പാലക്കാട്: സ്വകാര്യബസിന് നേരെ ബൈക്കിലെത്തിയ അജ്ഞാത സംഘത്തിന്റെ ആക്രമണം. സ്ക്രൂ ഡ്രൈവർ എറിഞ്ഞതിനെ തുടർന്ന് മുന്വശത്തെ ചില്ല് തകർന്ന് യാത്രക്കാരിക്ക് പരിക്കേറ്റു. ചാലിശ്ശേരി- പട്ടാമ്പി പാതയില് ഖദീജ മന്സിലിന് സമീപം ശനിയാഴ്ച വൈകിട്ട് ആറരയോടെയാണ് സംഭവം.(attack on private bus in chalissery; passenger injured)
ഗുരുവായൂര്- പാലക്കാട് റൂട്ടില് സര്വീസ് നടത്തുന്ന ലുഫ്ത്താന്സ എന്ന ബസിന് നേരെയാണ് ആക്രമണം ഉണ്ടായത്. ബൈക്കിലെത്തിയ രണ്ടുപേർ സ്ക്രൂ ഡ്രൈവര് എറിയുകയായിരുന്നു. കൂറ്റനാട് ഭാഗത്തുനിന്നും ബൈക്കില് വരികയായിരുന്ന രണ്ട് പേരാണ് എതിരെ വന്ന ബസിനു നേരെ പ്രകോപനമൊന്നും ഇല്ലാതെ ആക്രമണം നടത്തിയത്.
നമ്പര് പ്ലേറ്റ് ഇല്ലാത്ത ബൈക്കില് എത്തിയവരാണ് ആക്രമണം നടത്തിയതെന്നാണ് വിവരം. കൂറ്റനാട് ഭാഗത്തുനിന്നും വരികയായിരുന്ന കാറിന് നേരെയും ഇവര് പ്രകോപനം നടത്തിയതായി കാര് യാത്രികര് പറഞ്ഞു. സംഭവത്തിൽ ചാലിശ്ശേരി പോലീസ് സ്ഥലത്തെത്തി അന്വേഷണം ആരംഭിച്ചു.
