വോട്ട് ചോരിക്കെതിരെ കേരളത്തിലെ യുഡിഎഫ് വിജയം ആയുധമാക്കി ബിജെപി

വോട്ട് ചോരിക്കെതിരെ കേരളത്തിലെ യുഡിഎഫ് വിജയം ആയുധമാക്കി ബിജെപി

ന്യൂഡല്‍ഹി: കേരളത്തിലെ തദ്ദേശ സ്വയംഭരണ തെരഞ്ഞെടുപ്പില്‍ കോണ്‍ഗ്രസ് നേതൃത്വം നല്‍കുന്ന യുഡിഎഫ് നേടിയ വിജയത്തെ ചൂണ്ടിക്കാട്ടി, വോട്ട് ചോരി, ഇവിഎം ക്രമക്കേട് എന്നീ ആരോപണങ്ങള്‍ക്കെതിരെ കോണ്‍ഗ്രസിനെ ആക്രമിച്ച് ബിജെപി രംഗത്തെത്തി. 

യുഡിഎഫ് വിജയത്തെ ആഘോഷിക്കുന്ന കോണ്‍ഗ്രസ് നേതാവ് രാഹുല്‍ ഗാന്ധിയുടെ പ്രതികരണങ്ങള്‍ ഉള്‍പ്പെടെ ഉദ്ധരിച്ചാണ് ബിജെപിയുടെ പ്രചാരണം.

ബിജെപി ഐടി സെല്‍ ദേശീയ കണ്‍വീനര്‍ അമിത് മാളവ്യയാണ് പ്രചാരണത്തിന് തുടക്കമിട്ടത്. 

തെരഞ്ഞെടുപ്പ് ഫലങ്ങള്‍ അനുകൂലമല്ലാത്തപ്പോള്‍ രാഹുല്‍ ഗാന്ധി ഇലക്ട്രോണിക് വോട്ടിങ് മെഷീനുകളെ കുറ്റപ്പെടുത്തുകയും ഗൂഢാലോചനയും വോട്ട് ചോരിയും ആരോപിക്കുകയും ചെയ്യുന്നുവെന്ന് അമിത് മാളവ്യ പറഞ്ഞു. 

എന്നാല്‍ വിജയങ്ങള്‍ ലഭിക്കുമ്പോള്‍ അതേ തെരഞ്ഞെടുപ്പ് പ്രക്രിയയെ യാതൊരു സംശയവുമില്ലാതെ സ്വീകരിക്കുകയാണ് കോണ്‍ഗ്രസ് ചെയ്യുന്നതെന്നും അദ്ദേഹം കുറ്റപ്പെടുത്തി.

കഴിഞ്ഞ ദിവസം രാഹുല്‍ ഗാന്ധി പങ്കുവച്ച ഒരു പോസ്റ്റ് പങ്കുവച്ചാണ് അമിത് മാളവ്യയുടെ പ്രതികരണം. 

ഓരോ തെരഞ്ഞെടുപ്പിലും ഫലം ഇഷ്ടപ്പെടുന്ന രീതിയില്‍ വരാതിരിക്കുമ്പോള്‍ ആരോപണങ്ങളുമായി രംഗത്തെത്തുകയും, വിജയങ്ങള്‍ ഉണ്ടാകുമ്പോള്‍ അതേ സംവിധാനത്തെ പൂര്‍ണമായി അംഗീകരിക്കുകയും ചെയ്യുന്നതാണ് കോണ്‍ഗ്രസ് സമീപനമെന്ന് അദ്ദേഹം പറഞ്ഞു.

പ്രത്യേക താത്പര്യങ്ങളുടെ അടിസ്ഥാനത്തില്‍ ജനാധിപത്യം പ്രവര്‍ത്തിക്കാന്‍ കഴിയില്ല. 

ഒരു സംവിധാനത്തില്‍ വിജയങ്ങള്‍ ആഘോഷിക്കുമ്പോള്‍ തോല്‍വിയുണ്ടാകുമ്പോള്‍ അതേ സംവിധാനത്തെ അപമാനിക്കുന്നത് ജനാധിപത്യത്തെ ദുര്‍ബലമാക്കുകയും പൊതുജന വിശ്വാസം നഷ്ടപ്പെടുത്തുകയും ചെയ്യുമെന്ന് അമിത് മാളവ്യ വ്യക്തമാക്കി.

പ്രതിപക്ഷമായി ബദലാകാന്‍ ആഗ്രഹിക്കുന്നവര്‍ സ്ഥിരതയും ഉത്തരവാദിത്തവും കാണിക്കണം. 

തെളിവുകളില്ലാതെ തെരഞ്ഞെടുപ്പ് ഫലങ്ങളെ ചോദ്യം ചെയ്യുന്നത് രാഷ്ട്രീയ സമഗ്രതയെയും ജനാധിപത്യ ധാര്‍മ്മികതയെയും കുറിച്ച് ഗുരുതരമായ ആശങ്കകള്‍ ഉയര്‍ത്തുന്നുവെന്നും, പരാജയപ്പെടുമ്പോഴും ജനാധിപത്യ സ്ഥാപനങ്ങളെ ബഹുമാനിക്കുന്ന നേതൃത്വമാണ് രാഷ്ട്രീയ പാര്‍ട്ടികള്‍ക്ക് ആവശ്യമെന്നുമാണ് അമിത് മാളവ്യയുടെ നിലപാട്.

English Summary:

The BJP has launched an attack on the Congress over allegations of vote rigging and EVM manipulation, citing the UDF’s victory in Kerala’s local body elections. BJP IT cell head Amit Malviya accused Rahul Gandhi of questioning the electoral process when results are unfavorable, while readily accepting it when Congress wins. Malviya said such selective criticism weakens democracy and erodes public trust, calling for consistency, responsibility, and respect for democratic institutions from opposition parties.

bjp-attack-congress-kerala-local-body-polls-evm-controversy

Kerala local body elections, UDF victory, BJP, Congress, Rahul Gandhi, Amit Malviya, EVM controversy, vote rigging allegation, Indian politics