കൊച്ചി: എഡിഎം നവീന് ബാബുവിന്റെ മരണത്തില് സിബിഐ അന്വേഷണം വേണമെന്നാവശ്യപ്പെട്ടുള്ള കുടുംബത്തിന്റെ ഹർജി ഹര്ജി ഹൈക്കോടതി ഇന്ന് പരിഗണിക്കും. ജസ്റ്റിസ് ബെച്ചു കുര്യന് തോമസ് അധ്യക്ഷനായ സിംഗിള് ബെഞ്ചാണ് ഹർജി പരിഗണിക്കുക. നിലവിലെ അന്വേഷണം തൃപ്തികരമല്ലെന്നും സിബിഐ അന്വേഷണം വേണമെന്നുമാണ് ഭാര്യ മഞ്ജുഷയുടെ ആവശ്യം.(CBI probe in Naveen Babu’s death; High Court will consider the petition today)
നവീന് ബാബുവിന്റെ മരണം കൊലപാതകമാണോയെന്ന സംശയമാണ് കുടുംബം ഉയർത്തുന്നത്. ഹര്ജിയില് തുടര് നടപടിക്രമങ്ങളുടെ ഭാഗമായി ഹൈക്കോടതി സംസ്ഥാന സര്ക്കാരിനോട് അന്വേഷണ പുരോഗതി റിപ്പോര്ട്ട് തേടാൻ സാധ്യതയുണ്ട്. പ്രതികളുടെ രാഷ്ട്രീയ സ്വാധീനവും കേസ് അട്ടിമറിക്കപ്പെടാനുള്ള സാധ്യതയും ഹര്ജിയില് ചൂണ്ടിക്കാട്ടിയിട്ടുണ്ട്.
ഒക്ടോബര് 14ന് കണ്ണൂര് കലക്ടറേറ്റില് നടന്ന യാത്രയയപ്പ് ചടങ്ങിനു ശേഷം നവീന് ബാബുവിനെ ആരൊക്കെ സന്ദര്ശിച്ചെന്നു കണ്ടെത്തണമെന്നും ഹര്ജിയില് ആവശ്യപ്പെടുന്നു. ഇത് നവീന് ബാബുവിന്റെ മരണത്തിലേക്ക് നയിച്ച സാഹചര്യങ്ങളെക്കുറിച്ച് വ്യക്തമായ ചിത്രം ലഭിക്കാന് സഹായിക്കും എന്നും ഹർജിയിൽ പറയുന്നു.
