വൈക്കം: വൈക്കം കായലോര ബീച്ചില്‍ താത്കാലികമായി എത്തിച്ച വായു നിറച്ച കളിയുപകരണം തകരാറിലായി. ഉള്ളിൽ കുടുങ്ങിയ 10 കുട്ടികളെ മാതാപിതാക്കളും നാട്ടുകാരും ചേര്‍ന്ന് രക്ഷപ്പെടുത്തി. സംഭവത്തിൽ ആർക്കും പരിക്കില്ല.(Children trapped in Vaikathashtami carnival ride)

ഇന്ന് വൈകീട്ട് 6.45-നായിരുന്നു സംഭവം. വൈക്കത്തഷ്ടമിയോടനുബന്ധിച്ച് എത്തിച്ച 20 അടിയോളം മുകളിലേക്ക് കയറി ഊര്‍ന്നിറങ്ങുന്ന കളി ഉപകരണത്തിന്റെ വായു പെട്ടെന്ന് ചോരുകയായിരുന്നു. ഈ സമയത്ത് ഉപകരണത്തിന്റെ മുകളില്‍ കയറിയിരുന്ന കുട്ടികള്‍ താഴെ വീണു. അഞ്ച് വയസിന് താഴെയുള്ള കുട്ടികളാണ് കളിച്ചുകൊണ്ടിരുന്നത്.

സംഭവം നടന്നയുടനെ മാതാപിതാക്കളും നാട്ടുകാരും ചേര്‍ന്ന് കുട്ടികളെ രക്ഷിക്കുകയായിരുന്നു. കുട്ടികള്‍ മറുഭാഗത്തേക്ക് വീഴാതെ ഉപകരണത്തിന്റെ ഊര്‍ന്നിറങ്ങുന്ന ഭാഗത്തുതന്നെ വീണതിനാല്‍ വലിയ അപകടം ആണ് ഒഴിവായത്. അതേസമയം വേണ്ടത്ര സുരക്ഷ ഉറപ്പാക്കാതെയാണ് ഇവിടെ വിനോദ ഉപാധികള്‍ ഒരുക്കിയിരിക്കുന്നതെന്ന് മാതാപിതാക്കൾ ആരോപിച്ചു.