പിങ്ക് പുതച്ച് ഏഷ്യ; ചെറി പൂക്കളുടെ മാന്ത്രിക ലോകത്ത് ചൈനയും ജപ്പാനും!
ബീജിംഗ്/ടോക്കിയോ: വസന്തകാലത്തിന്റെ മനോഹര വരവറിയിപ്പായി ഏഷ്യൻ വൻകര പിങ്ക് നിറത്തിൽ മുങ്ങിയിരിക്കുകയാണ്. ചെറി പൂക്കൾ വിരിയുന്ന ഈ കാലഘട്ടം കാണാൻ ലോകത്തിന്റെ വിവിധ ഭാഗങ്ങളിൽ നിന്നുള്ള സഞ്ചാരികൾ ചൈനയിലേക്കും ജപ്പാനിലേക്കും ഒഴുകിയെത്തുന്നു. പ്രകൃതിയുടെ അതുല്യ കലാസൃഷ്ടിയായ ഈ കാഴ്ചകൾ യാത്രാപ്രേമികൾക്ക് മറക്കാനാവാത്ത അനുഭവങ്ങളാണ് സമ്മാനിക്കുന്നത്.
ചൈനയിലെ ഗ്വിഷു പ്രവിശ്യയിലെ പിങ്ബ ചെറി ബ്ലോസം പാർക്ക് ഇപ്പോൾ പിങ്ക് നിറത്തിലുള്ള ഒരു സ്വപ്നലോകമായി മാറിയിരിക്കുകയാണ്. ലക്ഷക്കണക്കിന് ചെറി മരങ്ങൾ ഒരേസമയം പൂത്തുനിൽക്കുമ്പോൾ, ആകാശത്തുനിന്ന് നോക്കുമ്പോൾ അത് ഒരു വിശാലമായ ‘പിങ്ക് കടൽ’ പോലെ അനുഭവപ്പെടും. ലോകത്തിലെ ഏറ്റവും വലിയ ചെറി ബ്ലോസം ഗാർഡനുകളിൽ ഒന്നായ ഇവിടെ നിന്നുള്ള കാഴ്ചകൾ സഞ്ചാരികളെ വിസ്മയിപ്പിക്കുന്നു.
വുഹാൻ സർവകലാശാല ക്യാംപസും ഈസ്റ്റ് ലേക്ക് പാർക്കും ചെറി പൂക്കളുടെ സൗന്ദര്യത്തിൽ മുങ്ങിയിരിക്കുകയാണ്. ദിവസേന ആയിരക്കണക്കിന് സന്ദർശകരാണ് ഈ മനോഹര കാഴ്ചകൾ കാണാൻ എത്തുന്നത്.
അതേസമയം, ജപ്പാനിൽ ‘സകുറ’ സീസൺ ആരംഭിച്ചതോടെ രാജ്യം മുഴുവൻ ആഘോഷത്തിലേക്ക് കടന്നിരിക്കുകയാണ്. ടോക്കിയോയിലെ യാസുകുനി ശ്രൈനിലെ ചെറി മരത്തിൽ പൂക്കൾ വിരിഞ്ഞതോടെ വസന്തകാലത്തെ ഔദ്യോഗികമായി വരവേറ്റു.
കോഫു, ഗിഫു, കൊച്ചി തുടങ്ങിയ നഗരങ്ങളിലും ഇത്തവണ നേരത്തെയേ പൂക്കൾ വിരിഞ്ഞു. രാത്രിയിൽ വൈദ്യുത ദീപങ്ങളാൽ അലങ്കരിച്ച ചെറി മരങ്ങൾ കാണുന്നത് സഞ്ചാരികൾക്ക് വേറിട്ട അനുഭവമാണ്. ഈ കാഴ്ചകൾ ആസ്വദിക്കാൻ വലിയ തിരക്കാണ് അനുഭവപ്പെടുന്നത്.
ഈ വർഷം ജപ്പാനിലും ചൈനയിലും വസന്തകാലം സാധാരണയേക്കാൾ നേരത്തെ എത്തിയതായാണ് റിപ്പോർട്ടുകൾ. ഏപ്രിൽ പകുതി വരെ നീളുന്ന ഈ ചെറി പൂക്കളുടെ സീസൺ കാണാൻ ലോകമെമ്പാടുമുള്ള ആളുകൾ എത്തുന്നു. തിരക്ക് ഒഴിവാക്കി ശാന്തമായ അനുഭവം ആഗ്രഹിക്കുന്നവർ സെൻഡായി, സപ്പോറോ പോലുള്ള നഗരങ്ങൾ തിരഞ്ഞെടുക്കുന്നത് ഉചിതമാണ്.
ഒരു വർഷത്തിൽ വളരെ കുറച്ച് ദിവസങ്ങൾ മാത്രം നിലനിൽക്കുന്ന ചെറി പൂക്കളുടെ ഈ സീസൺ, പ്രകൃതിയുടെ അതുല്യ സൗന്ദര്യത്തിന്റെ ഓർമ്മപ്പെടുത്തലാണ്. ഒരിക്കൽ കണ്ടാൽ ജീവിതകാലം മുഴുവൻ മനസിൽ പൂത്തുനിൽക്കുന്ന അനുഭവമെന്നതിൽ സംശയമില്ല.
English Summary:
Asia is turning pink as cherry blossom season begins across China and Japan, attracting tourists worldwide. From China’s vast Pingba cherry gardens to Japan’s iconic sakura celebrations, the short-lived bloom offers a breathtaking and unforgettable travel experience.
cherry-blossom-season-china-japan-travel
Cherry Blossom, Sakura Season, China Travel, Japan Tourism, Spring Season, Nature Beauty, Travel News, Asia Tourism
