കൊച്ചി: ആലുവ റെയില്വെ സ്റ്റേഷന് പരിസരത്തു നിന്നും യുവാവിനെ തട്ടിക്കൊണ്ടുപോയി. ഇന്ന് രാവിലെ ഏഴ് മണിയോടെയാണ് സംഭവം. സംഘത്തിന്റെ സിസിടിവി ദൃശ്യങ്ങൾ പൊലീസിന് ലഭിച്ചു.
ചുവന്ന ഇന്നോവ കാറിലെത്തിയ സംഘമാണ് മർദിച്ച് യുവാവിനെ വാഹനത്തിൽ കയറ്റിക്കൊണ്ടുപോയത്.
ആറരയോടെ ഒരു കാർ ടാക്സി സ്റ്റാൻറിൽ വന്ന് നിർത്തിയെന്നും അവിടെ നിർത്താൻ പാടില്ലെന്ന് പറഞ്ഞപ്പോൾ അവർ വാഹനം മാറ്റിനിർത്തിയെന്നും കുറച്ചു കഴിഞ്ഞപ്പോൾ ബഹളം കേട്ടുവെന്നും അങ്ങോട്ട് നോക്കിയപ്പോൾ ഒരാളെ തള്ളിക്കയറ്റി പോകുന്നത് കണ്ടുവെന്നും ഒരു ഡ്രൈവർ പറഞ്ഞു. ചുവന്ന ഇന്നോവയിലാണ് സംഘം വന്നതെന്നും നാലു പേരുണ്ടായിരുന്നുവെന്നും വ്യക്തമാക്കി. പൊലീസിന് ചില നിർണായക സിസിടിവി ദൃശ്യങ്ങൾ ലഭിച്ചതായാണ് വിവരം.
നാല് ദിവസം മുമ്പ് റെയിൽവേ സ്റ്റേഷനിൽ വന്നിറങ്ങിയ മറ്റൊരാളെ തട്ടിക്കൊണ്ടു പോയെങ്കിലും ഇയാളെ പിന്നീട് വിട്ടയച്ചിരുന്നു. ഇതിന്റെ അന്വേഷണം നടന്നുകൊണ്ടിരിക്കേയാണ് പുതിയ സംഭവം. സംഭവത്തില് അന്വേഷണം നടക്കുകയാണെന്നും കൂടുതല് വിവരങ്ങള് ലഭ്യമായിട്ടില്ലെന്നും പൊലീസ് വ്യക്തമാക്കി.കുഴൽപ്പണ ഇടപാട് സംഘം ആണോ എന്ന് സംശയിക്കുന്നതായി പൊലീസ് വ്യക്തമാക്കി.
