നടപടികള് ഉണ്ടായെന്നും കുടുംബം ആരോപിക്കുന്നുണ്ട്. എന്നാൽ ആരോപണത്തെ പറ്റി കയര്ബോര്ഡ് പ്രതികരിച്ചിട്ടില്ല.
