ഇങ്ങനെയാണെങ്കിൽ ഹോട്ടലുകൾ തുറക്കില്ല; അവബോധം നൽകിയതാണ് ആരെയും ബലം പ്രയോഗിച്ച് പുറത്താക്കിയിട്ടില്ലെന്ന് ഭക്ഷ്യസുരക്ഷാ വകുപ്പ്
ആലപ്പുഴ: ജില്ലയിൽ പക്ഷിപ്പനി സ്ഥിരീകരിച്ച പശ്ചാത്തലത്തിൽ ഭക്ഷ്യസുരക്ഷാ വകുപ്പിന്റെ പരിശോധന കർശനമായതോടെ ഹോട്ടൽ ഉടമകൾ പ്രതിഷേധവുമായി രംഗത്ത്.
നാളെ മുതൽ ഹോട്ടലുകൾ അടച്ചിടേണ്ടിവരുമെന്ന് കേരള ഹോട്ടൽ ആൻഡ് റെസ്റ്റോറന്റ് അസോസിയേഷൻ (KHRA) ആലപ്പുഴ ജില്ലാ കമ്മിറ്റി മുന്നറിയിപ്പ് നൽകി.
ആലപ്പുഴ നഗരത്തിലെ തിരക്കേറിയ ഹോട്ടലിൽ പരിശോധനയ്ക്കിടെ ഭക്ഷണം കഴിക്കാനെത്തിയ ഉപഭോക്താക്കളെ പുറത്തിറക്കിയെന്ന ആരോപണമാണ് പ്രതിഷേധത്തിന് കാരണം.
ഫ്രോസൺ ചിക്കൻ പാകം ചെയ്യാൻ അനുമതി നൽകണമെന്നും, പക്ഷിപ്പനി നിയന്ത്രണത്തിന്റെ ഭാഗമായി നിശ്ചിത കാലയളവിൽ താറാവ് കൃഷിക്ക് പൂർണനിരോധനം ഏർപ്പെടുത്തണമെന്നുമാണ് ഹോട്ടൽ ഉടമകളുടെ ആവശ്യം.
പക്ഷിപ്പനി റിപ്പോർട്ട് ചെയ്ത പ്രദേശങ്ങളിൽ നിന്ന് പത്ത് കിലോമീറ്റർ ചുറ്റളവിൽ ഒരാഴ്ചത്തേക്ക് ചിക്കൻ, മുട്ട വിഭവങ്ങൾ വിൽക്കരുതെന്ന് ജില്ലാ കളക്ടർ ഉത്തരവിട്ടിരുന്നു. ഇതിന് പിന്നാലെയാണ് ഹോട്ടലുകളിലെ പരിശോധന ശക്തമാക്കിയത്.
എന്നാൽ, പരിശോധനയുടെ ഭാഗമായി അവബോധം നൽകുക മാത്രമാണ് ചെയ്തതെന്നും ആരെയും ബലം പ്രയോഗിച്ച് പുറത്താക്കിയിട്ടില്ലെന്നും ഭക്ഷ്യസുരക്ഷാ വകുപ്പ് വ്യക്തമാക്കി.
വിഷയത്തിൽ ഇന്ന് ജില്ലാ കളക്ടറുമായി ചർച്ച നടത്തുമെന്നും, അനുകൂല തീരുമാനമുണ്ടായില്ലെങ്കിൽ ഹോട്ടലുകൾ അടച്ചിടുമെന്ന നിലപാടിൽ ഉറച്ചുനിൽക്കുകയാണെന്നും KHRA അറിയിച്ചു.
തകഴി, കാർത്തികപ്പള്ളി, കരുവാറ്റ, പുന്നപ്ര തെക്ക്, അമ്പലപ്പുഴ തെക്ക്, ചെറുതന, പുറക്കാട്, നെടുമുടി, കുമാരപുരം പഞ്ചായത്തുകളിലെ വിവിധ പ്രദേശങ്ങളിലാണ് പക്ഷിപ്പനി സ്ഥിരീകരിച്ചത്.
കഴിഞ്ഞ വർഷത്തെ അപേക്ഷിച്ച് ഇത്തവണ വ്യാപനം നിയന്ത്രണവിധേയമാണെന്ന വിലയിരുത്തലും അധികൃതർ പങ്കുവച്ചു.
കള്ളിംഗ് നടപടികൾ പൂർത്തിയായി
28,549 പക്ഷികളെ കൊന്ന് കത്തിച്ചു
314 മുട്ടകളും 703 കിലോ തീറ്റയും നശിപ്പിച്ചു
ഇന്ന് അണുനശീകരണ പ്രവർത്തനങ്ങൾ നടത്തും
English Summary
In the wake of avian influenza cases in Alappuzha district, intensified inspections by the Food Safety Department have triggered protests from hotel owners. The Kerala Hotel and Restaurant Association (KHRA) has warned of a possible shutdown of hotels from tomorrow if their demands are not addressed.
Hotel owners allege that customers were forced to leave during inspections at busy hotels in the city. They are demanding permission to use frozen chicken and seeking a temporary ban on duck farming to effectively control bird flu.
The District Collector had ordered a one-week ban on the sale of chicken and egg products within a 10-km radius of affected areas. Authorities, however, clarified that inspections were only meant for awareness and no customers were evicted. Talks with the District Collector are expected today.
alappuzha-bird-flu-hotel-owners-protest
Alappuzha, Bird Flu, Avian Influenza, Hotel Owners Protest, Food Safety Department, Kerala News, Chicken Ban, Public Health, KHRA
