ഒരു നായ ഒറ്റ ദിവസം കൊണ്ട് ഓടിച്ചിട്ട് കടിച്ചത് അമ്പതു പേരെ; പേടിച്ചിട്ട് പുറത്തിറങ്ങാനാകുന്നില്ലെന്ന് നാട്ടുകാർ

ആലപ്പുഴ: മാവേലിക്കര ന​ഗരത്തിലും പരിസര പ്രദേശങ്ങളിലും തെരുവ് നായയുടെ ആക്രമണം. പ്രദേശത്തെ 50 ലേറെ പേർക്കാണ് കടിയേറ്റത്.

ഒരു നായ തന്നെയാണ് ആളുകളെ ഓടി നടന്ന് കടിച്ചതെന്ന് ‌നാട്ടുകാർ പറയുന്നു. എന്നാൽ, ആക്രമണകാരിയായ നായയെ ഇതുവരെ പിടികൂടാൻ സാധിച്ചില്ല.

ഇന്നലെ ഒരു ദിവസം കൊണ്ടാണ് നായ ഇത്രയധികം പേരെ അക്രമിച്ചതെന്നാണ് വിവരം.

നിരവധി പേർക്ക് കൈക്കും കാലിനും പരിക്കേറ്റിട്ടുണ്ടെങ്കിലും ആരുടേയും പരിക്ക് ​ഗുരുതരമല്ലെന്നാണ് വിവരം.

ഇവിടെ തെരുവ് നായ്ക്കളുടെ ശല്യം പെരുകി വരുന്നതായി നാട്ടുകാർ പരാതി പറയുന്നുണ്ടെങ്കിലും അധികൃതർ ഇതുവരെ ഒരു നടപടിയും സ്വീകരിച്ചില്ലെന്ന ആക്ഷേപവുമുണ്ട്.

പേവിഷ ബാധയുള്ള നായയാണ് ആക്രമണം നടത്തിയതെന്ന സൂചനയുണ്ട്. നായയെ പിടികൂടി പരിശോധിച്ചാൽ മാത്രമേ ഇക്കാര്യത്തിൽ വ്യക്തത വരികയുള്ളൂ.