തിരുവനന്തപുരം: ആറ്റുകാൽ ക്ഷേത്രത്തിൽ പൊങ്കാല മഹോത്സവം മാർച്ച് 13ന് നടക്കും. പൊങ്കാല ദിവസമായ മാര്ച്ച് 13ന് ജില്ലയ്ക്ക് അവധി നല്കുന്നതിന് സര്ക്കാരിന് കത്ത് നല്കിയിട്ടുണ്ടെന്ന് മന്ത്രി വി.ശിവന്കുട്ടി അറിയിച്ചു. ഉത്സവത്തോടനുബന്ധിച്ച് 30 വാര്ഡുകള് ഉത്സവമേഖലയായി പ്രഖ്യാപിച്ചിട്ടുണ്ട്.(Attukal Pongala on March 13)
ഉൽസവദിവസങ്ങളിലു൦, പ്രത്യേകിച്ച് പൊങ്കാല ദിനത്തിലു൦ ഭക്ഷണം, വെള്ളം വിതരണം ചെയ്യല് എന്നിവയില് അതീവ ശ്രദ്ധ വേണം, ഉപഉത്സവങ്ങളില് നിര്ബന്ധിത പിരിവ് പാടില്ല. ദൂരദേശങ്ങളില് നിന്ന് വിളക്കുകെട്ടുമായി വരുന്നവര് ഗതാഗത തടസ്സം സൃഷ്ടിക്കരുതെന്നും പരസ്യങ്ങൾ കോടതിയുടെ അനുമതി വാങ്ങി മാത്രം സ്ഥാപിക്കണമെന്നും മന്ത്രി നിർദേശം നൽകി. തെരുവ് വിളക്കുകളുടെ അറ്റകുറ്റപ്പണി, കുടിവെള്ള ക്ഷാമം പരിഹരിക്കല്, ഓടകള് വൃത്തിയാക്കല്, ടോയ്ലറ്റ് സംവിധാനങ്ങള്, മാലിന്യ പ്രശ്നങ്ങള് എന്നിവ സംബന്ധിച്ചുള്ള പ്രവര്ത്തനങ്ങള് വേഗത്തില് പൂര്ത്തീകരിക്കാന് മന്ത്രി വി.ശിവന്കുട്ടി നിര്ദ്ദേശം നല്കിയിട്ടുണ്ട്.
പൊങ്കാല ദിവസത്തില് എയര്ക്രാഫ്റ്റ് മാര്ഗ്ഗേനയുള്ള പുഷ്പവൃഷ്ടി ഉണ്ടാവില്ല. തിരുവനന്തപുരം വിമാനത്താവളത്തില് മാര്ച്ച് 29വരെ റണ്വേ നിര്മ്മാണ പ്രവര്ത്തനങ്ങള് നടക്കുന്നതിനാലാണ് ഇത്. കോര്പ്പറേഷന് പരിധിയിലും വെങ്ങാനൂര് ഗ്രാമപഞ്ചായത്തിലെ വെള്ളാര് വാര്ഡിലും പൊങ്കാലയുടെ തലേ ദിവസം വൈകുന്നേരം 6 മുതല് പൊങ്കാല ദിവസം വൈകുന്നേരം 6വരെ മദ്യനിരോധനം ഏര്പ്പെടുത്തും.
