മലപ്പുറം: എസ്.ഡി.പി.ഐ പ്രവർത്തകരുടെ വീടുകളിൽ എൻ ഐ എ റെയ്ഡ്. മലപ്പുറം മഞ്ചേരിയിലുള്ള അഞ്ച് എസ്.ഡി.പി.ഐ പ്രവർത്തകരുടെ വീടുകളിലാണ് ഇന്നു പുലർച്ചെ എൻഐഎ സംഘം പരിശോധനക്കെത്തിയത്.
ഇതിൽനാലുപേരെ ഉദ്യോഗസ്ഥർ കസ്റ്റഡിയിലെടുത്തു. ഒരാൾ കൂടി പിടിയിലാകാനുണ്ടെന്നാണ് പുറത്തു വരുന്ന റിപ്പോർട്ട്.
ഇന്നു പുലർച്ചെ മൂന്ന് മണിയോടെയാണ് കൊച്ചിയിൽ നിന്നുള്ള എൻ ഐ എ സംഘം പരിശോധന തുടങ്ങിയത്. അഞ്ച് വീടുകളിലായിരുന്നു പരിശോധന.
ഒരു മണിക്കൂറിനുള്ളിൽ തന്നെ റെയ്ഡ് പൂർത്തിയാക്കി. നാല് വിടുകളിൽ നിന്നായി ഓരോരുത്തരെ വീതം കസ്റ്റഡിയിലെടുക്കുകയായിരുന്നു.
കസ്റ്റഡിയിലായവരിൽ ഒരാൾ എസ് ഡി പി ഐയുടെ ബ്രാഞ്ച് പ്രസിഡന്റാണ്. രണ്ട് പേർ സ്വർണപ്പണിക്കാർ.
ഇനി ഒരാൾ കൂടി പിടിയിലാകാനുണ്ട്. ഇയാൾക്കായി തെരച്ചിൽ തുടരുകയാണ്.
ഒരു കേസുമായി ബന്ധപ്പെട്ടാണ് ഇവരെ കൊണ്ടുപോകുന്നതെന്നാണ് ഉദ്യോഗസ്ഥർ ഇവരുടെ വീട്ടുകാരോട് പറഞ്ഞത്.
വിശദമായി ചോദ്യം ചെയ്ത ശേഷം തെറ്റ് ചെയ്തിട്ടില്ലെന്ന് ബോദ്ധ്യമായാൽ വിട്ടയയ്ക്കുമെന്നും എൻ ഐ എ ഉദ്യോഗസ്ഥർ ഇവരുടെ ബന്ധുക്കളോട് പറഞ്ഞിട്ടുണ്ട്.
