അയർലണ്ടിൽ ഒരു പ്രത്യേക മുന്നറിയിപ്പ് നൽകിയിരിക്കുകയാണ് HSE. ഡബ്ലിനില് നിന്നും സ്ലൈഗോയിലേയ്ക്ക് പോയ ഒരു ട്രെയിനിലെ യാത്രക്കാര്ക്കാണ് മുന്നറിയിപ്പ്.
കഴിഞ്ഞ വെള്ളിയാഴ്ച (മാര്ച്ച് 28) Dublin Connolly- Sligo റൂട്ടില് പോയ Carriage D ട്രെയിനിലെ യാത്രക്കാരില് ഒരാള്ക്ക് മീസില്സ് ഉണ്ടായിരുന്നതായി ബലമായ സംശയമുണ്ടെന്നും, 15 മിനിറ്റോ, അതിലധികമോ നേരം ഈ ട്രെയിനില് യാത്ര ചെയ്ത എല്ലാവരും ജാഗ്രത പാലിക്കണമെന്നുമാണ് നിർദേശം.
ഡബ്ലിനില് നിന്നും വെള്ളിയാഴ്ച വൈകിട്ട് 5.05-നാണ് ട്രെയിന് പുറപ്പെട്ടത്. ഇതിൽ യാത്ര ചെയ്തവർ അടുത്ത 21 ദിവസക്കാലം, അതായത് ഏപ്രില് 18 വരെ മീസില്സ് രോഗലക്ഷണങ്ങളുണ്ടോ എന്ന് നിരന്തരം നിരീക്ഷിക്കണം.
നിർദേശങ്ങൾ ഇങ്ങനെ:
മൂക്കൊലിപ്പ്, തുമ്മല്, കഫക്കെട്ട്, കണ്ണുകള്ക്ക് ചുവന്ന നിറമാകുക, പനി, തല, കഴുത്ത് മുതലായ സ്ഥലങ്ങളില് ആദ്യം പ്രത്യക്ഷപ്പെട്ട ശേഷം ദേഹമാകെ പടരുന്ന ചുവന്ന തടിപ്പുകള് (red rashes) മുതലായവ കണ്ടാൽ ഡോക്ടറെ സമീപിക്കണം.
ഈ ട്രെയിനില് യാത്ര ചെയ്തവര് പ്രതിരോധശേഷി കുറഞ്ഞവര്, ഒരു വയസില് താഴെയുള്ള കുട്ടികള്, ഗര്ഭിണികള് എന്നിവരുമായി ഒരു കാരണവശാലും സമ്പര്ക്കത്തിലേര്പ്പെടാന് പാടില്ല
യാത്രക്കാരില് ആരെങ്കിലും മേല് പറഞ്ഞ വിഭാഗത്തില് പെടുന്നവരാണെങ്കില് ഉടന് തന്നെ ഡോക്ടറെ കണ്ട് ഉപദേശം സ്വീകരിക്കണം.
