തിരുവനന്തപുരം: കോളജ് പ്രിന്‍സിപ്പല്‍ നിയമനത്തില്‍ സംസ്ഥാന സര്‍ക്കാരിനു തിരിച്ചടി. 43 അംഗ അന്തിമ പട്ടികയില്‍നിന്നു നിയമനം നടത്തണമെന്ന് കേരള അഡ്മിനിസ്‌ട്രേറ്റീവ് ട്രൈബ്യൂണല്‍ നിര്‍ദേശം നല്‍കി. യോഗ്യതയുള്ളവരെ രണ്ടാഴ്ചയ്ക്കുള്ളില്‍ താല്‍ക്കാലികമായി നിയമിക്കണമെന്നാണ് ഉത്തരവ്.
സംസ്ഥാനത്തെ ഗവ.ആര്‍ട്‌സ് ആന്‍ഡ് സയന്‍സ് കോളജുകളില്‍ പ്രിന്‍സിപ്പല്‍മാരായി നിയമിക്കേണ്ട 43 പേരുടെ പിഎസ്‌സി അംഗീകരിച്ച പട്ടിക കോളജ് വിദ്യാഭ്യാസ ഡയറക്ടര്‍ സമര്‍പ്പിച്ചപ്പോള്‍ അതിനെ കരടു പട്ടികയായി പരിഗണിച്ചാല്‍ മതിയെന്ന് ഉന്നത വിദ്യാഭ്യാസ മന്ത്രി ആര്‍.ബിന്ദു നിര്‍ദേശിച്ച കാര്യം പുറത്തുവന്നിരുന്നു. ഇതിനു പിന്നാലെയാണ് ട്രൈബ്യൂണല്‍ വീണ്ടും നിര്‍ദേശം നല്‍കിയത്. ട്രൈബ്യൂണലിന്റെ നിര്‍ദേശം നടപ്പാക്കുമെന്ന് മന്ത്രി ബിന്ദു പറഞ്ഞു.
പിഎസ്‌സി അംഗീകരിച്ച 43 പേരുടെ പട്ടികയില്‍നിന്ന് പ്രിന്‍സിപ്പല്‍ നിയമനം നടത്തണമെന്ന് ജൂണ്‍ 30ന്റെ ഇടക്കാല വിധിയില്‍ ട്രൈബ്യൂണല്‍ വ്യക്തമാക്കിയെങ്കിലും സര്‍ക്കാര്‍ റിവ്യൂ പെറ്റീഷന്‍ നല്‍കുകയാണ് ചെയ്തത്. കഴിഞ്ഞ ജനുവരി 11ന് പ്രസിദ്ധീകരിച്ച 43 പേരുടെ പട്ടികയില്‍ നിന്നു മാത്രമേ പ്രിന്‍സിപ്പല്‍ നിയമനം നടത്താവൂ എന്ന് കഴിഞ്ഞ 24ന് സര്‍ക്കാരിനു ട്രൈബ്യൂണല്‍ വീണ്ടും നിര്‍ദേശം നല്‍കിയിരുന്നു.
66 ഗവ. ആര്‍ട്‌സ് ആന്‍ഡ് സയന്‍സ് കോളജുകളില്‍ 62 എണ്ണത്തിലാണു പ്രിന്‍സിപ്പല്‍മാര്‍ ഇല്ലാത്തത്. നാലിടത്തേ സ്ഥിരം പ്രിന്‍സിപ്പല്‍മാര്‍ ഉള്ളൂ. 2018 ജൂലൈ 18നു ശേഷം ഈ കോളജുകളില്‍ പ്രിന്‍സിപ്പല്‍ നിയമനം നടത്തിയിട്ടില്ല. പ്രിന്‍സിപ്പല്‍മാരുടെ പ്രമോഷന്‍ തസ്തികയായ ഡപ്യൂട്ടി ഡയറക്ടര്‍മാര്‍ 5 പേരുള്ളതില്‍ 4 തസ്തികയും ഒഴിഞ്ഞുകിടക്കുന്നു. ഇവര്‍ക്കു സ്ഥാനക്കയറ്റം നല്‍കേണ്ട അഡീഷനല്‍ ഡയറക്ടര്‍ തസ്തികയിലും ആളില്ലാത്തതിനാല്‍ ഇന്‍ചാര്‍ജ് ഭരണം ആണ്.
