തിരുവനന്തപുരം: കേന്ദ്രത്തിൽ നിന്നുള്ള മാർഗരേഖ ഇതുവരെ ലഭിക്കാത്തതിനെ തുടർന്ന് 70 വയസു കഴിഞ്ഞവർക്ക് 5 ലക്ഷം രൂപവരെ സൗജന്യ ചികിത്സ ഉറപ്പാക്കുന്ന ആയുഷ്മാൻ ഭാരത് പദ്ധതി സംസ്ഥാനത്ത് ആരംഭിക്കാനായില്ല.
മാർഗരേഖയ്ക്കായി ദേശീയ ആരോഗ്യ അതോറിറ്റിക്ക് അരോഗ്യ വകുപ്പ് അഡി. ചീഫ് സെക്രട്ടറി രാജൻ ഖൊബ്രഗഡേ ഒന്നിലധികം തവണ കത്ത് നൽകിയിരുന്നു.
ലഭിച്ചാലുടൻ പദ്ധതി തുടങ്ങാനാവുമെന്ന പ്രതീക്ഷയിലാണ് സംസ്ഥാന സർക്കാർ. പദ്ധതിയുടെ 60ശതമാനം കേന്ദ്രവും 40 ശതമാനം സംസ്ഥാനവും വഹിക്കാമെന്നാണ് ധാരണ. എന്നാൽ, തുക എത്രയെന്നും ഇതുവരെ അറിയിച്ചിട്ടില്ല.
ആയുഷ്മാൻ ഭാരത് കേരളത്തിൽ കാരുണ്യ ആരോഗ്യ ഇൻഷ്വറൻസ് പദ്ധതിയുമായി (കാസ്‌‌പ്) ലയിപ്പിച്ചാണ് പദ്ധതി നടപ്പാക്കുന്നത്.
സമാന രീതിയിലാകും 70 വയസു കഴിഞ്ഞവർക്കുള്ള സൗജന്യ ചികിത്സാ പദ്ധതിയും നടപ്പാക്കുക. കാസ്പിൽ 202 സർക്കാർ ആശുപത്രികളും 386 സ്വകാര്യ ആശുപത്രികളുമുണ്ട്.
മാർഗരേഖ വന്നതിനുശേഷം സംസ്ഥാനത്ത് ഇതിന്റെ രജിസ്‌ട്രേഷൻ തുടങ്ങിയാൽ മതിയെന്നായിരുന്നു തീരുമാനം. എന്നാൽ, കേന്ദ്ര സർക്കാരിന്റെ വെബ്സൈറ്റ് വഴി നിലവിൽ ആളുകൾ രജിസ്റ്റർ ചെയ്യുന്നുണ്ട്.
