പാലിൽ ഫോർമാലിൻ; ഷേക്ക് അടിച്ച് ‘ഷോക്ക്’ ആകരുത്! മിൽക്ക് ഷേക്കിൽ കെമിക്കൽ മാജിക്!
കോട്ടയം: കടുത്ത ചൂടിൽ നിന്ന് ആശ്വാസം തേടി മിൽക് ഷേക്കുകൾ വാങ്ങി കുടിക്കുന്നവർ കൂടുതൽ സൂക്ഷിക്കണമെന്ന് ഭക്ഷ്യസുരക്ഷാ വിഭാഗം മുന്നറിയിപ്പ് നൽകി.
മായം ചേർത്ത ‘വരവ് പാൽ’ ഉപയോഗിച്ചാണ് പല ഷേക്കുകളും തയ്യാറാക്കുന്നതെന്ന പരാതികൾ വ്യാപകമാകുകയാണ്.
തിളപ്പിക്കാതെയുള്ള ഇത്തരം പാലിന്റെ ഉപയോഗം ഗുരുതര ആരോഗ്യപ്രശ്നങ്ങൾക്ക് വഴിയൊരുക്കുമെന്ന് അധികൃതർ വ്യക്തമാക്കി.
തമിഴ്നാട്ടിൽ നിന്ന് കുറഞ്ഞ വിലയ്ക്ക് പാൽ എത്തിച്ച്, വിവിധ രാസവസ്തുക്കൾ ചേർത്ത് കവറിലാക്കി വിപണിയിലെത്തിക്കുന്ന കമ്പനികൾ പ്രവർത്തിക്കുന്നതായി കണ്ടെത്തിയിട്ടുണ്ട്.
ഈ പച്ചപ്പാൽ നേരിട്ട് കട്ടയാക്കി ഷേക്ക് ഉണ്ടാക്കുന്നതിനാൽ, പാലിൽ ചേർക്കുന്ന രാസവസ്തുക്കൾ മുഴുവൻ ശരീരത്തിലേക്ക് പ്രവേശിക്കുന്ന സാഹചര്യമാണുള്ളത്.
സംസ്ഥാനത്ത് വ്യാപകമായി ലഭിക്കുന്ന മിൽമ പാലിന് അരലിറ്റർ കവറിന് 28 രൂപയാണ് വില.
എന്നാൽ ഇതിലും വളരെ കുറഞ്ഞ നിരക്കിലാണ് ഇത്തരം ‘വരവ് പാൽ’ വിപണിയിലെത്തുന്നത്.
പരിശോധനയിൽ രാസവസ്തുക്കൾ ചേർത്ത പാൽ കണ്ടെത്തി നടപടിയെടുത്താൽ, ബന്ധപ്പെട്ട കമ്പനി പേര് മാറ്റി അടുത്ത ദിവസം തന്നെ അതേ പാൽ മറ്റൊരു കവറിലാക്കി വിപണിയിലെത്തിക്കുന്ന പ്രവണതയും ശ്രദ്ധയിൽപ്പെട്ടിട്ടുണ്ട്.
ക്ഷീരവകുപ്പിന്റെ ലബോറട്ടറി പരിശോധനയിൽ പാലിൽ ഇ-കോളി ബാക്ടീരിയയുടെ സാന്നിധ്യം കണ്ടെത്തിയ സംഭവങ്ങളും ഉണ്ടായതായി അധികൃതർ അറിയിച്ചു.
ഷേക്ക് തയ്യാറാക്കാൻ ഏത് പാലാണ് ഉപയോഗിക്കുന്നതെന്ന് ഉപഭോക്താവിന് തിരിച്ചറിയാൻ സാധിക്കാത്തതാണ് ഏറ്റവും വലിയ അപകടം.
നിയമപ്രകാരം ഒരു പാൽ പായ്ക്കറ്റിന് പരമാവധി രണ്ട് ദിവസത്തെ കാലാവധിയാണ് അനുവദിച്ചിരിക്കുന്നത്. എന്നാൽ അനധികൃത കമ്പനികൾ അഞ്ചുദിവസം വരെ കാലാവധി രേഖപ്പെടുത്തുന്നതായും കണ്ടെത്തിയിട്ടുണ്ട്.
രാജ്യത്ത് പശുവിന്റെ പാൽ വിൽക്കുമ്പോൾ കുറഞ്ഞത് 3.2 ശതമാനം കൊഴുപ്പും 8.3 ശതമാനം കൊഴുപ്പിതര ഖരപദാർത്ഥങ്ങളും ഉണ്ടായിരിക്കണം എന്നതാണ് നിലവിലെ മാനദണ്ഡം.
പ്രധാന അപകടസാധ്യതകൾ
പാൽ പാസ്ചറൈസ് ചെയ്യാത്തത്
രോഗാണുക്കളുടെ സാന്നിധ്യം
ഫോർമാലിൻ, ആന്റിബയോട്ടിക് അവശിഷ്ടങ്ങൾ
കാൻസർ ഉൾപ്പെടെയുള്ള ഗുരുതര രോഗങ്ങൾക്ക് സാധ്യത
ഭക്ഷ്യസുരക്ഷാ പരിശോധനകൾ സംസ്ഥാനത്തുടനീളം ശക്തമാക്കുമെന്നും അധികൃതർ അറിയിച്ചു.
English Summary
In Kottayam, the Food Safety Department has warned consumers about milkshakes prepared using adulterated and unboiled “incoming milk”. Officials say such milk, often sourced cheaply from Tamil Nadu and chemically processed, may contain harmful substances and even bacteria. Compared to regulated brands such as Milma, this cheaper milk is being used widely in shakes, posing serious health risks including the possibility of cancer. Authorities have intensified inspections across the state.
adulterated-milkshake-warning-kottayam-food-safety
milkshake, adulterated milk, food safety, Kottayam, Milma, Tamil Nadu, health warning, E coli, formalin, Kerala
