കൊച്ചി: മദ്യപിച്ച് റെയിൽവേ പാളത്തിൽ കിടന്ന രണ്ടുപേർ അത്ഭുതകരമായി രക്ഷപ്പെട്ടു. ആലുവയ്ക്കും അങ്കമാലിക്കും ഇടയിൽ ഇന്നലെ രാത്രിയാണ് സംഭവം. ഷാലിമാർ എക്സ്പ്രസ് കടന്നുപോകുന്നതിനിടെയാണ് രണ്ടുപേർ പാളത്തിൽ കിടക്കുന്നത് ശ്രദ്ധയിൽപ്പെട്ടത്. തുടർന്ന് ട്രെയിൻ നിർത്തിയതിനുശേഷം ജീവനക്കാർ ഇറങ്ങി ഇവരെ പാളത്തിൽ നിന്ന് പിടിച്ചു മാറ്റുകയായിരുന്നു.
ഇന്നലെ രാത്രി ഷാലിമാർ എക്സ്പ്രസ് ആലുവ സ്റ്റേഷൻ പിന്നിട്ടതിന് ശേഷം മുന്നോട്ടുവരികയായിരുന്നു. ട്രെയിൻ വേഗത കുറഞ്ഞാണ് വന്നിരുന്നത്. ഈ സമയത്താണ് രണ്ടുപേർ പാളത്തിൽ കിടക്കുന്നത് ലോക്കോ പൈലറ്റുമാരുടെ ശ്രദ്ധയിൽപ്പെട്ടത്. പിന്നാലെ ട്രെയിൻ നിർത്താൻ ശ്രമിച്ചെങ്കിലും അഞ്ച് മീറ്ററോളം മുന്നോട്ടുപോവുകയും എഞ്ചിൻ ഇവരുടെ മുകളിലൂടെ കടന്നുപോയെന്നും ലോക്കോ പൈലറ്റുമാർ പ്രതികരിച്ചു.
തുടർന്ന് ലോക്കോ പൈലറ്റ് പുറത്തിറങ്ങി നോക്കി രണ്ടുപേരോടും പുറത്തേക്ക് വരാൻ ആവശ്യപ്പെട്ടു. പിന്നാലെ രണ്ടുപേരും സ്വയം പുറത്തേയ്ക്ക് വന്നു. ഇരുവർക്കും പരിക്കൊന്നും ഏറ്റില്ലെന്ന് ജീവനക്കാർ വ്യക്തമാക്കി. മദ്യപിച്ച് ലെക്കുകെട്ട നിലയിലായിരുന്നു ഇവരെന്ന് ലോക്കോ പൈലറ്റുമാർ പറഞ്ഞു.
പാളത്തിൽ നിന്ന് മദ്യക്കുപ്പികളും കണ്ടെത്തിയിട്ടുണ്ട്. ഇരുവരുടെയും പേരുവിവരങ്ങൾ വ്യക്തമല്ല. റെയിൽവേ പാളത്തിൽ അപകടകരമാംവിധം കിടന്നതിന് ഇരുവർക്കും എതിരെ കേസ് എടുത്തതായി റെയിൽവേ അറിയിച്ചു.
