കൊച്ചി: ‘നാൻസി റാണി’ എന്ന ചിത്രത്തിന്റെ പ്രമോഷന് നടി അഹാന കൃഷ്ണ പങ്കെടുക്കാത്തത് വൻ വിവാദങ്ങൾക്ക് വഴിവെച്ചിരുന്നു. ഈ സമയത്താണ് അന്തരിച്ച സംവിധായകൻ ജോസഫ് മനു ജെയിംസിന്റെ ഭാര്യ നൈന രംഗത്തെത്തുന്നത്. തന്റെ ഭർത്താവും അഹാനയും തമ്മിൽ ചെറിയ പ്രശ്നങ്ങൾ ഉണ്ടായിരുന്നതായും, പക്ഷെ അതെല്ലാം നടന്നിട്ട് മൂന്ന് വർഷം കഴിഞ്ഞെന്നും മാനുഷിക പരിഗണന വച്ചെങ്കിലും പ്രൊമോഷൻ പരിപാടികൾക്ക് വരേണ്ടതായിരുന്നുവെന്നും നൈന പ്രസ് മീറ്റിൽ പറഞ്ഞു.
ഇത്രെയും നാളും ഈ വിഷയത്തോട് മൗനം പാലിച്ച അഹാന ഇപ്പോൾ മറുപടിയുമായി എത്തിയിരിക്കുകയാണ്. സോഷ്യൽ മീഡിയയിലൂടെ പങ്കുവച്ച നീണ്ട കുറിപ്പിലൂടെയാണ് താരം തന്റെ പ്രതികരണം അറിയിച്ചിരിക്കുന്നത്.
താനും ചിത്രത്തിൻറെ സംവിധായകനും, ഭാര്യയും തമ്മിൽ നിലനിൽക്കുന്നത് ചെറിയ പ്രശ്നങ്ങൾ അല്ലെന്നും, അതുകൊണ്ടുതന്നെ മുന്ന് വർഷങ്ങൾ കഴിഞ്ഞുവെന്ന കാരണം കൊണ്ട് മാത്രം അതൊന്നും മറക്കാൻ കഴിയില്ലെന്നുമാണ് അഹാന പറയുന്നത്.
സിനിമയുടെ ചിത്രീകരണ സമയത്ത് തീർത്തും അൺപ്രൊഫഷണലായി പെരുമാറിയ സംവിധായകൻ മനു, തന്നെ അറിയിക്കാതെ മറ്റൊരാളെക്കൊണ്ട് തൻറെ കഥാപാത്രത്തിന് ഡബ്ബ് ചെയ്യിപ്പിച്ചെന്നും പറഞ്ഞു. മാത്രമല്ല സംവിധായകൻ മനു ഷൂട്ടിംഗ് സൈറ്റിൽ മദ്യപിച്ചെത്താറുള്ളതായും അഹാന തന്റെ കുറിപ്പിൽ പറയുന്നുണ്ട്.
താൻ ഡ്രഗ് ഉപയോഗിക്കുന്നുവെന്ന് പറഞ്ഞു നടന്നുവെന്നും, അതിനുള്ള തെളിവുകൾ തന്റെപക്കൽ ഉണ്ടെന്നും അഹാന പറയുന്നു. ഞാൻ അഭിനയിച്ച ചിത്രം എത്ര മോശം ആണെങ്കിലും അതിന്റെ പ്രൊമോഷൻ ഞാൻ ചെയ്യുമായിരുന്നു. എന്റെ കടമയായതുകൊണ്ടാണ് അത്. പക്ഷേ, ഇവിടെ സംഭവിച്ചത് അതിനപ്പുറമാണ്. സിനിമയുടെ സംവിധായകനും ഭാര്യയും എന്റെയും കുടുംബത്തിന്റെയും മേൽ മയക്കുമരുന്ന് ഉപയോഗിക്കുന്നുവെന്ന് നുണ പ്രചരിപ്പിക്കുകയായിരുന്നുവെന്നും. ഇത് അവരുടെ തെറ്റുകൾ മറയ്ക്കുന്നതിനുള്ള തന്ത്രമായിരുന്നുവെന്നും നടി പറയുന്നു.
ചില പ്രശ്നങ്ങൾ ഉണ്ടായിരുന്നതായി അറിയാമെന്നും പക്ഷെ അത് എന്താണെന്ന് അറിയില്ലെന്നുമായിരുന്നു സംവിധായകന്റെ ഭാര്യ പറഞ്ഞിരുന്നത്. എന്നാൽ ഇത് ചില പ്രശ്നങ്ങൾ അല്ലെന്നും, സംവിധായകനും ഭാര്യയ്ക്കുമെതിരെ കേസ് നൽകേണ്ടിവന്ന ഗുരുതരമായ പ്രശ്നമാണെന്നും അഹാന കൂട്ടിച്ചേർത്തു.
വിഷയത്തിൽ മനുവിന്റെയും ഭാര്യയുടെയും പ്രവൃത്തികൾ വെളിപ്പെടുത്താൻ ആഗ്രഹിച്ചിരുന്നില്ലെന്നും. സിനിമയുടെ ആദ്യ പ്രസ് മീറ്റിൽ നിങ്ങൾ എന്റെ മേൽ ആക്ഷേപം ഉന്നയിച്ചപ്പോഴും ഉടൻ പ്രതികരിച്ചില്ലെന്നും, കാരണം താൻ ഒരു മനുഷ്യനാണെന്നും അഹാന തന്റെ കുറിപ്പിൽ പറയുന്നു.
